“ದೇವರೆಡೆಗೆ ಒಯ್ಯುವ ವೈಜ್ಞಾನಿಕ ಹೆದ್ದಾರಿ” ಪರಮಹಂಸ ಯೋಗಾನಂದರಿಂದ

ಎಲ್ಲಾ ಮಹಾ ಧರ್ಮಗಳ ಉಪದೇಶಗಳು ದೇವರತ್ತ ಕರೆದೊಯ್ಯುತ್ತವೆ; ಆದರೆ ಅವುಗಳ ವಿಭಿನ್ನ ಬಾಹ್ಯ ಆಚರಣೆಗಳು ತಾತ್ಕಾಲಿಕ ಕಿರುದಾರಿಗಳಾಗಿದ್ದು ಅವು ಕೊನೆಗೂ ಧ್ಯಾನದ ಆಂತರಿಕ ಹೆದ್ದಾರಿಯೊಂದರತ್ತ, ಒಬ್ಬ ಅನ್ವೇಷಕನನ್ನು ನಿಸ್ಸಂದೇಹವಾಗಿ ಒಯ್ಯುತ್ತವೆ.

ಪ್ರಜ್ಞೆಯನ್ನು ದೇಹದಿಂದ ಮತ್ತು ಸೀಮಿತ ಜಗತ್ತಿನಿಂದ ಹಿಂಪಡೆದು ಅದನ್ನು ದಿವ್ಯದಲ್ಲಿ ಲೀನಗೊಳಿಸುವದೇ ದೇವರಲ್ಲಿ ವಿಮೋಚನೆಗೊಳ್ಳಲು ಏಕಮಾತ್ರ ಮಾರ್ಗವಾಗಿದೆ. ಯೇಸು ಧ್ಯಾನ ಮಾಡಿದರು. ಜನಸಮೂಹಗಳಿಗೆ ಅವರು ನೈತಿಕ ಹಾಗೂ ಆಧ್ಯಾತ್ಮಿಕ ಸತ್ಯಗಳಾದ — ದೇವರತ್ತ ಒಯ್ಯುವ ಅತ್ಯಗತ್ಯ ಪ್ರಾರಂಭಿಕ ಹೆಜ್ಜೆಗಳು ಎಂಬುದರ ಬಗ್ಗೆ ಬೋಧಿಸಿದರು. ಆದರೆ ತನ್ನ ನಿಕಟ ಶಿಷ್ಯರಿಗೆ ಮಾತ್ರ ಅವರು ದೇವರೊಂದಿಗೆ ನಿಜವಾದ ಏಕತ್ವವನ್ನು ಸಾಧಿಸುವ ಮಾರ್ಗವಾದ ಧ್ಯಾನದ ಉನ್ನತ ವಿಜ್ಞಾನವನ್ನು ಬೋಧಿಸಿದರು.

ಧ್ಯಾನದ ತಂತ್ರ ಮಾತ್ರ ನಿಮಗೆ ಮುಕ್ತಿಯನ್ನು ತಂದು ಕೊಡದು; ನಿಮ್ಮ ವ್ಯಕ್ತಿತ್ವ ಶಕ್ತಿಶಾಲಿ ಮತ್ತು ಶುದ್ಧವಾಗಿರಬೇಕು. ನಿಮ್ಮ ಸಂಪೂರ್ಣ ಜೀವನ ಮತ್ತು ನಡವಳಿಕೆ ಸತ್ಯದ ನಿಬಂಧನೆಗಳೊಂದಿಗೆ ಸಮ್ಮತವಾಗಿರಬೇಕು. ಧ್ಯಾನಯೋಗದ ಮಾರ್ಗದಲ್ಲಿ ಪ್ರಥಮ ನಿಯಮಗಳು ಯಮ ಮತ್ತು ನಿಯಮ — ನೀವು ಮಾಡಬಾರಾದ ಕೆಲವು ನಿಯಮಗಳು, ದಶ ಆಜ್ಞೆಗಳಂತೆ (“ನೀನು ಕೊಲ್ಲಬಾರದು,” “ನೀನು ಸುಳ್ಳು ಸಾಕ್ಷ್ಯ ನೀಡಬಾರದು,” “ನೀನು ವ್ಯಭಿಚಾರ ಮಾಡಬಾರದು” ಇತ್ಯಾದಿ); ಹಾಗೆಯೇ ನೀವು ಪಾಲಿಸಬೇಕಾದ ಧನಾತ್ಮಕ ನಿಯಮಗಳಾದ: ಶುದ್ಧತೆ, ಸಮಭಾವತೆಯ ತೃಪ್ತಿ, ಆತ್ಮಪರಿಶೀಲನೆ (ಸ್ವ ಅಧ್ಯಯನ), ದೇವರಲ್ಲಿ ಭಕ್ತಿ, ಮತ್ತು ಸ್ವ ನಿಯಂತ್ರಣ.

