ಇತರರಿಗಾಗಿ ಪ್ರಾರ್ಥಿಸುವುದು ಹೇಗೆ

“ಆಲೋಚನೆಯು ಒಂದು ಬಲ; ಅದಕ್ಕೆ ಅಗಾಧವಾದ ಶಕ್ತಿಯಿದೆ. ಆದುದರಿಂದಲೇ ನಾನು ಪರಮಹಂಸ ಯೋಗಾನಂದರು ಪ್ರಾರಂಭಿಸಿದ ಜಾಗತಿಕ ಪ್ರಾರ್ಥನಾ ಸಮೂಹದಲ್ಲಿ ಬಲವಾದ ನಂಬಿಕೆಯನ್ನಿಟ್ಟುಕೊಂಡಿರುವೆ. ನೀವೂ ಕೂಡ ಅದರಲ್ಲಿ ಭಾಗವಹಿಸುತ್ತಿರುವಿರೆಂದು ನನಗೆ ಭರವಸೆಯಿದೆ. ಜಾಗತಿಕ ಪ್ರಾರ್ಥನಾ ಸಮೂಹವು ಬಳಸುವ ಉಪಶಮನದಾಯಕ ತಂತ್ರದಂತೆ, ಜನರು ಶಾಂತಿ, ಪ್ರೀತಿ, ಸದ್ಭಾವನೆ, ಕ್ಷಮೆ ಇವುಗಳ ಕೇಂದ್ರೀಕೃತ ಸಕಾರಾತ್ಮಕ ಆಲೋಚನೆಗಳನ್ನು ಕಳುಹಿಸಿದಾಗ, ಅದು ದೊಡ್ಡ ಶಕ್ತಿಯನ್ನು ಹುಟ್ಟು ಹಾಕುತ್ತದೆ. ಇದನ್ನು ಸಾಮೂಹಿಕವಾಗಿ ಮಾಡಿದಾಗ, ಅದು ಜಗತ್ತನ್ನೇ ಬದಲಾಯಿಸಬಲ್ಲಷ್ಟು ಶಕ್ತಿಯುತವಾದ ಸದ್ಭಾವದ ಸ್ಪಂದನಗಳನ್ನು ಸೃಷ್ಟಿಸುತ್ತದೆ.”

—ಶ್ರೀ ದಯಾ ಮಾತಾ

ನಮ್ಮ ಪ್ರಾರ್ಥನೆಗಳು ಬೇರೆಯವರ ಜೀವನದಲ್ಲಿ ಹೇಗೆ ಪ್ರಭಾವ ಬೀರಬಲ್ಲವು? ಅವು ಹೇಗೆ ನಮ್ಮ ಜೀವನವನ್ನು ಮೇಲೆತ್ತಬಲ್ಲವೋ ಅದೇ ರೀತಿ: ಪ್ರಜ್ಞೆಯಲ್ಲಿ ಆರೋಗ್ಯ, ಯಶಸ್ಸು ಮತ್ತು ದೈವೀ ಸಹಾಯಕ್ಕೆ ಗ್ರಹಣಶೀಲತೆಯ ಧನಾತ್ಮಕ ವಿನ್ಯಾಸಗಳನ್ನು ಸ್ಥಾಪಿಸುವ ಮೂಲಕ. ಪರಮಹಂಸ ಯೋಗಾನಂದರು ಬರೆಯುತ್ತಾರೆ:

“ಪ್ರಕ್ಷುಬ್ಧತೆಗಳು ಅಥವಾ ಚಡಪಡಿಕೆಯ ‘ಸ್ಥಾಯಿ’ ಯಿಂದ ಮುಕ್ತವಾದ ಮಾನವನ ಮನಸ್ಸು, ಸಂಕೀರ್ಣವಾದ ರೇಡಿಯೋ ಯಾಂತ್ರಿಕ ರಚನೆಯ ಎಲ್ಲಾ ಕಾರ್ಯಗಳನ್ನು ನೆರವೇರಿಸಲು ಶಕ್ತಿಯುತವಾಗಿರುತ್ತದೆ — ಆಲೋಚನೆಗಳನ್ನು ಕಳುಹಿಸುವ ಮತ್ತು ಸ್ವೀಕರಿಸುವ ಹಾಗೂ ಅನಪೇಕ್ಷಿತವಾದವುಗಳನ್ನು ಹೊರಹಾಕುವ ಕಾರ್ಯಗಳ ಮೂಲಕ. ರೇಡಿಯೋ ಪ್ರಸಾರ ಕೇಂದ್ರದ ಸಾಮರ್ಥ್ಯವು, ಅದು ಉಪಯೋಗಿಸುವ ವಿದ್ಯುಚ್ಛಕ್ತಿಯ ಪ್ರಮಾಣದಿಂದ ನಿಯಂತ್ರಿತವಾಗುವಂತೆ, ಮಾನವ ರೇಡಿಯೋ ಯಂತ್ರದ ಪರಿಣಾಮಕಾರಿತ್ವವೂ ಕೂಡ ಪ್ರತಿ ವ್ಯಕ್ತಿಯು ಹೊಂದಿರುವ ಇಚ್ಛಾಶಕ್ತಿಯ ಪ್ರಮಾಣದ ಮೇಲೆ ಅವಲಂಬಿತವಾಗಿದೆ.”