“ಪರಮಹಂಸ ಯೋಗಾನಂದರು ಪ್ರಪಂಚಕ್ಕೆ ತಂದಿರುವ 6 ಕ್ರಾಂತಿಕಾರಿ ಆಧ್ಯಾತ್ಮಿಕ ಯೋಜನೆಗಳು” ಸ್ವಾಮಿ ಚಿದಾನಂದ ಗಿರಿಯವರಿಂದ

1. ನೈತಿಕ ಮತ್ತು ಆಧ್ಯಾತ್ಮಿಕ ಅರ್ಥವನ್ನು ಹೆಚ್ಚು ಹೆಚ್ಚು ಕಳೆದುಕೊಳ್ಳುತ್ತಿರುವ ಆಧುನಿಕ ನಾಗರಿಕತೆಗೆ ಜೀವನದ ದಿವ್ಯ ಉದ್ದೇಶವನ್ನು ತಿಳಿಸಿ ಹೇಳುವ ವಿಶ್ವ ದೃಷ್ಟಿಕೋನ. ಯೋಗಾನಂದಜಿಯವರು ಭಾರತದ ಪ್ರಾಚೀನ ಸನಾತನ ಧರ್ಮವನ್ನು (“ಸತ್ಯದ ಶಾಶ್ವತ ತತ್ವಗಳು”) ಅರ್ಥವಾಗುವಂತೆ, ನಂಬುವಂತೆ ಹಾಗೂ ಎಲ್ಲಕ್ಕಿಂತ ಮಿಗಿಲಾಗಿ ಆಧುನಿಕ ಯುಗದ ಪುರುಷ ಹಾಗೂ ಸ್ತ್ರೀಯರಿಗೆ ಸುಸಂಗತವಾಗುವಂತೆ ಪುನರಾವರ್ತಿಸಿದರು. ಹಾಗೆ ಮಾಡುವುದರ ಮೂಲಕ, ಅವರು ಹಲವಾರು ವಿಚಾರಗಳು ಮತ್ತು ಅಭ್ಯಾಸಗಳನ್ನು ಜಗತ್ತಿಗೆ ಪರಿಚಯಿಸಿದರು, ಅಂದಿನಿಂದ ಅವು ಸಾರ್ವಜನಿಕರ ಮನಸ್ಸಿನಲ್ಲಿ ಮನೋವಿಜ್ಞಾನ, ಧರ್ಮ, ವೈದ್ಯಕೀಯ, ಶಿಕ್ಷಣ ಮತ್ತು ಸಮಯ ಸರಿದಂತೆ ಇನ್ನೂ ಹೆಚ್ಚು ಹೆಚ್ಚು ವಿಷಯಗಳ ಅತ್ಯಾಧುನಿಕ ವಿಚಾರಗಳೊಂದಿಗೆ ಸೇರಿಹೋಗಿವೆ. ಅವರು ಅಷ್ಟನ್ನೇ ತಂದಿದ್ದರೂ, ಅದು ಮಹತ್ವಪೂರ್ಣದ್ದಾಗಿರುತ್ತಿತ್ತು. ಆದರೆ ಪಟ್ಟಿ ಉದ್ದವಾಗಿದೆ.

2. ಆಧುನಿಕ ಪುರುಷರು ಮತ್ತು ಮಹಿಳೆಯರಿಗೆ ಸ್ನೇಹಪರನೂ, ಪ್ರಸ್ತುತನೂ ಮತ್ತು ಅಪೇಕ್ಷಣೀಯನೂ ಆಗಿರುವಂತಹ ಭಗವಂತನ ಒಂದು ಪರಿಕಲ್ಪನೆ. ಪಾಶ್ಚಿಮಾತ್ಯ ದೇಶಗಳಲ್ಲಿ ಅನೇಕರಿಗೆ ಒಗ್ಗಿಹೋಗಿರುವ, ಭಗವಂತನೊಬ್ಬ ಪ್ರತೀಕಾರವುಳ್ಳ ನ್ಯಾಯಾಧಿಪತಿ ಎಂಬ ತಪ್ಪು ಕಲ್ಪನೆಯನ್ನು ಪರಮಹಂಸಜಿ ಸಂಪೂರ್ಣವಾಗಿ ತಳ್ಳಿಹಾಕಿದರು. ಬದಲಾಗಿ, ಭಗವಂತನ ಪ್ರಕೃತಿಯೇ ನಿತ್ಯ ನೂತನ ಆನಂದ; ಹಾಗೂ ಭಗವಂತನ ಪ್ರತಿರೂಪದಲ್ಲಿ ಸೃಷ್ಟಿಸಲ್ಪಟ್ಟ ಮಾನವರು, ಅವನನ್ನು ತಂದೆ, ತಾಯಿ, ಸಖ, ಪ್ರಿಯದೇವ, ಅಥವಾ ಪರಮಾತ್ಮನ ಪ್ರಕಟಿತ ಗುಣಗಳಾದ ಅನಂತ ಆನಂದ, ಜ್ಞಾನ, ಬೆಳಕು, ಶಾಂತಿ ಮತ್ತು ಪ್ರೇಮದ ರೂಪದಲ್ಲಿ ಅರಿಯಬಹುದು ಎಂದು ಬೋಧಿಸಿದರು.

