ಯೋಗ, ಧ್ಯಾನವೆಂದರೇನು?

ಪರಮಹಂಸ ಯೋಗಾನಂದರ ಪಾಠಗಳ ಸರಣಿಯ ಕೈಪಿಡಿ “ಆತ್ಮ-ಸಾಕ್ಷಾತ್ಕಾರದ ಮೂಲಕ ಅತ್ಯುನ್ನತ ಸಾಧನೆಗಳು” ಇದರಲ್ಲಿ ಪಾಠಗಳಲ್ಲಿನ ಬೋಧನೆಗಳ ಸ್ಫೂರ್ತಿದಾಯಕ ಮತ್ತು ಆಳವಾದ ಅವಲೋಕನವನ್ನು ಕೊಡಲಾಗಿದೆ.

ಮೊದಲ ಹಂತವಾಗಿ, ಈ ಪರಿಚಯಾತ್ಮಕ ಪಾಠದಲ್ಲಿನ ಚಿಂತನೆಗಳನ್ನು ಓದಲು ಮತ್ತು ಅರಗಿಸಿಕೊಳ್ಳಲು ನಾವು ನಿಮಗೆ ಸಲಹೆ ನೀಡುತ್ತೇವೆ. ಕ್ರಿಯಾ ಯೋಗ ದೀಕ್ಷೆಗಾಗಿ ಒಬ್ಬರನ್ನು ಸಿದ್ಧಪಡಿಸುವ ಧ್ಯಾನ ತಂತ್ರಗಳನ್ನು ಕಲಿಸುವ ಹದಿನೆಂಟು ಪಾಠಗಳ ಕೋರ್ಸ್‌ಗೆ ಸೇರಿಕೊಂಡು ಆತ್ಮ-ಸಾಕ್ಷಾತ್ಕಾರದ ಪಯಣದಲ್ಲಿ ನೀವು ಮುಂದೆ ಹೋಗಲು ಬಯಸುವಿರೇ ಎಂದು ನಿರ್ಧರಿಸಲು ಇದು ಸಾಧ್ಯವಾಗಿಸುತ್ತದೆ.

“ಪಾಠಗಳಿಗೆ ನೋಂದಾಯಿಸಿ” ಟ್ಯಾಬ್ ಅಡಿಯಲ್ಲಿ ಈ ಪುಟದಲ್ಲಿನ ಸೂಚನೆಗಳನ್ನು ಅನುಸರಿಸುವ ಮೂಲಕ ನೀವು ಈಗಲೇ ನೋಂದಾಯಿಸಿಕೊಳ್ಳಬಹುದು.

ಧ್ಯಾನ ಮಾಡಲು ಕಲಿಯಿರಿ:

ಕ್ರಿಯಾ ಯೋಗ ಧ್ಯಾನದ ವಿಜ್ಞಾನವನ್ನು ಹೇಗೆ ಅಭ್ಯಾಸ ಮಾಡುವುದು ಎಂಬುದರ ಕುರಿತು ಶ್ರೀ ಶ್ರೀ ಪರಮಹಂಸ ಯೋಗಾನಂದರು, ಮೂವತ್ತು ವರ್ಷಗಳಿಗೂ ಹೆಚ್ಚು ಕಾಲ ನೀಡಿದ ತರಗತಿಗಳಿಂದ ತೆಗೆದುಕೊಳ್ಳಲಾದ, ವೈಯಕ್ತಿಕ ಸೂಚನೆಗಳನ್ನು ಯೋಗದ ಸತ್ಸಂಗ ಪಾಠಗಳಲ್ಲಿ ವಿವರವಾಗಿ ಪ್ರಸ್ತುತಪಡಿಸಲಾಗಿದೆ.

ಅಷ್ಟೇ ಅಲ್ಲದೆ, ಸಮತೋಲಿತ ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಯೋಗಕ್ಷೇಮವನ್ನು ಸಾಧಿಸಲು ಪಾಠಗಳು, ಅವರ ಪ್ರಾಯೋಗಿಕ ಮಾರ್ಗದರ್ಶನ ಮತ್ತು ತಂತ್ರಗಳನ್ನು ಒದಗಿಸುತ್ತವೆ — ಜೀವನದ ಪ್ರತಿಯೊಂದು ವಿಭಾಗದಲ್ಲಿಯೂ ಯೋಗವು ನೀಡುವ ಆರೋಗ್ಯ, ಉಪಶಮನ, ಯಶಸ್ಸು ಮತ್ತು ಸಾಮರಸ್ಯ. ಈ “ಬದುಕುವುದು-ಹೇಗೆ” ತತ್ವಗಳು ಯಾವುದೇ ನಿಜವಾದ ಯಶಸ್ವೀ ಧ್ಯಾನಾಭ್ಯಾಸದ ಸಂಪೂರ್ಣ ಅವಶ್ಯಕ ಅಂಶವಾಗಿವೆ.

