ಶ್ರೀ ಶ್ರೀ ದಯಾ ಮಾತಾರವರ ಬರಹಗಳಿಂದ ಆಯ್ದ ಭಾಗಗಳು

ಎಲ್ಲರಿಗೂ ಒಡನೆಯೇ ಬೇಕಾಗಿರುವ ಶಾಂತಿ ಮತ್ತು ಸಾಮರಸ್ಯವನ್ನು ಭೌತಿಕ ವಸ್ತುಗಳಿಂದ ಅಥವಾ ಯಾವುದೇ ಬಾಹ್ಯ ಅನುಭವಗಳಿಂದ ಪಡೆಯಲು ಸಾಧ್ಯವಿಲ್ಲ; ಅದು ಸಾಧ್ಯವೇ ಇಲ್ಲ. ಬಹುಶಃ ಸುಂದರವಾದ ಸೂರ್ಯಾಸ್ತವನ್ನು ವೀಕ್ಷಿಸುವುದರಿಂದ ಅಥವಾ ಪರ್ವತಗಳಿಗೆ ಅಥವಾ ಕಡಲತೀರಕ್ಕೆ ಹೋಗುವುದರಿಂದ ನಿಮಗೆ ತಾತ್ಕಾಲಿಕ ಪ್ರಶಾಂತತೆಯ ಅನುಭವವಾಗಬಹುದು. ಆದರೆ ನಿಮ್ಮೊಂದಿಗೇ ನೀವು ಅಸಾಮರಸ್ಯದಿಂದಿದ್ದರೆ, ಅತ್ಯಂತ ಸ್ಫೂರ್ತಿದಾಯಕ ಪರಿಸರವೂ ನಿಮಗೆ ಶಾಂತಿಯನ್ನು ನೀಡುವುದಿಲ್ಲ.

ನಿಮ್ಮ ಜೀವನದ ಬಾಹ್ಯ ಪರಿಸ್ಥಿತಿಗಳಲ್ಲಿ ಸಾಮರಸ್ಯವನ್ನು ತರುವ ರಹಸ್ಯವೆಂದರೆ ನಿಮ್ಮ ಆತ್ಮದೊಂದಿಗೆ ಮತ್ತು ಭಗವಂತನೊಂದಿಗೆ ಆಂತರಿಕ ಸಾಮರಸ್ಯವನ್ನು ಸ್ಥಾಪಿಸುವುದು.

ದೇಶಗಳಲ್ಲಿರುವ ಜನರು ಶಾಂತಿಯಿಂದಿರದಿದ್ದರೆ ದೇಶಗಳ ನಡುವೆ ಶಾಂತಿಯ ಬಗ್ಗೆ ಮಾತನಾಡುವುದು ಅವಾಸ್ತವಿಕವಾಗಿದೆ. ಮತ್ತು ತಮ್ಮೊಂದಿಗೇ ತಾವು ಶಾಂತಿಯಿಂದಿರದಿದ್ದರೆ ಅವರು ತಮ್ಮ ನೆರೆಹೊರೆಯವರೊಂದಿಗೆ ಅಥವಾ ತಮ್ಮ ಮನೆಯ ಜನರೊಂದಿಗೂ ಶಾಂತಿಯಿಂದಿರಲು ಸಾಧ್ಯವಿಲ್ಲ. ಅದು ವ್ಯಕ್ತಿ ಮಟ್ಟದಲ್ಲಿ ಪ್ರಾರಂಭವಾಗಬೇಕು. ಪ್ರಪಂಚದಾದ್ಯಂತದ ನನ್ನ ಪ್ರಯಾಣದಲ್ಲಿ ಪ್ರತಿ ದೇಶದ ಜನರು ನನ್ನನ್ನು ಕೇಳುವ ಮೊದಲ ಪ್ರಶ್ನೆಯೆಂದರೆ, “ನಾನು ಹೇಗೆ ಶಾಂತಿಯನ್ನು ಕಂಡುಕೊಳ್ಳುವುದು?” ನಾನು ಅವರಿಗೆ ಹೇಳುತ್ತೇನೆ: “ಆಂತರ್ಯದಲ್ಲಿರುವ ಭಗವತ್‌ಸಾನ್ನಿಧ್ಯಕ್ಕೆ ಹೋಗುವುದನ್ನು ಬಿಟ್ಟು ಬೇರೆ ಮಾರ್ಗವಿಲ್ಲ.” ಪರಮಹಂಸ ಯೋಗಾನಂದರು ತಂದಂತಹ ಈ ಬೋಧನೆಯ ತಳಹದಿಯಾದ ದೈನಂದಿನ ಧ್ಯಾನವು, ಒತ್ತಡಕ್ಕೊಳಗಾದ ವ್ಯಕ್ತಿಗಳು ಮತ್ತು ಮುರಿದ ಕುಟುಂಬಗಳ ಜೀವನದಲ್ಲಿ ಆಧ್ಯಾತ್ಮಿಕ ಸಮತೋಲನವನ್ನು ಪುನಃಸ್ಥಾಪಿಸುವ ಹಾಗೂ ನಮ್ಮ ವಿಶ್ವ ಕುಟುಂಬದ ದೊಡ್ಡ ಪರಿವಾರದಲ್ಲಿ ಶಾಂತಿ ಮತ್ತು ಸಾಮರಸ್ಯವನ್ನು ಪೋಷಿಸುವ ಮೌಲ್ಯಗಳನ್ನು ಪುನರುತ್ಥಾನಗೊಳಿಸುವ ಮಾರ್ಗವಾಗಿದೆ.

ನಾವು ವಿವೇಚನೆಯ ಕಣ್ಣುಗಳಿಂದ ನಮ್ಮ ಸುತ್ತ ನೋಡಿದರೆ, ಪ್ರಪಂಚದ ಪರಿಸ್ಥಿತಿಗಳು ಮಾನವಕುಲವನ್ನು ಭಗವಂತನೊಂದಿಗೆ ನಿಕಟ ಸಂಬಂಧವನ್ನು ಬೆಳೆಸಿಕೊಳ್ಳುವಂತೆ ಬಲವಂತ ಪಡಿಸಲಿವೆ ಎಂಬುದು ಸ್ಪಷ್ಟವಾಗುತ್ತದೆ. ಕಳೆದ ಶತಮಾನಗಳಲ್ಲಿ ತುಂಬಾ ದೊಡ್ಡದಾಗಿ ತೋರುತ್ತಿದ್ದ ಭೂಮಿಯ ಈ ಗೋಳವು ತುಲನಾತ್ಮಕವಾಗಿ ಹೇಳುವುದಾದರೆ ಕಿತ್ತಳೆ ಹಣ್ಣಿನ ಗಾತ್ರದಷ್ಟಾಗಿದೆ. ಇನ್ನು ಮುಂದೆ ನಾವು ಪ್ರಪಂಚದ ಇತರ ಜನರು ಮತ್ತು ಸಂಸ್ಕೃತಿಗಳಿಂದ ಪ್ರತ್ಯೇಕವಾಗಿ ಯೋಚಿಸಲು ಸಾಧ್ಯವಿಲ್ಲ; ಆಧುನಿಕ ಸಂವಹನಗಳು ಮತ್ತು ಪ್ರಯಾಣದ ವಿಧಾನಗಳು ನಿಜವಾಗಿಯೂ ನಮ್ಮೆಲ್ಲರನ್ನೂ ಮುಖಾಮುಖಿಯಾಗಿ ತಂದಿವೆ, ಅದರಿಂದಾಗಿ, ಒಂದೇ ಮನೆಯ ಸದಸ್ಯರು ಪರಸ್ಪರ ಹೊಂದಿಕೊಂಡು ಹೋಗುವಂತೆಯೇ ನಾವೂ ಕೂಡ ಪರಸ್ಪರ ಅರ್ಥಮಾಡಿಕೊಳ್ಳಲು ಮತ್ತು ಬೆರೆಯಲು ಆಧ್ಯಾತ್ಮಿಕ ಪರಿಪಕ್ವತೆಯನ್ನು ಬೆಳೆಸಿಕೊಳ್ಳಲೇಬೇಕಾಗಿದೆ. ಮಾನುಷ ಸ್ವಭಾವದ ಎರಡು ದೊಡ್ಡ ದೌರ್ಬಲ್ಯಗಳಾದ ಪೂರ್ವಾಗ್ರಹಗಳು ಮತ್ತು ಸಂಕುಚಿತ-ಮನಸ್ಸುಗಳು ಹೋಗಬೇಕಾಗಿದೆ…