ಇದು ಪ್ರಪಂಚದ ಅನೇಕ ಭಾಗಗಳಲ್ಲಿ ಬೆಳೆದು ಬೇರೂರಿದ್ದ ಭಗವಂತನ ಪರಿಕಲ್ಪನೆಗೆ ಕ್ರಾಂತಿಕಾರಕ ಬದಲಾವಣೆಯಾಗಿತ್ತು. ಆದ್ದರಿಂದ, ನಿಮ್ಮ ಈ ಹಿಂದಿನ ಧಾರ್ಮಿಕ ಶಿಕ್ಷಣದಿಂದಾಗಿ “ಭಗವಂತ” ಎಂಬ ಪದದ ಬಗ್ಗೆ ಅಭ್ಯಂತರವಿರುವವರಲ್ಲಿ ನೀವೂ ಒಬ್ಬರಾಗಿದ್ದರೆ, ನೀವು ಪರಮಹಂಸಜಿಯವರ ವೈಎಸ್‌ಎಸ್‌ ಪಾಠಗಳಿಗೆ ಪರಿಚಯ ಒದಗಿಸುವ: “ಹೈಯೆಸ್ಟ್‌ ಅಚೀವ್‌ಮೆಂಟ್ಸ್ ತ್ರೂ ಸೆಲ್ಫ್‌ ರಿಯಲೈಝೇಷನ್‌‌” (ಆತ್ಮ-ಸಾಕ್ಷಾತ್ಕಾರದ ಮೂಲಕ ಅತ್ಯುನ್ನತ ಸಾಧನೆಗಳು) ಇದನ್ನು ಓದಿ ನಿಮಗೆ ನೀವೇ ಉಪಕಾರ ಮಾಡಿಕೊಳ್ಳಿ. ಅದರಲ್ಲಿ “ಭಗವಂತ ಎಂದರೆ ಏನು?” ಎಂಬ ಬಗ್ಗೆ ಒಂದು ಸಂಪೂರ್ಣ ವಿಭಾಗವೇ ಇದೆ. ಅದು ನಿಮಗೆ ಭಿನ್ನ ಸ್ವರೂಪದ ಚಿತ್ರಣವನ್ನು ಕೊಡುತ್ತದೆ ಎಂದು ನಾನು ಭಾವಿಸುತ್ತೇನೆ.

3. ಹಂತ ಹಂತವಾದ ಸೂಚನೆಗಳು, ಅವುಗಳ ಅಭ್ಯಾಸದಿಂದ ಯಾವುದೇ ವ್ಯಕ್ತಿ ಭಗವತ್‌ಸಾಕ್ಷಾತ್ಕಾರದ ಸ್ಥಿತಿಯನ್ನು ಸಾಧಿಸಬಹುದು.