ಪರಮಹಂಸ ಯೋಗಾನಂದರು ಮತ್ತು ವೈಎಸ್‌ಎಸ್‌ ಬಗ್ಗೆ

ಪರಮಹಂಸ ಯೋಗಾನಂದರ ಜನನದ ಒಂದು ಶತಮಾನದ ನಂತರ, ಅವರು ನಮ್ಮ ಕಾಲದ ಪ್ರಮುಖ ಆಧ್ಯಾತ್ಮಿಕ ವ್ಯಕ್ತಿಗಳಲ್ಲಿ ಒಬ್ಬರೆಂದು ಗುರುತಿಸಲ್ಪಟ್ಟಿದ್ದಾರೆ; ಮತ್ತು ಅವರ ಜೀವನ ಮತ್ತು ಕಾರ್ಯದ ಪ್ರಭಾವವು ಬೆಳೆಯುತ್ತಲೇ ಇದೆ. ದಶಕಗಳ ಹಿಂದೆ ಅವರು ಪರಿಚಯಿಸಿದ ಅನೇಕ ಧಾರ್ಮಿಕ ಮತ್ತು ತಾತ್ವಿಕ ಪರಿಕಲ್ಪನೆಗಳು ಮತ್ತು ವಿಧಾನಗಳು ಈಗ ಶಿಕ್ಷಣ, ಮನೋವಿಜ್ಞಾನ, ವ್ಯಾಪಾರ, ವೈದ್ಯಕೀಯ ಮತ್ತು ಇತರ ಉದ್ಯಮ ವಲಯಗಳಲ್ಲಿ ಅಭಿವ್ಯಕ್ತಿಯನ್ನು ಕಂಡುಕೊಳ್ಳುತ್ತಿವೆ—ಇವು ಮಾನವ ಜೀವನದ ಹೆಚ್ಚು ಸಮಗ್ರ, ಮಾನವೀಯ ಮತ್ತು ಆಧ್ಯಾತ್ಮಿಕ ದೃಷ್ಟಿಗೆ ಬಹಳ ಪರಿಣಾಮಕಾರಿಯಾದ ರೀತಿಯಲ್ಲಿ ಕೊಡುಗೆ ನೀಡುತ್ತಿವೆ.

ಪರಮಹಂಸ ಯೋಗಾನಂದರ ಬೋಧನೆಗಳನ್ನು ವಿವಿಧ ಕ್ಷೇತ್ರಗಳಲ್ಲಿ ವ್ಯಾಖ್ಯಾನಿಸಲಾಗುತ್ತಿದೆ ಮತ್ತು ಸೃಜನಾತ್ಮಕವಾಗಿ ಬಳಸಿಕೊಳ್ಳಲಾಗುತ್ತಿದೆ, ಜೊತೆಗೇ, ವೈವಿಧ್ಯಮಯ ತಾತ್ವಿಕ ಮತ್ತು ಆಧ್ಯಾತ್ಮಿಕ ಆಂದೋಲನಗಳ ಪ್ರತಿಪಾದಕರೂ ಬಳಸಿಕೊಳ್ಳುತ್ತಿದ್ದಾರೆ ಎಂಬ ಸಂಗತಿಯು, ಅವರು ಕಲಿಸಿದುದರಲ್ಲಿರುವ ವಿಶೇಷ ಪ್ರಾಯೋಗಿಕ ಉಪಯುಕ್ತತೆಯನ್ನು ಮಾತ್ರ ಸೂಚಿಸುವುದಿಲ್ಲ. ಅವರು ಬಿಟ್ಟುಹೋದ ಆಧ್ಯಾತ್ಮಿಕ ಪರಂಪರೆಯು ಸಮಯ ಕಳೆದಂತೆ ಸತ್ವಗುಂದುವುದಿಲ್ಲ, ಛಿನ್ನಭಿನ್ನವಾಗುವುದಿಲ್ಲ ಅಥವಾ ವಿರೂಪಗೊಳ್ಳುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಕೆಲವು ವಿಧಾನಗಳ ಅಗತ್ಯವನ್ನು ಇದು ಸ್ಪಷ್ಟಪಡಿಸುತ್ತದೆ.