ಹಿಂದೆಂದಿಗಿಂತಲೂ ಈಗ ನಾವು ಸತ್ಯವನ್ನು ಒಪ್ಪಿಕೊಳ್ಳಬೇಕು: ಇದು ಒಂದು ಅವಿಭಕ್ತ ಜಗತ್ತು. ಇದು ಬಹುವಿಧದ ಬಾಹ್ಯ ರೂಪಗಳು, ಮನಸ್ಥಿತಿಗಳು, ಆಸಕ್ತಿಗಳು ಮತ್ತು ಪ್ರೇರಣೆಗಳಿರುವ ಎಲ್ಲಾ ವಿಭಿನ್ನ ರೀತಿಯ ಜನರಿಂದ ಕೂಡಿದೆ. ಆದರೆ ಮಾನುಷ ಪ್ರತ್ಯೇಕತೆಯ ಈ ಅಂತ್ಯವಿಲ್ಲದ ವೈವಿಧ್ಯಮಯ ಪುಷ್ಪಗಳನ್ನು ಒಂದುಗೂಡಿಸುವ ಒಂದು ಮೂಲಭೂತ ತತ್ವವಿದೆ, ಅದು ನಮ್ಮೆಲ್ಲರನ್ನು ಹಾರದಂತೆ ಪೋಣಿಸುತ್ತದೆ – ಅದೇ ಭಗವಂತ. ಅವನ ದೃಷ್ಟಿಯಲ್ಲಿ ಯಾರೂ ಹೆಚ್ಚಲ್ಲ, ಯಾರೂ ಕಡಿಮೆಯಲ್ಲ; ನಾವೆಲ್ಲರೂ ಅವನ ಮಕ್ಕಳು. ನಾವು ಎಲ್ಲಿ ಜನಿಸಿದೆವು, ಯಾವ ಧರ್ಮವನ್ನು ಅನುಸರಿಸುತ್ತೇವೆ ಅಥವಾ ನಮ್ಮ ಚರ್ಮದ ಬಣ್ಣ ಯಾವುದು ಎಂಬುದರ ಬಗ್ಗೆ ಭಗವಂತನಿಗೆ ಒಂದಿನಿತೂ ಆಸಕ್ತಿಯಿಲ್ಲ – ನಮ್ಮ ಆತ್ಮಗಳು ಕೆಂಪು, ಕಪ್ಪು, ಹಳದಿ ಅಥವಾ ಬಿಳಿ ಉಡುಗೆಯನ್ನು ಧರಿಸಿದರೇನಂತೆ? ಅವನಿಗೆ ಅದರ ಬಗ್ಗೆ ಚಿಂತೆಯಿಲ್ಲ. ಆದರೆ ನಾವು ಹೇಗೆ ವರ್ತಿಸುತ್ತೇವೆ ಎಂಬುದರ ಬಗ್ಗೆ ಅವನಿಗೆ ಕಾಳಜಿಯಿದೆ. ಅದೇ, ಅವನು ತನ್ನ ಮಕ್ಕಳ ಗುಣ ಪರೀಕ್ಷೆ ಮಾಡುವ ಏಕೈಕ ಮಾನದಂಡವಾಗಿದೆ. ನಾವು ಪೂರ್ವಾಗ್ರಹಗಳಿಂದ ತುಂಬಿದ್ದರೆ, ಪೂರ್ವಾಗ್ರಹಗಳನ್ನೇ ಅನುಭವಿಸುತ್ತೇವೆ. ನಾವು ದ್ವೇಷದಿಂದ ತುಂಬಿಕೊಂಡಿದ್ದರೆ, ದ್ವೇಷವನ್ನೇ ಅನುಭವಿಸುತ್ತೇವೆ. ನಾವು ಯಾವುದೇ ಸಮುದಾಯದ ಜನರ ಬಗ್ಗೆ ಅಸಮಾಧಾನದಿಂದ ತುಂಬಿಕೊಂಡಿದ್ದರೆ, ನಾವು ವೈರತ್ವದ ಬೀಜಗಳನ್ನು ಬಿತ್ತುತ್ತಿರುತ್ತೇವೆ ಎಂಬುದು ಖಚಿತ, ಅದನ್ನು ಒಂದಲ್ಲ ಒಂದು ದಿನ ನಾವೇ ಅನುಭವಿಸಬೇಕು…