4. ಅವಶ್ಯಕವಾಗಿ ಮಾನವಕುಲದ ಹಾಗೂ ಎಲ್ಲಾ ನಿಜ ಧರ್ಮಗಳ ಒಗ್ಗೂಡಿಕೆಯ ದೂರದೃಷ್ಟಿ. ಒಮ್ಮೆ ಪರಮಹಂಸ ಯೋಗಾನಂದರು ಬಹು ಸುಂದರವಾಗಿ ಹೀಗೆ ಹೇಳಿದರು: “ಯೇಸುಕ್ರಿಸ್ತ ಅಥವಾ ಶ್ರೀಕೃಷ್ಣ ಅಥವಾ ಪ್ರಾಚೀನ ಕಾಲದ ಋಷಿಗಳು ಯಾವುದೇ ವ್ಯಕ್ತಿಯನ್ನು ಕ್ರಿಶ್ಚಿಯನ್, ಹಿಂದೂ, ಯಹೂದಿ, ಇತ್ಯಾದಿ ಎಂದು ಕರೆಯುವುದನ್ನು ನಾನು ಊಹಿಸಲು ಸಾಧ್ಯವಿಲ್ಲ. ಅವರು ಪ್ರತಿಯೊಬ್ಬ ಮಾನವನನ್ನೂ ‘ನನ್ನ ಸಹೋದರ’ ಎಂದು ಕರೆಯುವುದನ್ನು ಊಹಿಸಬಲ್ಲೆ.”

ಅದು ಸುಂದರವಲ್ಲವೇ? ಪರಮಹಂಸಜಿಯವರು ಎಲ್ಲಾ ನಿಜವಾದ ಆಧ್ಯಾತ್ಮಿಕ ಮಾರ್ಗಗಳ ಏಕತೆಯನ್ನು ನಮಗೆ ನಾವೇ ಅರಿತುಕೊಳ್ಳುವ — ಹಾಗೂ ನಂತರ ಇಡೀ ಮನುಕುಲಕ್ಕೆ ಆ ಅರಿವನ್ನು ಹರಡುವ ದೃಷ್ಟಿ ಮತ್ತು ಸಾಧ್ಯತೆಯನ್ನು ನಮಗೆ ತಂದರು. ಕ್ರೈಸ್ತ ಧರ್ಮ ಹಾಗೂ ಹಿಂದೂ ಧರ್ಮಗಳ ಮುಖ್ಯ ಗ್ರಂಥಗಳ ಅಭೂತಪೂರ್ವ ವ್ಯಾಖ್ಯಾನಗಳನ್ನು ಬರೆಯುವ ಮೂಲಕ, ಈ ಮಾರ್ಗಗಳು ಸಮಾನವಾದ ವೈಜ್ಞಾನಿಕ ತಳಪಾಯವನ್ನು ಹೊಂದಿವೆ ಎಂದು ತೋರಿಸಿದರು — ಧ್ಯಾನದ ನಿರ್ದಿಷ್ಟ ತಂತ್ರಗಳ ಅಭ್ಯಾಸ, ಅದು ಎಲ್ಲಾ ಧರ್ಮಗಳಲ್ಲಿ, ಎಲ್ಲಾ ಮಾನವರಲ್ಲಿ, ಇಡೀ ಸೃಷ್ಟಿಯಲ್ಲಿ ಅಂತರ್ಗತವಾದ ಏಕೈಕ ಸತ್ಯದ ನೇರ ವೈಯಕ್ತಿಕ ಅನುಭವವನ್ನು ಹೊಂದುವಂತೆ ಮಾಡುತ್ತದೆ.

ಪರಮಹಂಸಜಿಯವರು ತಂದದ್ದರ ಹಿರಿಮೆಯ ಒಂದು ಮಿನುಗು ನೋಟವಾದರೂ ನಿಮಗೆ ಕಾಣಲಾರಂಭಿಸಿತೆ? ನಿಜವಾಗಿಯೂ ಯುಗ-ಪ್ರವರ್ತಕ — ಪ್ರಪಂಚದಾದ್ಯಂತ ಹರಡಲು ತಮಗೆ ವಹಿಸಲಾದ ಬೋಧನೆಗಳನ್ನು ವಿವರಿಸಲು ಅವರು ಬಳಸುತ್ತಿದ್ದುದು ಇದೇ ಶಬ್ದವನ್ನು.

5. “ಬದುಕುವುದು-ಹೇಗೆ” ದೇಹ, ಮನಸ್ಸು ಹಾಗೂ ಆತ್ಮದ ಸಮಾನವಾದ ಅಭಿವೃದ್ಧಿಗೆ ಒಂದು ಸಂಪೂರ್ಣ ಕಾರ್ಯಕ್ರಮ. ಪರಮಹಂಸಜಿಯವರ 70 ವರ್ಷಗಳ ಹಿಂದಿನ ಬರಹಗಳು, ಭಾಷಣಗಳು ಮತ್ತು ಉಪನ್ಯಾಸಗಳಿಂದ ಸಂಕಲಿಸಲಾದ ಯೋಗದಾ ಸತ್ಸಂಗ ಪಾಠಗಳನ್ನು, ಓದುವಾಗ, ಅವರು ಎಷ್ಟು ದೂರದೃಷ್ಟಿಯುಳ್ಳವರಾಗಿದ್ದರು ಎಂಬುದನ್ನು ನೀವು ಕಾಣುತ್ತೀರಿ.