ವಿವೇಚನೆ, ಸೃಜನಶೀಲತೆ, ಸುರಕ್ಷತೆ, ಸಂತೋಷ, ಅನಿರ್ಬಂಧಿತ ಪ್ರೀತಿ — ನಮಗೆ ನಿಜವಾದ ಮತ್ತು ಶಾಶ್ವತವಾದ ಸಂತೋಷವನ್ನು ತರುವಂತಹುದನ್ನು ಕಂಡುಹಿಡಿಯಲು ನಿಜವಾಗಿಯೂ ಸಾಧ್ಯವೇ?

ನಮ್ಮ ಆತ್ಮದೊಳಗಿನ ದೈವತ್ವವನ್ನು ಅನುಭವಿಸುವುದು, ದಿವ್ಯಾನಂದವನ್ನು ನಮ್ಮ ಆನಂದವೆಂದು ಹೇಳಿಕೊಳ್ಳುವುದು— ಪರಮಹಂಸ ಯೋಗಾನಂದರ ಕ್ರಿಯಾ ಯೋಗ ಬೋಧನೆಗಳು ಇದನ್ನೇ ನಮ್ಮಲ್ಲಿ ಪ್ರತಿಯೊಬ್ಬರಿಗೂ ನೀಡುತ್ತವೆ.

ಕ್ರಿಯಾ ಯೋಗದ ಪವಿತ್ರ ವಿಜ್ಞಾನವು ಧ್ಯಾನದ ಉನ್ನತ ತಂತ್ರಗಳನ್ನು ಒಳಗೊಂಡಿದೆ, ಅದರ ಶ್ರದ್ಧಾಪೂರ್ವಕ ಅನುಷ್ಠಾನವು ಭಗವತ್ಸಾಕ್ಷಾತ್ಕಾರಕ್ಕೆ ಮತ್ತು ಎಲ್ಲಾ ರೀತಿಯ ಬಂಧನದಿಂದ ಆತ್ಮದ ವಿಮೋಚನೆಗೆ ಕಾರಣವಾಗುತ್ತದೆ. ಇದು ಯೋಗದ, ದಿವ್ಯ ಸಂಯೋಗದ ರಾಜಯೋಗ್ಯ ಅಥವಾ ಸರ್ವೋಚ್ಚ ತಂತ್ರವಾಗಿದೆ. (ಓದಿ “ಯೋಗ ಎಂದರೇನು, ನಿಜವಾಗಿಯೂ?”)

ಕ್ರಿಯಾ ಯೋಗ ಮಾರ್ಗದ ಧ್ಯಾನ ತಂತ್ರಗಳು

‘ಭಗವಂತನು ಸಮೃದ್ಧ ಕೊಡುಗೆಗಳನ್ನು ನೀಡುವುದಕ್ಕಾಗಿ, ಸ್ವಸಂತೋಷದಿಂದ-ಸಿದ್ಧವಾಗಿರುವ ಹೃದಯಗಳನ್ನು ಹುಡುಕುತ್ತಾನೆ…’ “ಅದು ಅತ್ಯಂತ ಸುಂದರವಾದುದು ಮತ್ತು ನಾನು ಅದನ್ನೇ ನಂಬುತ್ತೇನೆ. ಭಗವಂತ ತನ್ನ ಉಡುಗೊರೆಗಳನ್ನು ನೀಡಲು ಸಿದ್ಧ ಹೃದಯಗಳನ್ನು ಹುಡುಕುತ್ತಾನೆ. ಅವನು ನಮಗೆ ಎಲ್ಲವನ್ನೂ ನೀಡಲು ಸಿದ್ಧನಿದ್ದಾನೆ, ಆದರೆ ನಾವು ಸ್ವೀಕರಿಸುವ ಪ್ರಯತ್ನವನ್ನು ಮಾಡಲು ಸಿದ್ಧರಿಲ್ಲ.”