ವಿವಿಧ ನಂಬಿಕೆಗಳು ಮತ್ತು ಆಚರಣೆಗಳ ಹಿಂದೆ, ಎಲ್ಲಾ ಧರ್ಮಗಳಿಗೆ ಸಾಮಾನ್ಯವಾದ ಆಧ್ಯಾತ್ಮಿಕ ಪರಿಕಲ್ಪನೆಗಳಿವೆ… ಪರಮಹಂಸಜಿಯವರು ಸದಾ ಈ ಸಾರ್ವತ್ರಿಕ, ಮೂಲಭೂತ ಸತ್ಯಗಳತ್ತ ಭಕ್ತರ ಗಮನವನ್ನು ಸೆಳೆಯಲು ಪ್ರಯತ್ನಿಸಿದರು – ಕೇವಲ ನಂಬಿಕೆ ಮತ್ತು ಉಪನ್ಯಾಸಕ್ಕಾಗಿ ಮಾತ್ರವಲ್ಲ, ಆದರೆ ಭಕ್ತರ ದೈನಂದಿನ ಜೀವನದಲ್ಲಿ ಅನುಷ್ಠಾನ ಮಾಡುವಂತಹ ಪ್ರಾಯೋಗಿಕ ಅಗತ್ಯತೆಗಾಗಿ. ಇವುಗಳಲ್ಲಿ ಅತ್ಯಂತ ಪ್ರಮುಖವಾದವುಗಳೆಂದರೆ —ಯುಗಯುಗಗಳಿಂದ ಮನುಕುಲದ ರಕ್ಷಕರಿಂದ ಬೋಧಿಸಲ್ಪಟ್ಟುದು —ಅದುವೇ ಪ್ರತಿಯೊಬ್ಬ ವ್ಯಕ್ತಿಯೂ ಭಗವಂತನೊಂದಿಗೆ ನೇರವಾದ, ವೈಯಕ್ತಿಕ ಸಂಸರ್ಗವನ್ನು ಹೊಂದುವುದು—…

ಆ ಪ್ರಜ್ಞೆಯಲ್ಲಿ ನೆಲೆಸಲು ಮತ್ತು ನಮ್ಮ ನೈಜ ಸ್ವರೂಪವನ್ನು ಮರೆಯದಿರಲು ನಾವು ದೈನಂದಿನ ಧ್ಯಾನದಿಂದ ಹೆಚ್ಚು ಹೆಚ್ಚು ಶ್ರಮಿಸಿದಷ್ಟೂ, ಕ್ರಿಸ್ತನಲ್ಲಿರುವ ಮತ್ತು ನಮ್ಮ ಪ್ರತಿಯೊಬ್ಬರಲ್ಲಿರುವ ಆ ದೈವತ್ವವನ್ನು ನಾವು ಹೆಚ್ಚು ಹೆಚ್ಚು ವ್ಯಕ್ತಪಡಿಸುತ್ತೇವೆ. ಇದು ಆತ್ಮ-ಸಾಕ್ಷಾತ್ಕಾರದ ಸಂದೇಶವಾಗಿದೆ. ಇದು ಭಾರತವು ಒಪ್ಪಿಕೊಳ್ಳಬಹುದಾದ, ಕ್ರಿಶ್ಚಿಯನ್ನರು ಸ್ವೀಕರಿಸಬಹುದಾದ, ಎಲ್ಲಾ ಧರ್ಮದವರೂ ಸ್ವೀಕರಿಸಬಹುದಾದ ಸಂದೇಶವಾಗಿದೆ. ಇದು ಯಾವುದೇ ಧರ್ಮದ ಬೋಧನೆಗೆ ವಿರುದ್ಧವಾಗಿ ಹೋಗುವುದಿಲ್ಲ.

