ಆಗಾಗ್ಗೆ ಕೇಳುವ ಪ್ರಶ್ನೆಗಳು

ವೈಎಸ್ಎಸ್ ಗುರುಗಳ ಸಾಲಿನಲ್ಲಿ ಪರಮಹಂಸ ಯೋಗಾನಂದರ ಉತ್ತರಾಧಿಕಾರಿಯಾದವರು ಯಾರಾದರೂ ಇದ್ದಾರೆಯೇ?

ತಮ್ಮ ನಿಧನದ ಮುನ್ನ, ಪರಮಹಂಸಜಿ, ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ/ಸೆಲ್ಫ್-ರಿಯಲೈಝೇಷನ್‌ ಫೆಲೋಶಿಪ್ ಗುರುಗಳ ಸಾಲಿನಲ್ಲಿ ಅವರೇ ಕೊನೆಯವರಾಗಿರಬೇಕೆಂಬುದು ಭಗವಂತನ ಆಶಯವಾಗಿತ್ತು ಎಂದು ಹೇಳಿದರು. “ನಾನು ಹೋದ ಮೇಲೆ ಬೋಧನೆಗಳೇ ಗುರುವಾಗುತ್ತವೆ; ಬೋಧನೆಗಳ ಮೂಲಕ ನೀವು ನನ್ನೊಂದಿಗೆ ಮತ್ತು ನನ್ನನ್ನು ಕಳುಹಿಸಿದ ಮಹಾನ್ ಗುರುಗಳೊಂದಿಗೆ ಶ್ರುತಿಗೂಡಿಕೊಂಡಿರುತ್ತೀರಿ.” ಎಂದು ಅವರು ಹೇಳಿದರು. ಆದ್ದರಿಂದ ಪರಮಹಂಸ ಯೋಗಾನಂದರ ಪ್ರಕಾರ, ನಂತರ ಬರುವ ಯಾವ ಶಿಷ್ಯರೂ ಎಂದಿಗೂ ಗುರುವಿನ ಪಾತ್ರ ಅಥವಾ ಉಪಾಧಿಯನ್ನು ಹೊಂದುವುದಿಲ್ಲ. ಈ ದಿವ್ಯ ಆದೇಶವು ಧಾರ್ಮಿಕ ಇತಿಹಾಸದಲ್ಲಿ ಅನನ್ಯವಾದುದೇನಲ್ಲ. ಭಾರತದಲ್ಲಿ ಸಿಖ್ ಧರ್ಮವನ್ನು ಸಂಸ್ಥಾಪಿಸಿದ ಮಹಾನ್ ಸಂತ ಗುರುನಾನಕರ ಕಾಲಾನಂತರ, ಗುರುಗಳ ಸಾಮಾನ್ಯ ಪರಂಪರೆ ಇತ್ತು. ಪರಂಪರೆಯಲ್ಲಿ ಹತ್ತನೆಯವರಾದ ಒಬ್ಬ ಗುರುಗಳು, ತಾವು ಆ ಸಾಲಿನ ಗುರುಗಳಲ್ಲಿ ಕೊನೆಯವರೆಂದೂ ಮತ್ತು ನಂತರ ಬೋಧನೆಗಳನ್ನೇ ಗುರು ಎಂದು ಪರಿಗಣಿಸಬೇಕೆಂದೂ ಘೋಷಿಸಿದರು. ತಮ್ಮ ಕಾಲಾನಂತರ, ತಮ್ಮಿಂದ ಸಂಸ್ಥಾಪಿಸಲ್ಪಟ್ಟ ಸಂಸ್ಥೆಗಳಾದ ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ/ಸೆಲ್ಫ್-ರಿಯಲೈಝೇಶನ್ ಫೆಲೋಶಿಪ್‌ಗಳ ಮೂಲಕ ತಮ್ಮ ಕಾರ್ಯವನ್ನು ಮುಂದುವರಿಸುವುದಾಗಿ ಪರಮಹಂಸಜಿಯವರು ಭರವಸೆ ನೀಡಿದ್ದಾರೆ.