ಇತರರೊಡನೆಯ ನಮ್ಮ ಸಂಬಂಧಗಳಲ್ಲಿ ಸಾಮರಸ್ಯವನ್ನು ತರುವುದು

ಮಾನವನ ಸರಿಯಾದ ವರ್ತನೆಯ ಮೂಲ ನಿಯಮವೇ ಸ್ವಸುಧಾರಣೆ….ನಮ್ಮ ಸ್ನೇಹಿತರೊಂದಿಗೆ ಅಥವಾ ನಮ್ಮ ಪ್ರೀತಿಪಾತ್ರರೊಂದಿಗೆ ಯಾವುದೋ ಒಂದು ಸಮಸ್ಯೆ ಎದುರಾದಾಗ, ಅಹಿತಕರ ಪರಿಸ್ಥಿತಿಯಲ್ಲಿ ಸಿಲುಕಿಕೊಂಡುದಕ್ಕಾಗಿ ಮನದಲ್ಲೇ ನಮ್ಮನ್ನು ನಾವು ದೂಷಿಸಿಕೊಳ್ಳಬೇಕು, ನಂತರ ಅಲ್ಲಿಂದ ಆದಷ್ಟು ಬೇಗ ಮರ್ಯಾದೆಯಿಂದ ಜಾಗ ಖಾಲಿಮಾಡ ಬೇಕು. ಬೇರೆಯವರನ್ನು ಅವರದೇ ತಪ್ಪಿದ್ದರೂ, ಗಟ್ಟಿಯಾಗಿ, ನಿರ್ದಯೆಯಿಂದ ಅಸಭ್ಯವಾಗಿ ಬಯ್ದು ತೊಂದರೆಯನ್ನು ಹೆಚ್ಚಿಸಿಕೊಳ್ಳುವುದರಿಂದ ಏನೂ ಪ್ರಯೋಜನವಿಲ್ಲ. ಶೀಘ್ರಕೋಪಿಗಳಾದ ನಮ್ಮ ಪ್ರೀತಿಪಾತ್ರರನ್ನು ಅವರ ತಪ್ಪುಗಳನ್ನು ತಿದ್ದಿಕೊಳ್ಳಲು ಒರಟಾಗಿ ಅಥವಾ ಸ್ವಪ್ರತಿಷ್ಠೆಯ ಮಾತುಗಳಿಂದ ಕಲಿಸುವುದಕ್ಕಿಂತ ನಮ್ಮ ಒಳ್ಳೆಯ ಉದಾಹರಣೆಯ ಮೂಲಕ ಕಲಿಸುವುದು ನೂರು ಪಾಲು ಒಳ್ಳೆಯದು.

ಹೆಚ್ಚಾಗಿ ಜನರು ತಮ್ಮದೇ ದೃಷ್ಟಿಕೋನದಿಂದ ಮಾತನಾಡುತ್ತಾರೆ ಹಾಗೂ ವರ್ತಿಸುತ್ತಾರೆ. ಅವರು ಮತ್ತೊಬ್ಬರ ವಿಚಾರದ ಅಂಶವನ್ನು ನೋಡುವುದು ಅಥವಾ ನೋಡಲು ಯತ್ನಿಸುವುದೂ ವಿರಳ. ನೀವು ಅರ್ಥಮಾಡಿಕೊಳ್ಳದೆ, ಇನ್ನೊಬ್ಬರ ಜೊತೆಗೆ ಜಗಳವಾಡಲು ಆರಂಭಿಸಿದರೆ, ನೆನಪಿರಲಿ, ಯಾರೇ ವಾಗ್ಯುದ್ಧ ಆರಂಭಿಸಿದ್ದರೂ, ಇಬ್ಬರೂ ಸಮಾನ ದೋಷಿಗಳು. “ಮೂರ್ಖರು ವಾದಿಸುತ್ತಾರೆ, ಜಾಣರು ಚರ್ಚಿಸುತ್ತಾರೆ.”

