பரமஹம்ஸ யோகானந்தர் அருளிய “இறைவனிடம் இட்டுச் செல்லும் விஞ்ஞானப் பெருவழி”

அனைத்து பெரும் சமயங்களின் போதனைகளும் இறைவனை நோக்கி வழிநடத்துகின்றன; ஆனால் அவற்றின் மாறுபட்ட வெளிப்புற கடைப்பிடிப்புகள் யாவும் சாதகரை இறுதியில் தியானத்தின் ஒரே அகப் பெருவழிக்கு இட்டுச் செல்லும் புறவழிகளேயாகும்.

தேகத்திலிருந்தும் எல்லைக்குட்பட்ட உலகிலிருந்தும் உணர்வுநிலையை விலக்கி தெய்வீகத்தில் ஐக்கியப்படுத்துவதே இறைவனில் முக்தி அடைவதற்கான ஒரே வழி. இயேசு தியானம் செய்தார். அவர் திரளான பொது மக்களுக்கு தார்மீக மற்றும் ஆன்மீக உண்மைகளை கற்பித்தார் — இறைவனை நோக்கிய பாதைக்குத் தேவையான முதல் படிகள்; ஆனால் தனது நெருங்கிய சீடர்களுக்கு இறை ஐக்கியத்திற்கான உயர் தியான விஞ்ஞானத்தை அவர் கற்பித்தார்.

தியான உத்தி மட்டுமே உங்களுக்கு விடுதலையைத் தராது; உங்கள் குணம் வலுவானதாகவும் தூய்மையாகவும் இருக்க வேண்டும். உங்கள் வாழ்க்கை, நடத்தை அனைத்தும் சத்தியத்தின் விதிகளுக்கு இசைவாக இருக்க வேண்டும். யோக தியானப் பாதையின் முதல் விதிகள் யமம் மற்றும் நியமம் — பத்து கட்டளைகளுக்கு ஒத்த நீங்கள் செய்யக்கூடாத சில விஷயங்கள், (“கொலை செய்யாதிருப்பாயாக,” “பொய் சாட்சி சொல்லாதிருப்பாயாக,” “விபச்சாரம் செய்யாதிருப்பாயாக,” மற்றும் பல); மேலும் நீங்கள் பின்பற்ற வேண்டிய தூய்மை, சமநிலை மனநிறைவு, உள்முகநோக்கு (சுய ஆய்வு), இறைவன் மீதான பக்தி மற்றும் சுய ஒழுக்கம் போன்ற நேர்மறையான அறிவுறுத்தல்கள்.

தியானத்தில் மேம்பட, நீங்கள் பெருமை, கோபம், பேராசை, பொறாமை ஆகியவற்றிலிருந்து உங்களை விடுவித்துக் கொள்ள முயற்சி செய்ய வேண்டும். நீங்கள் நேர்மையற்றவர்களாக இருக்கக் கூடாது; உண்மையாகவே உணராத எதையும் நீங்கள் சொல்லக்கூடாது. சுயநலமாக பிறரிடம் எதையும் எதிர்பார்க்காதீர்கள்; உங்களுக்கு எந்த எதிர்பார்ப்பும் இல்லை என்றால், மக்கள் உங்களிடமிருந்து என்ன எடுக்க முடியும்? இறைவனைத் தவிர வேறு எந்த லட்சியமும் எனக்கு இல்லாததால் யாரும் என்னை காயப்படுத்த முடியாது. நான் எந்த மனிதன் மீதும் கோபப்பட விரும்புவதில்லை, தன் கோபத்தை வெளிப்படுத்தி யாரும் என்னைத் தூண்டவும் முடியாது. எனவே அமைதியாகவும், சுயக்கட்டுப்பாடுடனும், நேர்மையாகவும் இருக்க முயற்சி செய்யுங்கள். இல்லையெனில், தவறான நடத்தை தியானத்தின் சாதகமான விளைவுகளை அழித்துவிடும்.