ಅವರು ಏನನ್ನು ತಂದರೋ ಅದು, ಮಾನವನ ಯೋಗಕ್ಷೇಮದ ವೈಜ್ಞಾನಿಕ ಆಧಾರವೆಂದು ಈಗ ಪ್ರತಿಪಾದಿಸಲಾಗುತ್ತಿರುವ ಸಮತೋಲಿತ ಅಥವಾ ಸಮಗ್ರ ಜೀವನಶೈಲಿಯ ಅಗತ್ಯ ಅಂಶಗಳನ್ನು ಜಗತ್ತಿಗೆ ಪರಿಚಯಿಸಲು ನಿಜವಾಗಿಯೂ ಸಹಾಯ ಮಾಡಿತು.

6. ಗುರು-ಶಿಷ್ಯ ಸಂಬಂಧವನ್ನು ನಿಜವಾಗಿ ಅರ್ಥಮಾಡಿಕೊಳ್ಳುವುದು. ಅನಾದಿ ಕಾಲದಿಂದಲೂ, ಭಗವಂತನನ್ನು ಪ್ರಾಮಾಣಿಕವಾಗಿ ಅರಸುವವರು — ಸತ್ಯವನ್ನು ಪ್ರಾಮಾಣಿಕವಾಗಿ ಅರಸುವವರು — ಗುರು-ಶಿಷ್ಯ ಸಂಬಂಧದ ಮೂಲಕವೇ ದೈವ ಸಾಕ್ಷಾತ್ಕಾರದ ಹಾದಿಯಲ್ಲಿ ಮುನ್ನಡೆಯುತ್ತಾರೆ. ಆದರೂ ಆ ಸಂಬಂಧದ ನಿಜವಾದ ಅರ್ಥ ಕಳೆದುಹೋಗಿದೆ ಹಾಗೂ ಇತ್ತೀಚಿನ ಶತಮಾನಗಳಲ್ಲಿ ಅವನತಿ ಹೊಂದಿದೆ. ಆದರೆ ನಮ್ಮ ಗುರು ತಮ್ಮ ಜೀವನದಲ್ಲಿ ತೋರಿಸಿಕೊಟ್ಟ, ಹಾಗೂ ತಮ್ಮ ಸಮೀಪವರ್ತಿಗಳಿಗೆ ಮತ್ತು ಅವರ ಮೂಲಕ ನಮಗೆಲ್ಲರಿಗೂ ಕೊಟ್ಟ ತರಬೇತಿಯಿಂದ, ಆ ಪವಿತ್ರ ಗುರು-ಶಿಷ್ಯ ಸಂಬಂಧದ ನಿಜವಾದ ಅರ್ಥವನ್ನು ಪುನಃ ಪ್ರಪಂಚಕ್ಕೆ ಕೊಟ್ಟಿರುವುದನ್ನು ನಾವು ಕಾಣುತ್ತೇವೆ.

ಹಾಗಾಗಿ, ನಮ್ಮೆಲ್ಲರ ಪ್ರಯೋಜನಕ್ಕಾಗಿ ಅವರು ತಂದ ಪ್ರಮುಖ ಅಂಶಗಳಲ್ಲಿ ಇವು ಕೇವಲ ಕೆಲವಷ್ಟೆ. ಇವುಗಳನ್ನು ನಾನು ಉಲ್ಲೇಖಿಸುವ ಕಾರಣ, ಇವು ಪ್ರಪಂಚಕ್ಕೆ ನಿಖರವಾಗಿ ಏನು ಅಗತ್ಯವಿದೆಯೋ ಅದನ್ನೇ ಚರಿತ್ರೆಯ ಈ ಕ್ಷಣದಲ್ಲಿ ಹೇಳುತ್ತಿವೆ — ಕೇವಲ ಲಕ್ಷಣಗಳನ್ನಲ್ಲ ಆದರೆ ನಾವು ಎದುರಿಸುತ್ತಿರವ ಸಮಸ್ಯೆಗಳ ಮೂಲ ಕಾರಣಗಳನ್ನು….