ಪರಮಹಂಸ ಯೋಗಾನಂದರು ಕ್ರಿಯಾ ಯೋಗದ ವಿವರಣೆಯನ್ನು ತಮ್ಮ ಯೋಗಿಯ ಆತ್ಮಕಥೆಯಲ್ಲಿ ನೀಡುತ್ತಾರೆ. ಪರಮಹಂಸ ಯೋಗಾನಂದರು ಕಲಿಸಿದ ಮೂರು ಪೂರ್ವಸಿದ್ಧತಾ ತಂತ್ರಗಳ ಪ್ರಾಥಮಿಕ ಅಧ್ಯಯನ ಮತ್ತು ಅಭ್ಯಾಸದ ನಂತರ ಯೋಗದಾ ಸತ್ಸಂಗ ಪಾಠಗಳ ವಿದ್ಯಾರ್ಥಿಗಳಿಗೆ ನಿಜವಾದ ತಂತ್ರವನ್ನು ನೀಡಲಾಗುತ್ತದೆ.

ಎಲ್ಲವೂ ಸೇರಿ ಒಂದು ಸಮಗ್ರ ವಿಧಾನವಾದ ಈ ಧ್ಯಾನ ತಂತ್ರಗಳು, ಪ್ರಾಚೀನ ಯೋಗ ವಿಜ್ಞಾನದ ಅತ್ಯುನ್ನತ ಪ್ರಯೋಜನಗಳನ್ನು ಮತ್ತು ದಿವ್ಯ ಧ್ಯೇಯವನ್ನು ಸಾಧಿಸಲು ಸಾಧಕರಿಗೆ ಸಾಧ್ಯವಾಗಿಸುತ್ತದೆ.

1. ಚೈತನ್ಯದಾಯಕ ವ್ಯಾಯಾಮಗಳು

ಧ್ಯಾನಕ್ಕಾಗಿ ಶರೀರವನ್ನು ಸಿದ್ಧಪಡಿಸಲು 1916 ರಲ್ಲಿ ಪರಮಹಂಸ ಯೋಗಾನಂದರು ಅಭಿವೃದ್ಧಿಪಡಿಸಿದ ಮನೋಭೌತಿಕ ವ್ಯಾಯಾಮಗಳ ಸರಣಿ. ನಿಯತ ಅಭ್ಯಾಸವು ಮಾನಸಿಕ ಮತ್ತು ದೈಹಿಕ ವಿಶ್ರಾಂತಿಯನ್ನು ಉತ್ತೇಜಿಸುತ್ತದೆ ಮತ್ತು ಕ್ರಿಯಾತ್ಮಕ ಇಚ್ಛಾ ಶಕ್ತಿಯನ್ನು ಬೆಳೆಸುತ್ತದೆ. ಉಸಿರು, ಪ್ರಾಣಶಕ್ತಿ ಮತ್ತು ಕೇಂದ್ರೀಕೃತ ಗಮನವನ್ನು ಬಳಸಿಕೊಳ್ಳುವ ತಂತ್ರವು, ಶರೀರಕ್ಕೆ ಪ್ರಜ್ಞಾಪೂರ್ವಕವಾಗಿ ಹೇರಳವಾದ ಶಕ್ತಿಯನ್ನು ಸೆಳೆದುಕೊಳ್ಳಲು ಸಾಧ್ಯವಾಗಿಸುತ್ತದೆ, ಇದು ಶರೀರದ ಎಲ್ಲಾ ಭಾಗಗಳನ್ನು ವ್ಯವಸ್ಥಿತವಾಗಿ ಶುದ್ಧೀಕರಿಸುತ್ತದೆ ಮತ್ತು ಬಲಪಡಿಸುತ್ತದೆ. ಚೈತನ್ಯದಾಯಕ ವ್ಯಾಯಾಮಗಳನ್ನು ಮಾಡಲು, ಸುಮಾರು 15 ನಿಮಿಷಗಳು ಬೇಕಾಗುತ್ತದೆ, ಇವು ಒತ್ತಡ ಮತ್ತು ನರೋದ್ರೇಕಗಳನ್ನು ನಿವಾರಿಸುವ ಅತ್ಯಂತ ಪರಿಣಾಮಕಾರಿ ವಿಧಾನಗಳಲ್ಲಿ ಒಂದಾಗಿವೆ. ಧ್ಯಾನಕ್ಕೂ ಮುನ್ನ ಅವುಗಳನ್ನು ಅಭ್ಯಾಸ ಮಾಡುವುದರಿಂದ ಶಾಂತವಾದ ಆಂತರಿಕ ಅರಿವಿನ ಸ್ಥಿತಿಯನ್ನು ಪ್ರವೇಶಿಸಲು ಇದು ನೆರವಾಗುತ್ತದೆ.

