ಅನಿಶ್ಚಿತ ಜಗತ್ತಿನಲ್ಲಿ ಆಂತರಿಕ ಸುರಕ್ಷತೆ

ಈ ಭೂಮಿಯ ಮೇಲಿನ ಎಲ್ಲಾ ಅಸಮಾನತೆಗಳನ್ನು ಮತ್ತು ವಿಭಜನೆಗಳನ್ನು ತೊಡೆದುಹಾಕಲು ಯಾವುದೇ ವ್ಯಕ್ತಿಗೆ, ಯಾವುದೇ ಪ್ರವಾದಿಗೆ ಎಂದಿಗೂ ಸಾಧ್ಯವಾಗುವುದಿಲ್ಲ. ಆದರೆ ನೀವು ನಿಮ್ಮನ್ನು ಭಗವತ್ಪ್ರಜ್ಞೆಯಲ್ಲಿ ಕಂಡುಕೊಂಡಾಗ, ಈ ಅಸಮಾನತೆಗಳು ಮಾಯವಾಗುತ್ತವೆ ಮತ್ತು ನೀವು ಹೇಳುವಿರಿ:

ಓ ಜೀವನ ಎಷ್ಟು ಸೊಗಸು, ಸಾವು ಕೇವಲ ಕನಸು, ನಿನ್ನ ಗಾನವು ಹರಿಯಲು ಎನ್ನಲ್ಲಿ. ಆಗ ಸುಖ ಸೊಗಸು, ದುಃಖ ಕನಸು, ನಿನ್ನ ಗಾನವು ಹರಿಯಲು ಎನ್ನಲ್ಲಿ. ಆಗ ಸ್ವಾಸ್ಥ್ಯ ಸೊಗಸು, ರೋಗ ಕನಸು, ನಿನ್ನ ಗಾನವು ಹರಿಯಲು ಎನ್ನಲ್ಲಿ. ಆಗ ಸ್ತುತಿ ಸೊಗಸು, ನಿಂದೆ ಕನಸು, ನಿನ್ನ ಗಾನವು ಹರಿಯಲು ಎನ್ನಲ್ಲಿ.

ಇದೇ ಅತ್ಯುನ್ನತ ತತ್ವ. ಯಾವುದಕ್ಕೂ ಹೆದರದಿರಿ. ಚಂಡಮಾರುತದಲ್ಲಿ ಅಲೆಯ ಮೇಲೆ ಅತ್ತಿತ್ತ ಹೊಯ್ದಾಡುತ್ತಿರುವಾಗಲೂ, ನೀವು ಸಾಗರದ ವಕ್ಷಸ್ಥಳದ ಮೇಲೇ ಇರುತ್ತೀರಿ. ದೇವರ ಅಂತರ್ನಿಹಿತ ಸಾನ್ನಿಧ್ಯದ ಪ್ರಜ್ಞೆಯನ್ನು ಯಾವಾಗಲೂ ಹಿಡಿದುಕೊಂಡಿರಿ. ಸಮಚಿತ್ತದಿಂದಿರಿ ಹಾಗೂ ಹೀಗೆ ಹೇಳಿಕೊಳ್ಳಿ: “ನಾನು ನಿರ್ಭೀತ; ನಾನು ದೇವರ ಅಂಶದಿಂದ ಸೃಷ್ಟಿಸಲ್ಪಟ್ಟಿದ್ದೇನೆ. ನಾನು ಚೇತನದ ಅಗ್ನಿಯ ಒಂದು ಕಿಡಿ. ನಾನು ಬ್ರಹ್ಮಾಂಡ ಜ್ವಾಲೆಯ ಒಂದು ಅಣು. ನಾನು ದೇವರ ಅಗಾಧ ವಿಶ್ವವ್ಯಾಪಿ ಶರೀರದ ಒಂದು ಜೀವಕೋಶ. ‘ನಾನು ಮತ್ತು ನನ್ನ ತಂದೆ ಒಂದೇ.ʼ”