உங்களின் ஒவ்வொரு ஆன்மீக எண்ணமும் உங்கள் நித்திய நண்பனாக இருக்கும். உங்களின் ஒவ்வொரு தீயப் போக்கும் நீண்ட காலத்திற்கு உங்கள் எதிரியாக இருக்கும்; நீங்கள் அதை விட்டொழிக்கும் வரை அது உங்களைப் பின்தொடரும். அதை நினைவில் கொள்ளுங்கள். இறைவனை அடைவதற்கான படிப்படியான வழிமுறைகளை நான் உங்களுக்கு தெரியப்படுத்துகிறேன். தவறான எண்ணங்கள் மற்றும் பழக்கவழக்கங்களிலிருந்து முதலில் விடுபடுங்கள். இரண்டாவது, நல்ல பழக்கங்களை உருவாக்கி, நல்ல செயல்களைச் செய்யுங்கள்.

மூன்றாவது படி ஆசனம் அல்லது அமர்வுநிலை: ஆழ்ந்த தியானம் செய்வதற்கு தேகம் உங்கள் கட்டுப்பாட்டில் இருக்க வேண்டும்.

பின்னர் பிராணாயாமா (பிராணன் அல்லது உயிர் சக்தியை கட்டுப்படுத்துதல்), தேகத்தையும் மனத்தையும், மற்றும் சுவாசத்தையும் இதயத் துடிப்பையும் அமைதிப்படுத்தும் உத்திகள். பிராணாயாமம் அனுபூதிக்கான முதன்மையான கலை ஆகும். அநித்திய சுவாசத்தை கையாள்வதில் தேர்ச்சிப் பெறாவிட்டால் நீங்கள் இறைவனை உணர முடியாது. சுவாசம் மனத்தை புலன்உணர்வுத் தளத்துடன் இணைக்கிறது. உங்கள் சுவாசம் அமைதியாகும்போது, உங்கள் மனம் உள்ளார்ந்து செல்கிறது. சுவாசமின்மையே இறைவனை அடையும் வழி. பிராணாயாமப் பயிற்சியைப் பயிற்சி செய்யுங்கள், தியானம் செய்வது எப்படி — இறைவனை உணர்ந்து அவனுடன் ஒன்றிணைவது எவ்வாறு என்பதை அறிவீர்கள்.

பிராணாயாமம் மூலம் மனத்தை உள்முகப்படுத்துதல் பிரத்யாஹாரம் என்று அழைக்கப்படுகிறது. இது அடுத்த படிநிலை: உணர்வுநிலை புலன்களிலிருந்து விலகி, அகத்துள் செல்கிறது. அப்போதுதான் உண்மையான தியானம் தொடங்குகிறது.

சுவாசம், தேகம் மற்றும் வெளிப்புற உணர்ச்சிகளின் கவனச்சிதறல்களிலிருந்து உங்கள் கவனம் விடுபடும்போது, அது இறைவன் மீது ஒருமுகப்படமுடியும். அதுவே தாரணை எனப்படும், ஒருமுகப்படுதல், அஷ்டாங்க யோகப் பாதையின் ஆறாவது படி. அகத்தின் அசைவற்ற நிலையில், பரமாத்மாவின் வல்லமைமிக்க குரலை ஓம், வார்த்தை அல்லது ஆமென் என்று ஒருவர் கேட்கிறார்.

அந்த மகத்தான, ஆறுதல் தரும் பிரபஞ்ச அதிர்வுகளைக் கேட்டு அதில் நீங்கள் ஐக்கியப்படும்போது, உணர்வுநிலை அதனுடன் பரந்தவெளி முழுவதும் விரிவடைகிறது. அதுவே தியானம், இறைவனின் பரிமாணத்தைப் பற்றிய கருத்தாக்கத்தின் மீதான தியானம்.

தியானத்தின் ஒருமுகப்பாடு மற்றும் உணர்தல் ஆழமடையும் போது, ​​ ஒருவர் இறுதி நிலையான சமாதியை அடைகிறார், இதில் தியானிப்பவர், தியான செயல்முறை மற்றும் தியானப் பொருள் (இறைவன்) ஆகியவை இணைந்து ஒன்றேயாகின்றன. சமாதியில், இறைவனும் நீங்களும் ஒன்றே என்பதை நேரடி அனுபவத்தின் மூலம் அறிவீர்கள்.