ಸಮಾಧಾನದಿಂದಿರಬೇಕು ಎಂದರೆ, ನೀವು ಎಲ್ಲರೊಂದಿಗೆ ಸದಾ ನಗುತ್ತಿರಬೇಕೆಂದೂ ಅವರೇನೇ ಹೇಳಿದರೂ ಒಪ್ಪಿಕೊಳ್ಳಬೇಕು ಎಂದು ಅರ್ಥವಲ್ಲ — ಅಂದರೆ ನಿಮಗೆ ಸತ್ಯದ ಬಗ್ಗೆ ಗೌರವವಿದೆ, ಆದರೆ ಅದರಿಂದ ಯಾರನ್ನೂ ಸಿಟ್ಟಿಗೆಬ್ಬಿಸಲು ನಿಮಗಿಷ್ಟವಿಲ್ಲ. ಇದು ಅತಿರೇಕವಾಯಿತು. ತಮ್ಮ ಒಳ್ಳೆಯ ಗುಣವನ್ನು ಇತರರು ಹೊಗಳಲೆಂದು, ಹೀಗೆ ಎಲ್ಲರನ್ನೂ ಸಂತುಷ್ಟಗೊಳಿಸಲು ಪ್ರಯತ್ನಿಸುವವರಿಗೆ, ತಮ್ಮ ಭಾವನೆಗಳ ಮೇಲೆ ನಿಯಂತ್ರಣವಿದೆ ಎಂದು ಹೇಳಲಾಗುವುದಿಲ್ಲ….ಯಾರಿಗೆ ತಮ್ಮ ಭಾವನೆಗಳ ಮೇಲೆ ನಿಯಂತ್ರಣವಿದೆಯೋ ಅವರು ಸತ್ಯವನ್ನೇ ನುಡಿಯುತ್ತಾರೆ, ಆ ಸತ್ಯವನ್ನು ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ ಹಂಚಿಕೊಳ್ಳುತ್ತಾರೆ, ಹಾಗೂ ಕೇಳಿಸಿಕೊಳ್ಳಲು ಸಿದ್ಧರಿಲ್ಲದ ಯಾರನ್ನೇ ಆಗಲಿ ಅವರು ಅನವಶ್ಯಕವಾಗಿ ರೇಗಿಸುವುದಿಲ್ಲ. ಅವರಿಗೆ ಯಾವಾಗ ಮಾತನಾಡಬೇಕು ಹಾಗೂ ಯಾವಾಗ ಸುಮ್ಮನಿರಬೇಕು ಎಂದು ತಿಳಿದಿರುತ್ತದೆ, ಆದರೆ ಅವರು ತಮ್ಮ ಆದರ್ಶ ಮತ್ತು ಅಂತರಂಗದ ಶಾಂತಿಯೊಂದಿಗೆ ಎಂದಿಗೂ ರಾಜಿ ಮಾಡಿಕೊಳ್ಳುವುದಿಲ್ಲ. ಅಂತಹ ವ್ಯಕ್ತಿಯು ಪ್ರಪಂಚದಲ್ಲಿ ಒಳ್ಳೆಯದನ್ನು ಮಾಡುವ ದೊಡ್ಡ ಶಕ್ತಿಯಾಗಿರುತ್ತಾನೆ.

ನಾವು ಪ್ರಾಮಾಣಿಕವಾದ ಸೌಜನ್ಯ ಭಾಷೆಯೆಂಬ ನವಿರಾದ ಉಡುಪನ್ನು ಧರಿಸಿ ಆಕರ್ಷಕವಾಗಿರಬೇಕು. ನಾವು ಮೊದಲು ನಮ್ಮ ಹತ್ತಿರದ ಬಂಧುಗಳೊಂದಿಗೆ ಸೌಜನ್ಯಶೀಲರಾಗಿರಬೇಕು. ಒಬ್ಬನು ಹಾಗೆ ಮಾಡಲು ಸಾಧ್ಯವಾದಾಗ ಎಲ್ಲರೊಂದಿಗೂ ಅವನು ಸಹಜವಾಗಿಯೇ ಸೌಹಾರ್ದದಿಂದಿರುತ್ತಾನೆ. ನಿಜವಾದ ಕೌಟುಂಬಿಕ ಸುಖದ ತಳಹದಿಯಿರುವುದು ಅರ್ಥಮಾಡಿಕೊಳ್ಳುವುದರಲ್ಲಿ ಮತ್ತು ಮೃದುವಾದ ಮಾತುಗಳಲ್ಲಿ. ಸೌಜನ್ಯತೆ ತೋರಿಸಬೇಕು ಎಂಬ ಕಾರಣಕ್ಕಾಗಿ ನಾವು ಎಲ್ಲದಕ್ಕೂ ಸಮ್ಮತಿಸಬೇಕಾಗಿಲ್ಲ. ಬೇರೆಯವರೊಂದಿಗೆ ಸಹಮತವಿರಲಿ ಬಿಡಲಿ, ಶಾಂತವಾದ ಮೌನ, ಪ್ರಾಮಾಣಿಕತೆ ಮತ್ತು ಮರ್ಯಾದೆಯುಳ್ಳ ಮಾತುಗಳು, ಹೇಗೆ ವರ್ತಿಸಬೇಕು ಎಂದು ತಿಳಿದವನ ಕುರುಹಾಗಿರುತ್ತದೆ.

ನಿಮಗೆ ಬೇರೆಯವರ ಪ್ರೀತಿ ಬೇಕಾಗಿದ್ದಲ್ಲಿ, ಪ್ರೀತಿಯ ಅವಶ್ಯಕತೆಯಿರುವವರನ್ನು ಪ್ರೀತಿಸಿ….ನಿಮಗೆ ಸಹಾನುಭೂತಿ ಬೇಕೆಂದಿದ್ದರೆ, ನಿಮ್ಮ ಸುತ್ತಲಿನವರಿಗೆ ಸಹಾನುಭೂತಿ ತೋರಿಸಲು ಆರಂಭಿಸಿ. ನಿಮಗೆ ಬೇರೆಯವರು ಗೌರವ ಸೂಚಿಸಬೇಕೆಂದಿದ್ದರೆ, ನೀವು ಎಲ್ಲರೊಂದಿಗೆ ಅಂದರೆ ಚಿಕ್ಕವರೊಂದಿಗೂ ದೊಡ್ಡವರೊಂದಿಗೂ, ಗೌರವದಿಂದ ನಡೆದುಕೊಳ್ಳಲು ಕಲಿಯಬೇಕು….ನಿಮಗೆ ಬೇರೆಯವರು ನಿಮ್ಮೊಂದಿಗೆ ಹೇಗಿರಬೇಕೆಂದಿದೆಯೋ, ಮೊದಲು ನೀವು ಹಾಗಿರಿ; ಆಗ ಬೇರೆಯವರು ನಿಮಗೆ ಹಾಗೆಯೇ ಪ್ರತಿಕ್ರಿಯಿಸುವುದನ್ನು ಕಾಣುವಿರಿ.