ಆಲೋಚನೆಗೆ ಅಗಾಧವಾದ ಶಕ್ತಿಯಿದೆ. ಆಲೋಚನೆಯಿಂದ ಎಲ್ಲಾ ಕ್ರಿಯೆಗಳು ಹುಟ್ಟಿಕೊಳ್ಳುತ್ತವೆ. ಈ ಸೀಮಿತ ಪ್ರಪಂಚದಲ್ಲಿ ಎಲ್ಲವೂ ಆಲೋಚನೆಯ ಫಲವೇ ಆಗಿವೆ. ಜೀವಿಗಳು, ಸಮುದಾಯಗಳು ಮತ್ತು ರಾಷ್ಟ್ರಗಳ ಮೇಲೆ ಪರಿಣಾಮ ಬೀರುವ ಸಾಮರ್ಥ್ಯವಿರುವ ಇದು ವಿಶ್ವದಲ್ಲಿಯೇ ಅತ್ಯಂತ ಪ್ರಬಲ ಶಕ್ತಿಯಾಗಿದೆ. ಆದ್ದರಿಂದಲೇ, ನಮ್ಮ ಆಲೋಚನೆಗಳು ನಕಾರಾತ್ಮಕವಾಗಿರುವುದಕ್ಕಿಂತ ಸಕಾರಾತ್ಮಕವಾಗಿರುವುದು ಅಷ್ಟು ಮುಖ್ಯ. ಇಂದು ನಕಾರಾತ್ಮಕವಾಗಿ ಯೋಚಿಸುವ ಮತ್ತು ವರ್ತಿಸುವ ಲಕ್ಷಾಂತರ ಜನರಿದ್ದಾರೆ. ಆದ್ದರಿಂದ ನಾವೆಲ್ಲರೂ ನಮ್ಮ ಸಹ ಜೀವಿಗಳಿಗಾಗಿ ಪ್ರಾರ್ಥಿಸುವ ಸಲುವಾಗಿ ಸಕ್ರಿಯವಾಗಿ ಪಾಲ್ಗೊಳ್ಳುವುದರಲ್ಲಿ ನಮ್ಮ ಮತ್ತು ಇಡೀ ಜಗತ್ತಿನ ಹಿತಾಸಕ್ತಿಯಡಗಿದೆ. ಸಾಕಷ್ಟು ಆತ್ಮಗಳು ಭಾಗವಹಿಸಿದಾಗ, ಒಳ್ಳೆಯತನ, ಪ್ರೀತಿ, ಸಹಾನುಭೂತಿ ಮತ್ತು ಸಕಾರಾತ್ಮಕ ನಡವಳಿಕೆಯ ಅವರೆಲ್ಲರ ಸಂಯೋಜಿತ ಚಿಂತನಾ-ಸ್ಪಂದನಗಳು ಪ್ರಬಲವಾದ ಶಕ್ತಿಯನ್ನು ಉಂಟುಮಾಡುತ್ತವೆ, ಅದು ಪ್ರಪಂಚದಾದ್ಯಂತ ಜನರ ಜೀವನವನ್ನು ಬದಲಾಯಿಸುವ ಶಕ್ತಿಯನ್ನು ಹೊಂದಿದೆ.