ಗುರು ಪೂರ್ಣಿಮೆ ಮನವಿ — 2025

ಮೂರು ಕಡೆ ಮೀಸಲು ಅರಣ್ಯದಿಂದ ಮತ್ತು ನಾಲ್ಕನೇ ಕಡೆ ಶಾಂತ ಸರೋವರದಿಂದ ಆವೃತವಾಗಿರುವ ಯೋಗದಾ ಸತ್ಸಂಗ ಚೆನ್ನೈ ಸಾಧನಾ ಕೇಂದ್ರವು – ತಮಿಳುನಾಡಿನ ಶ್ರೀಪೆರಂಬದೂರಿನ ಬಳಿಯ ಮನ್ನೂರ್‌ನಲ್ಲಿ, ಚೆನ್ನೈನಿಂದ ಕೇವಲ 40 ಕಿ.ಮೀ. ದೂರದಲ್ಲಿ, 17 ಎಕರೆಗಳ ಪ್ರಶಾಂತ ಹಸಿರಿನ ನಡುವೆ ನೆಲೆಸಿದೆ – ಇದನ್ನು 2010 ರಲ್ಲಿ ಆಧ್ಯಾತ್ಮಿಕ ನವೀಕರಣಕ್ಕಾಗಿ ಒಂದು ಪವಿತ್ರ ಸ್ಥಳವಾಗಿ ಉದ್ಘಾಟಿಸಲಾಯಿತು.

2022 ರಲ್ಲಿ ಯೋಗದಾ ಸತ್ಸಂಗ ಪಾಠ ಮಾಲಿಕೆಯ ತಮಿಳು ಮತ್ತು ತೆಲುಗು ಅನುವಾದಗಳ ಪ್ರಾರಂಭದೊಂದಿಗೆ, ಆ ಪ್ರದೇಶದ ಹೆಚ್ಚು ಹೆಚ್ಚು ಸತ್ಯಾನ್ವೇಷಿ ಆತ್ಮಗಳು ಪರಮಹಂಸಜಿಯವರ ವಿಮೋಚನಕಾರಿ ಕ್ರಿಯಾ ಯೋಗದ ಬೋಧನೆಗಳತ್ತ ಆಕರ್ಷಿತರಾದರು.

ಈ ಹೆಚ್ಚುತ್ತಿರುವ ಆಸಕ್ತಿಗೆ ಪ್ರತಿಕ್ರಿಯೆಯಾಗಿ, 2024ರಲ್ಲಿ ಸಾಧನಾ ಕೇಂದ್ರದಲ್ಲಿ ನಿವಾಸಿ ಸನ್ಯಾಸಿ ಸಮುದಾಯವನ್ನು ಸ್ಥಾಪಿಸಲಾಯಿತು, ಇದು ಅಲ್ಲಿ ನೀಡಲಾಗುವ ಆಧ್ಯಾತ್ಮಿಕ ಕಾರ್ಯಕ್ರಮಗಳನ್ನು ಮಾರ್ಗದರ್ಶನ ಮಾಡಲು ಮತ್ತು ಕ್ರಮೇಣ ವಿಸ್ತರಿಸಲು ಸಹಾಯ ಮಾಡುತ್ತದೆ. ಶೀಘ್ರದಲ್ಲೇ, ಈ ಸಾಧನಾ ಕೇಂದ್ರವು ದೇಶಾದ್ಯಂತ, ಮತ್ತು ವಿಶೇಷವಾಗಿ ತಮಿಳುನಾಡು, ಆಂಧ್ರಪ್ರದೇಶ, ತೆಲಂಗಾಣ, ಕೇರಳ ಮತ್ತು ಕರ್ನಾಟಕದಂತಹ ದಕ್ಷಿಣ ರಾಜ್ಯಗಳಿಂದ ಹಾಗೂ ಪುದುಚೇರಿಯ ಕೇಂದ್ರಾಡಳಿತ ಪ್ರದೇಶದಿಂದ ಭಕ್ತರನ್ನು ಆಕರ್ಷಿಸಲು ಪ್ರಾರಂಭಿಸಿತು, ಇದು ಆಧ್ಯಾತ್ಮಿಕ ಚಟುವಟಿಕೆಯ ರೋಮಾಂಚಕ ಕೇಂದ್ರವಾಯಿತು.

ಇಲ್ಲಿ ನಡೆದ ವಾರಾಂತ್ಯದ ಸಾಧನಾ ಶಿಬಿರಗಳು, ಸಾಧನಾ ಸಂಗಮಗಳು ಮತ್ತು ಪ್ರವಚನಗಳು ಹೆಚ್ಚು ಹೆಚ್ಚು ಭಕ್ತರು ತಮ್ಮ ಸಾಧನೆಯನ್ನು ಮತ್ತು ದೇವರು ಹಾಗೂ ಗುರುಗಳೊಂದಿಗಿನ ಸಂಪರ್ಕವನ್ನು ಆಳವಾಗಿಸಲು ಸಾಧನಾ ಕೇಂದ್ರದ ಶಾಂತ ವಾತಾವರಣವನ್ನು ಅರಸಿದ್ದರಿಂದ, ಆಳವಾಗಿ ಮೆಚ್ಚುಗೆ ಪಡೆದವು. ಈ ಪ್ರದೇಶದ ಭಕ್ತರಿಗೆ ಹೆಚ್ಚಿನ ಆಧ್ಯಾತ್ಮಿಕ ಬೆಂಬಲವನ್ನು ನೀಡುವ ಅಗತ್ಯವನ್ನು ಗುರುತಿಸಿ, ನಮ್ಮ ಪೂಜ್ಯ ಅಧ್ಯಕ್ಷರು ಮತ್ತು ಆಧ್ಯಾತ್ಮಿಕ ಮುಖ್ಯಸ್ಥರಾದ ಸ್ವಾಮಿ ಚಿದಾನಂದ ಗಿರಿ ಅವರು ಸೆಪ್ಟೆಂಬರ್ 15, 2024 ರಂದು ಔಪಚಾರಿಕವಾಗಿ ಇದನ್ನು ಯೋಗದಾ ಸತ್ಸಂಗ ಶಾಖಾ ಆಶ್ರಮ ಎಂದು ಘೋಷಿಸಿದರು – ಇದು ಭಾರತದಲ್ಲಿ ಐದನೇ ವೈಎಸ್‌ಎಸ್‌ ಆಶ್ರಮವಾಗಿ ಸ್ಥಾಪಿಸಲ್ಪಟ್ಟಿತು.