ನಿಮ್ಮನ್ನು ನೀವು ಭಗವಂತನ ಅಡಿಗಳಲ್ಲಿರಿಸಿ. ಅವನಿಗೆ ಶರಣಾಗಲು ವರ್ತಮಾನದಷ್ಟು ಒಳ್ಳೆಯ ಸಮಯ ಬೇರಾವುದೂ ಇಲ್ಲ…. ದೇವರನ್ನು ಕಂಡುಕೊಳ್ಳಲು ನಿಮ್ಮ ಆತ್ಮದ ಸರ್ವ ಶಕ್ತಿಯನ್ನು ಬಳಸಿ….ನಮ್ಮ ಹಾಗೂ ದೇವರ ನಡುವೆ ಮಾಯೆಯೆಂಬ ಹೊಗೆ-ತೆರೆಯು ಅಡ್ಡ ಬಂದಿದೆ, ನಾವು ಅವನ ದರ್ಶನವನ್ನು ಕಳೆದುಕೊಂಡಿರುವುದು ಅವನಿಗೆ ದುಃಖವನ್ನುಂಟುಮಾಡಿದೆ. ಬೀಳುವ ಬಾಂಬ್‌ಗಳಿಂದ, ಭೀಕರ ರೋಗಗಳಿಂದ ಹಾಗೂ ದುರ್ವ್ಯಸನಗಳಿಂದ ತನ್ನ ಮಕ್ಕಳು ಸಾಯುವುದನ್ನು ನೋಡುವುದು ಅವನಿಗೆ ಇಷ್ಟವಿಲ್ಲ. ಅದರ ಬಗ್ಗೆ ಅವನಿಗೆ ವಿಷಾದವಿದೆ, ಏಕೆಂದರೆ ಅವನು ನಮ್ಮನ್ನು ಪ್ರೀತಿಸುತ್ತಾನೆ ಹಾಗೂ ನಾವು ಅವನಲ್ಲಿಗೆ ಹಿಂತಿರುಗಬೇಕೆಂದು ಅವನು ಬಯಸುತ್ತಾನೆ. ಆ ಕಾರಣಕ್ಕಾಗಿಯಾದರೂ ರಾತ್ರಿಯ ಹೊತ್ತಿನಲ್ಲಿ ನೀವು ಧ್ಯಾನ ಮಾಡಿ ಅವನೊಂದಿಗಿರುವ ಪ್ರಯತ್ನ ಮಾಡಬಾರದೆ! ನಿಮ್ಮ ಬಗ್ಗೆ ಅವನು ಎಷ್ಟೊಂದು ಯೋಚಿಸುತ್ತಾನೆ. ನೀವು ತ್ಯಜಿಸಲ್ಪಟ್ಟಿಲ್ಲ, ನಿಮ್ಮ ಆತ್ಮವನ್ನು ಪರಿತ್ಯಾಗ ಮಾಡಿದವರು ನೀವೇ…. ದೇವರು ನಿಮ್ಮ ಬಗ್ಗೆ ಎಂದೂ ಉದಾಸೀನ ತಾಳಿಲ್ಲ….

ಸೃಷ್ಟಿಯ ಏಕೈಕ ಉದ್ದೇಶವೆಂದರೆ ಅದರ ರಹಸ್ಯವನ್ನು ಭೇದಿಸುವಂತೆ ಮತ್ತು ಎಲ್ಲದರ ಹಿಂದೆ ದೇವರನ್ನು ಗ್ರಹಿಸುವಂತೆ ನಿಮ್ಮನ್ನು ಒತ್ತಾಯಿಸುವುದು. ನೀವು ಎಲ್ಲವನ್ನು ಮರೆತು ಅವನನ್ನು ಮಾತ್ರ ಅರಸಬೇಕೆಂದು ಅವನು ಬಯಸುತ್ತಾನೆ. ಒಮ್ಮೆ ನೀವು ಪ್ರಭುವಿನಲ್ಲಿ ಆಶ್ರಯವನ್ನು ಕಂಡುಕೊಂಡರೆ, ಜೀವನ್ಮರಣಗಳು ವಾಸ್ತವಗಳೆಂಬ ಅರಿವೇ ಇರುವುದಿಲ್ಲ. ಆಗ ದೇವರ ಚಿರಂತನ ಅಸ್ತಿತ್ವದಲ್ಲಿ ಬಂದು ಹೋಗುವ ಎಲ್ಲ ದ್ವಂದ್ವಗಳನ್ನೂ ನೀವು ನಿದ್ರೆಯಲ್ಲಿನ ಕನಸುಗಳಂತೆ ಕಾಣುವಿರಿ. ಈ ಉಪದೇಶವನ್ನು ಮರೆಯಬೇಡಿ, ನನ್ನ ಧ್ವನಿಯ ಮೂಲಕ ಅವನು ನಿಮಗೆ ವ್ಯಕ್ತಪಡಿಸುತ್ತಿರುವ ಉಪದೇಶ. ಮರೆಯಬೇಡಿ! ಅವನು ಹೇಳುತ್ತಿದ್ದಾನೆ:

“ನಾನು ನಿಮ್ಮಂತೆಯೇ ಅಸಹಾಯಕ, ಏಕೆಂದರೆ ನಾನು, ನಿಮ್ಮ ಆತ್ಮದಂತೆಯೇ ನಿಮ್ಮೊಂದಿಗೆ ದೇಹದಲ್ಲಿ ಬಂಧಿಸಲ್ಪಟ್ಟಿದ್ದೇನೆ. ನಿಮ್ಮ ಆತ್ಮವನ್ನು ನೀವು ಉದ್ಧರಿಸದ ಹೊರತು, ನಾನು ನಿಮ್ಮೊಂದಿಗೆ ಪಂಜರದಲ್ಲಿರುತ್ತೇನೆ. ಸಂಕಷ್ಟ ಮತ್ತು ಅಜ್ಞಾನದ ಕೆಸರಿನಲ್ಲಿ ತೊಳಲಾಡುತ್ತ ಕಾಲಹರಣ ಮಾಡಬೇಡಿ. ಬನ್ನಿ! ನನ್ನ ಬೆಳಕಿನಲ್ಲಿ ಸ್ನಾನ ಮಾಡಿ.”

ನಾವು ಈ ಭ್ರಮಾಲೋಕದಿಂದ ಪಾರಾಗಬೇಕೆಂದು ಭಗವಂತ ಬಯಸುತ್ತಾನೆ. ಅವನು ನಮಗಾಗಿ ಕಣ್ಣೀರಿಡುತ್ತಾನೆ, ಏಕೆಂದರೆ ಅವನಲ್ಲಿ ವಿಮೋಚನೆಯನ್ನು ಪಡೆಯುವುದು ನಮಗೆ ಎಷ್ಟು ಕಷ್ಟ ಎಂದು ಅವನಿಗೆ ತಿಳಿದಿದೆ. ಆದರೆ ನೀವು ಅವನ ಮಗು ಎಂದಷ್ಟೇ ನೀವು ನೆನಪಿಟ್ಟುಕೊಳ್ಳಬೇಕಾದುದು. ನಿಮ್ಮ ಬಗ್ಗೆ ಕನಿಕರಿಸದಿರಿ. ನೀವು ಕೃಷ್ಣ ಮತ್ತು ಯೇಸುವಿನಷ್ಟೇ ದೇವರಿಂದ ಪ್ರೀತಿಸಲ್ಪಟ್ಟಿದ್ದೀರಿ. ನೀವು ಅವನ ಪ್ರೀತಿಯನ್ನು ಅರಸಬೇಕು, ಏಕೆಂದರೆ ಅದು ಶಾಶ್ವತ ಸ್ವಾತಂತ್ರ್ಯ, ಅನಂತ ಆನಂದ ಮತ್ತು ಅಮರತ್ವವನ್ನು ಒಳಗೊಂಡಿರುತ್ತದೆ.