ಧ್ಯಾನದಲ್ಲಿ ಪ್ರಗತಿ ಸಾಧಿಸಬೇಕೆಂದರೆ, ನೀವು ದುರಹಂಕಾರ, ಕೋಪ, ಲಾಲಸೆ, ಮತ್ತು ಅಸೂಯೆಗಳಿಂದ ನಿಮ್ಮನ್ನು ಮುಕ್ತಗೊಳಿಸಲು ಶ್ರಮಿಸಬೇಕು. ಇತರರೊಂದಿಗೆ ಅಪ್ರಾಮಾಣಿಕರಾಗಬಾರದು; ನಿಮಗೆ ಪ್ರಮಾಣಿಕವಾಗಿ ಸತ್ಯವೆಂದೆನಿಸದ ಮಾತುಗಳನ್ನಾಡಬಾರದು. ಸ್ವಾರ್ಥಪೂರ್ವಕವಾಗಿ ಯಾರಿಂದಲೂ ಏನನ್ನೂ ನಿರೀಕ್ಷಿಸಬೇಡಿ; ನೀವು ಯಾವುದೇ ನಿರೀಕ್ಷೆಗಳಿಲ್ಲದವರಾದರೆ, ಜನರು ನಿಮ್ಮಿಂದ ಏನನ್ನು ಕಸಿದುಕೊಳ್ಳಲು ಸಾಧ್ಯ? ನನಗೆ ದೇವರ ಹೊರತು ಬೇರೆ ಯಾವ ಆಸೆಯೂ ಇಲ್ಲದ ಕಾರಣದಿಂದ ಯಾರೂ ನನ್ನನ್ನು ನೋಯಿಸಲಾರರು. ನನಗೆ ಯಾರ ಮೇಲೂ ಕೋಪವಿಲ್ಲ; ಯಾರ ಕೋಪದ ಪ್ರದರ್ಶನವೂ ನನ್ನನ್ನು ಪ್ರತಿಕ್ರಿಯಿಸುವಂತೆ ಮಾಡಲಾರದು. ಆದ್ದರಿಂದ, ಶಾಂತಿಯುತವಾಗಿ, ಆತ್ಮನಿಯಂತ್ರಣದೊಂದಿಗೆ, ಮತ್ತು ಪ್ರಾಮಾಣಿಕತೆಯೊಂದಿಗೆ ಬದುಕಲು ಯತ್ನಿಸಿ. ಇಲ್ಲವಾದರೆ, ತಪ್ಪಾದ ನಡವಳಿಕೆ ಧ್ಯಾನದ ಪವಿತ್ರ ಫಲಿತಾಂಶಗಳನ್ನು ಇಲ್ಲದಂತೆ ಮಾಡುತ್ತದೆ.