2. ಏಕಾಗ್ರತೆಯ ಹಾಂಗ್‌-ಸಾ ತಂತ್ರ

ಹಾಂಗ್-ಸಾ ಏಕಾಗ್ರತೆಯ ತಂತ್ರವು ಒಬ್ಬರಲ್ಲಿರುವ ಏಕಾಗ್ರತೆಯ ಸುಪ್ತ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಈ ತಂತ್ರದ ಅಭ್ಯಾಸದಿಂದ ಒಬ್ಬನು ಆಲೋಚನೆ ಮತ್ತು ಶಕ್ತಿಯನ್ನು ಬಾಹ್ಯ ಕ್ಷೋಭೆಗಳಿಂದ ಹಿಂತೆಗೆದುಕೊಳ್ಳಲು ಕಲಿಯುತ್ತಾನೆ, ಇದರಿಂದ ಅವನು ಸಾಧಿಸಬೇಕಾದ ಯಾವುದೇ ಗುರಿ ಅಥವಾ ಪರಿಹರಿಸಬೇಕಾದ ಸಮಸ್ಯೆಯ ಮೇಲೆ ಅವುಗಳನ್ನು ಕೇಂದ್ರೀಕರಿಸಬಹುದು. ಅಥವಾ ಆಂತರ್ಯದ ದಿವ್ಯ ಪ್ರಜ್ಞೆಯನ್ನು ಅರಿತುಕೊಳ್ಳುವ ಕಡೆಗೆ ಕೇಂದ್ರೀಕೃತ ಗಮನವನ್ನು ತಿರುಗಿಸಬಹುದು.

3. ಓಂ ತಂತ್ರ

ಧ್ಯಾನದ ಓಂ ತಂತ್ರವು, ಒಬ್ಬನು ತನ್ನ ಆತ್ಮದ ದಿವ್ಯ ಗುಣಗಳನ್ನು ಕಂಡುಕೊಳ್ಳಲು ಮತ್ತು ಬೆಳೆಸಿಕೊಳ್ಳಲು ಏಕಾಗ್ರತೆಯ ಶಕ್ತಿಯನ್ನು ಹೇಗೆ ಉನ್ನತ ರೀತಿಯಲ್ಲಿ ಬಳಸಬೇಕೆಂಬುದನ್ನು ತೋರಿಸುತ್ತದೆ. ಈ ಪುರಾತನ ವಿಧಾನವು, ಇಡೀ ಸೃಷ್ಟಿಯ ಆಧಾರಭೂತವಾಗಿರುವ ಮತ್ತು ಅದನ್ನು ಪೋಷಿಸುವ ಸರ್ವವ್ಯಾಪಿ ಓಂ, ಶಬ್ದ ಅಥವಾ ಪವಿತ್ರಾತ್ಮದ ದಿವ್ಯ ಉಪಸ್ಥಿತಿಯನ್ನು ಹೇಗೆ ಅನುಭವಿಸುವುದು ಎಂಬುದನ್ನು ಕಲಿಸುತ್ತದೆ. ಈ ತಂತ್ರವು ಶರೀರ ಮತ್ತು ಮನಸ್ಸಿನ ಮಿತಿಗಳನ್ನು ಮೀರಿ ಒಬ್ಬರ ಅನಂತ ಸಾಮರ್ಥ್ಯದ ಆನಂದದಾಯಕ ಸಾಕ್ಷಾತ್ಕಾರದತ್ತ ಅರಿವನ್ನು ವಿಸ್ತರಿಸುತ್ತದೆ.