ಈ ಪ್ರಪಂಚದ ಭಯ ಹುಟ್ಟಿಸುವ ಕನಸುಗಳಿಗೆ ಹೆದರಿಕೊಳ್ಳಬೇಡಿ. ಭಗವಂತನ ಅಮರ ಜ್ಯೋತಿಯಲ್ಲಿ ಎಚ್ಚರಗೊಳ್ಳಿ! ಒಂದು ಕಾಲವಿತ್ತು, ನನಗೆ ಆಗ ಜೀವನವೆಂದರೆ ನಿಸ್ಸಹಾಯಕತೆಯಿಂದ ನೋಡುವ ಒಂದು ಭಯಾನಕ ಚಲನಚಿತ್ರವಾಗಿತ್ತು. ಅಲ್ಲಿ ನಡೆಯುತ್ತಿರುವ ದುರಂತಗಳಿಗೆ ನಾನು ಅತಿಯಾದ ಪ್ರಾಮುಖ್ಯತೆ ಕೊಡುತ್ತಿದ್ದೆ. ಆಗ ಒಂದು ದಿನ ನಾನು ಧ್ಯಾನ ಮಾಡುತ್ತಿದ್ದಾಗ, ನನ್ನ ಕೋಣೆಯಲ್ಲಿ ದೊಡ್ಡ ಬೆಳಕೊಂದು ಕಾಣಿಸಿಕೊಂಡು, ಭಗವಂತನ ಧ್ವನಿ ನನಗೆ ಹೇಳಿತು: “ನೀನಾವ ಕನಸು ಕಾಣುತ್ತಿರುವೆ? ನನ್ನ ಚಿರಂತನ ಜ್ಯೋತಿಯನ್ನು ನೋಡು, ಅದರಲ್ಲಿ ಜಗತ್ತಿನ ಹಲವಾರು ದುಃಸ್ವಪ್ನಗಳು ಬಂದು ಹೋಗುತ್ತವೆ. ಅವು ನಿಜವಲ್ಲ.” ಅದು ಎಂತಹ ದೊಡ್ಡ ಸಮಾಧಾನವಾಗಿತ್ತು! ದುಃಸ್ವಪ್ನಗಳು ಎಷ್ಟೇ ಭಯಾನಕವಾಗಿದ್ದರೂ ಅವು ದುಃಸ್ವಪ್ನಗಳಷ್ಟೇ. ಚಲನಚಿತ್ರಗಳು ಮನೋರಂಜಕವಾಗಿರಲಿ ಅಥವಾ ಮನ ಕಲಕುವಂತಿರಲಿ ಅವು ಚಲನಚಿತ್ರಗಳಷ್ಟೇ. ನಾವು ಈ ಜೀವನದ ದುಃಖಕರ ಮತ್ತು ಭಯಾನಕ ನಾಟಕಗಳಲ್ಲಿ ನಮ್ಮ ಮನಸ್ಸನ್ನು ಅಷ್ಟು ತಲ್ಲೀನಗೊಳಿಸಬಾರದು. ನಮ್ಮ ಮನವನ್ನು ಅವಿನಾಶಿ ಹಾಗೂ ವ್ಯತ್ಯಾಸವಾಗದ ಆ ಶಕ್ತಿಯ ಮೇಲಿಡುವುದು ಜಾಣತನವಲ್ಲವೆ? ಈ ಜಗದ ಚಲನಚಿತ್ರದ ಕಥಾವಸ್ತುವಿನಲ್ಲಿ ಬರುವ ಅಹಿತಕರ ಅನಿರೀಕ್ಷಿತವಾದವುಗಳ ಬಗ್ಗೆ ಚಿಂತೆಯೇಕೆ! ನಾವು ಇಲ್ಲಿರುವುದು ಅಲ್ಪಕಾಲ ಮಾತ್ರ. ಜೀವನ ನಾಟಕದ ಪಾಠವನ್ನು ಕಲಿತು ನಿಮ್ಮ ಸ್ವಾತಂತ್ರ್ಯವನ್ನು ಕಂಡುಕೊಳ್ಳಿ.

ಈ ಜೀವನದ ನೆರಳುಗಳ ಅಡಿಯಲ್ಲೇ ಭಗವಂತನ ಅದ್ಭುತ ಬೆಳಕಿದೆ. ಈ ವಿಶ್ವವು ಅವನಿರುವ ಬೃಹತ್ ಮಂದಿರ. ನೀವು ಧ್ಯಾನ ಮಾಡುವಾಗ, ಅವನೆಡೆಗೆ ಎಲ್ಲೆಲ್ಲೂ ಬಾಗಿಲುಗಳು ತೆರೆಯುತ್ತಿರುವುದನ್ನು ಕಾಣುವಿರಿ. ನೀವು ಅವನ ಸಂಸರ್ಗವನ್ನು ಹೊಂದಿದಾಗ, ಆ ಆನಂದ ಮತ್ತು ಶಾಂತಿಯನ್ನು ಪ್ರಪಂಚದ ಯಾವುದೇ ವಿನಾಶಗಳು ದೂರಮಾಡಲಾರವು. ದೃಢೀಕರಣ: “ಬದುಕಿನಲ್ಲಿ, ಸಾವಿನಲ್ಲಿ, ಅನಾರೋಗ್ಯದಲ್ಲಿ, ಬರಗಾಲದಲ್ಲಿ, ಮಾರಕ ಬೇನೆಯಲ್ಲಿ ಅಥವಾ ಬಡತನದಲ್ಲಿ ನಾನು ಸದಾ ನಿನ್ನನ್ನೇ ನಂಬಿರುವಂತೆ ಮಾಡು. ನಾನು ಬಾಲ್ಯ, ಯೌವ್ವನ, ವೃದ್ಧಾಪ್ಯ, ಹಾಗೂ ಪ್ರಾಪಂಚಿಕ ವಿಪ್ಲವಗಳಿಂದ ಪ್ರಭಾವಿತವಾಗದ ಅಮರ ಆತ್ಮವೆಂದು ಅರಿಯಲು ನೆರವಾಗು.”