ನೀವು ಯೋಚಿಸುವ ಪ್ರತಿಯೊಂದು ಆಧ್ಯಾತ್ಮಿಕ ಚಿಂತನೆಯೂ ನಿಮ್ಮ ಶಾಶ್ವತ ಸ್ನೇಹಿತನಾಗಿರುತ್ತದೆ. ಆದರೆ ನೀವು ಗಳಿಸುವ ಪ್ರತಿಯೊಂದು ಕೆಟ್ಟ ವೃತ್ತಿಯೂ ನಿಮ್ಮ ದೀರ್ಘಕಾಲದ ಶತ್ರುವಾಗಿರುತ್ತದೆ; ನೀವು ಅದನ್ನು ನಿರ್ಮೂಲನ ಮಾಡುವವರೆಗೆ ಅದು ನಿಮ್ಮ ಹಿಂದೆ ಬಂದುಬಂದು ಕಾಡುತ್ತದೆ. ಇದನ್ನು ನೆನಪಿಟ್ಟುಕೊಳ್ಳಿ. ನಾನು ನಿಮಗೆ ಹಂತ-ಹಂತವಾಗಿ ನಿಮ್ಮನ್ನು ದೇವರತ್ತ ಒಯ್ಯುವ ಮಾರ್ಗಗಳನ್ನು ತೋರಿಸುತ್ತಿದ್ದೇನೆ. ಮೊದಲನೆಯದಾಗಿ, ತಪ್ಪಾದ ಚಿಂತನೆಯು ಮತ್ತು ದುಷ್ಚಟಗಳಿಂದ ನಿಮ್ಮನ್ನು ಮುಕ್ತಗೊಳಿಸಿಕೊಳ್ಳಿ. ಎರಡನೆಯದಾಗಿ, ಉತ್ತಮ ಚಟಗಳು ಮತ್ತು ಉತ್ತಮ ಕರ್ಮಗಳನ್ನು ಸ್ಥಾಪಿಸಿ ಹಾಗೂ ಆಚರಿಸಿ.

ಮೂರನೆಯ ಹಂತ ಆಸನ ಅಥವಾ ಭಂಗಿ: ಆಳವಾಗಿ ಧ್ಯಾನ ಮಾಡಬೇಕಾದರೆ ದೇಹವು ನಿಮ್ಮ ನಿಯಂತ್ರಣದಲ್ಲಿ ಇರಬೇಕು.

ಅನಂತರ ಬರುತ್ತದೆ ಪ್ರಾಣಾಯಾಮ (ಅಂದರೆ ಪ್ರಾಣ ಅಥವ ಪ್ರಾಣಶಕ್ತಿಯ ನಿಯಂತ್ರಣ), ಇದು ದೇಹ ಮತ್ತು ಮನಸ್ಸನ್ನು, ಉಸಿರಾಟ ಮತ್ತು ಹೃದಯದ ಸ್ಪಂದನವನ್ನು ಶಮನಗೊಳಿಸುವ ತಂತ್ರವಾಗಿದೆ. ಪ್ರಾಣಾಯಾಮವೆಂದರೆ ಆತ್ಮಸಾಕ್ಷಾತ್ಕಾರದ ಮೂಲಕಲೆಯಾಗಿದೆ. ನೀವು ಮರ್ತ್ಯ ಉಸಿರನ್ನು ನಿಯಂತ್ರಣಕ್ಕೆ ತರದೆ ಇದ್ದರೆ, ದೇವರನ್ನು ಕಂಡುಹಿಡಿಯಲು ಸಾಧ್ಯವಿಲ್ಲ. ಉಸಿರಾಟವು ಮನಸ್ಸನ್ನು ಇಂದ್ರಿಯ ಜಗತ್ತಿಗೆ ಬಂಧಿಸುತ್ತದೆ. ಉಸಿರಾಟ ಶಾಂತವಾದಾಗ ಮನಸ್ಸು ಒಳಗೆ ಹೊರಳುತ್ತದೆ. ಉಸಿರಿಲ್ಲದ ಆ ಆಂತರಿಕ ಶಾಂತಿಯೇ ದೇವರತ್ತ ಒಯ್ಯುವ ದಾರಿ. ಪ್ರಾಣಾಯಾಮವನ್ನು ಅಭ್ಯಾಸಮಾಡಿ — ಅದರಿಂದ ನೀವು ಧ್ಯಾನ ಹೇಗೆ ಮಾಡಬೇಕು, ದೇವರನ್ನು ಹೇಗೆ ಗ್ರಹಿಸಬೇಕು, ಮತ್ತು ಆತನೊಂದಿಗೆ ಹೇಗೆ ಒಂದಾಗುವುದು ಎಂಬುದನ್ನು ಅರಿಯುತ್ತೀರಿ.