4. ಕ್ರಿಯಾ ಯೋಗ ತಂತ್ರ

ಕ್ರಿಯಾ ಯೋಗವು ಪ್ರಾಣಾಯಾಮದ ಉನ್ನತ ರಾಜಯೋಗ ತಂತ್ರ. ಕ್ರಿಯಾ ಯೋಗವು ಬೆನ್ನುಹುರಿ ಮತ್ತು ಮಿದುಳಿನಲ್ಲಿರುವ ಪ್ರಾಣ ಶಕ್ತಿಯ ಸೂಕ್ಷ್ಮ ಪ್ರವಾಹಗಳನ್ನು ಬಲಪಡಿಸುತ್ತದೆ ಮತ್ತು ಪುನರುಜ್ಜೀವನಗೊಳಿಸುತ್ತದೆ. ಭಾರತದ ಪ್ರಾಚೀನ ದಾರ್ಶನಿಕರು (ಋಷಿಗಳು) ಮಿದುಳು ಮತ್ತು ಬೆನ್ನುಹುರಿಯನ್ನು ಜೀವನದ ವೃಕ್ಷವೆಂದು ಗ್ರಹಿಸಿದರು. ಚೇತನ ಮತ್ತು ಪ್ರಜ್ಞೆಯ ಸೂಕ್ಷ್ಮ ಮಿದುಳು-ಮೇರುದಂಡ ಕೇಂದ್ರಗಳಿಂದ (ಚಕ್ರಗಳು) ಎಲ್ಲಾ ನರಗಳು ಮತ್ತು ದೇಹದ ಪ್ರತಿಯೊಂದು ಅಂಗ ಮತ್ತು ಅಂಗಾಂಶಗಳನ್ನು ಸಚೇತನಗೊಳಿಸುವ ಶಕ್ತಿಗಳು ಹರಿಯುತ್ತವೆ. ಕ್ರಿಯಾ ಯೋಗದ ವಿಶೇಷ ತಂತ್ರದಿಂದ ಬೆನ್ನುಹುರಿಯಲ್ಲಿ ಪ್ರಾಣಪ್ರವಾಹವನ್ನು ಮೇಲಕ್ಕೂ ಕೆಳಕ್ಕೂ ನಿರಂತರವಾಗಿ ಸುತ್ತಿಸುವ ಮೂಲಕ, ಒಬ್ಬರ ಆಧ್ಯಾತ್ಮಿಕ ವಿಕಾಸ ಮತ್ತು ಪರಿಜ್ಞಾನವನ್ನು ಹೆಚ್ಚು ತ್ವರಿತಗೊಳಿಸಲು ಸಾಧ್ಯವಿದೆ ಎಂದು ಯೋಗಿಗಳು ಕಂಡುಹಿಡಿದಿದ್ದಾರೆ.

ಕ್ರಿಯಾ ಯೋಗದ ಸರಿಯಾದ ಅಭ್ಯಾಸವು ಹೃದಯ ಮತ್ತು ಶ್ವಾಸಕೋಶಗಳು ಮತ್ತು ನರಮಂಡಲದ ಸಾಮಾನ್ಯ ಚಟುವಟಿಕೆಗಳನ್ನು ಸ್ವಾಭಾವಿಕವಾಗಿ ನಿಧಾನಗೊಳಿಸುತ್ತದೆ, ಇದು, ಶರೀರ ಮತ್ತು ಮನಸ್ಸಿನಲ್ಲಿ ಆಳವಾದ ಆಂತರಿಕ ನಿಶ್ಚಲತೆಯನ್ನು ಉಂಟುಮಾಡುತ್ತದೆ ಮತ್ತು ಆಲೋಚನೆಗಳು, ಭಾವಾವೇಶಗಳು ಮತ್ತು ಸಂವೇದನಾ ಗ್ರಹಿಕೆಗಳ ಸಾಮಾನ್ಯ ಪ್ರಕ್ಷುಬ್ಧತೆಯಿಂದ ಗಮನವನ್ನು ಮುಕ್ತಗೊಳಿಸುತ್ತದೆ. ಆ ಆಂತರಿಕ ನಿಶ್ಚಲತೆಯ ಸ್ಪಷ್ಟತೆಯಲ್ಲಿ, ಒಬ್ಬನು ತನ್ನ ಆತ್ಮದೊಂದಿಗೆ ಮತ್ತು ಭಗವಂತನೊಂದಿಗೆ ಆಳವಾದ ಆಂತರಿಕ ಶಾಂತಿ ಮತ್ತು ಶ್ರುತಿಗೂಡುವಿಕೆಯನ್ನು ಅನುಭವಿಸುತ್ತಾನೆ.