ಪ್ರಾಣಾಯಾಮದ ಮೂಲಕ ಸಂಭವಿಸುವ ಮನಸ್ಸಿನ ಅಂತರ್ಮುಖತೆಯನ್ನು ಪ್ರತ್ಯಾಹಾರ ಎಂದು ಕರೆಯಲಾಗುತ್ತದೆ. ಅದು ಮುಂದಿನ ಹಂತವಾಗಿದೆ: ಪ್ರಜ್ಞೆಯನ್ನು ಇಂದ್ರಿಯಗಳಿಂದ ದೂರವಿಟ್ಟು ತನ್ನೊಳಗೆ ಹರಿಸಲಾಗುತ್ತದೆ. ಆಗಲೇ ನಿಜವಾದ ಧ್ಯಾನ ಆರಂಭವಾಗುತ್ತದೆ.

ನಿಮ್ಮ ಗಮನವು ಉಸಿರಾಟ ಮತ್ತು ದೇಹ ಮತ್ತು ಬಾಹ್ಯ ಇಂದ್ರಿಯಗಳ ಚಂಚಲತೆಗಳಿಂದ ಮುಕ್ತವಾದಾಗ, ಅದು ದೇವರ ಮೇಲೆಯೇ ಸಂಪೂರ್ಣ ಏಕಾಗ್ರತೆಯಿಂದ ಕೇಂದ್ರೀಕರಿಸಲು ಶಕ್ತವಾಗುತ್ತದೆ. ಇದನ್ನೇ ಅಷ್ಟಾಂಗ ಯೋಗದ ಆರನೆಯ ಹಂತವಾದ ಧಾರಣ, ಏಕಾಗ್ರತೆ ಎಂದು ಕರೆಯುತ್ತಾರೆ. ಆ ಆಂತರಿಕ ಶಾಂತತೆಯಲ್ಲಿ, ಆತ್ಮದ ಮಹಾ ಧ್ವನಿಯನ್ನು ‘ಓಂ’ ಎಂಬ ಶಬ್ದವಾಗಿ, ಅಥವಾ ‘ಆಮೆನ್’ ಕೇಳಬಹುದು.

ನೀವು ಆ ಮಹಾನ್‌ ಶಾಂತಿದಾಯಕ ಬ್ರಹ್ಮಾಂಡದ ಧ್ವನಿಯನ್ನು ಆಲಿಸಿ ಅದರಲ್ಲಿ ಲೀನರಾಗುತ್ತಾ ಹೋದಂತೆ, ಪ್ರಜ್ಞೆಯೂ ಅದರೊಂದಿಗೆ ಎಲ್ಲೆಡೆ ವ್ಯಾಪಿಸುತ್ತಾ ವಿಸ್ತಾರಗೊಳ್ಳುತ್ತದೆ. ಇದನ್ನೇ ಧ್ಯಾನ, ದೇವರ ಅನಂತತೆಯ ಭಾವನೆಯ ಮೇಲಿನ ಚಿಂತನೆಯಲ್ಲಿ ತೊಡಗುವ ಸ್ಥಿತಿ ಎನ್ನಲಾಗುತ್ತದೆ.

ಧ್ಯಾನದ ಏಕಾಗ್ರತೆಯೂ ಹಾಗೂ ಒಳ ಅರಿವು ಆಳವಾದಾಗ, ಕೊನೆಯ ಸ್ಥಿತಿಯಾಗಿರುವ ಸಮಾಧಿಗೆ ತಲುಪಲಾಗುತ್ತದೆ, ಅದರಲ್ಲಿ ಧ್ಯಾನಸ್ಥ, ಧ್ಯಾನ ಮತ್ತು ಧ್ಯಾನದ ಗುರಿ (ದೇವರು) ಏಕತೆಯಲ್ಲಿ ಲೀನವಾಗುತ್ತವೆ. ಸಮಾಧಿಯಲ್ಲಿ, ನೀವು ನೇರ ಅನುಭವದ ಮೂಲಕ ದೇವರು ಮತ್ತು ನೀವು ಒಂದೇ ಎಂಬ ಸತ್ಯವನ್ನು ತಿಳಿಯುತ್ತೀರಿ.