ಇತರರಿಗಾಗಿ ಹೇಗೆ ಪ್ರಾರ್ಥಿಸುವುದು

ಪರಮಹಂಸ ಯೋಗಾನಂದರು ಬರೆದಿದ್ದಾರೆ:

“ಮಾನವನ ಮನಸ್ಸು, ಚಂಚಲತೆಯ ಗೊಂದಲಗಳಿಂದ ಮುಕ್ತವಾದಾಗ, ಸಂಕೀರ್ಣ ರೇಡಿಯೋ ಯಂತ್ರಗಳ ಎಲ್ಲಾ ಕಾರ್ಯಗಳನ್ನು ನಿರ್ವಹಿಸಲು — ಆಲೋಚನೆಗಳನ್ನು ಕಳುಹಿಸಲು ಮತ್ತು ಸ್ವೀಕರಿಸಲು ಹಾಗೂ ಅನಗತ್ಯವಾದವುಗಳನ್ನು ದೂರವಿರಿಸಲು ಶಕ್ತವಾಗುತ್ತದೆ. ರೇಡಿಯೋ ಪ್ರಸಾರ ಕೇಂದ್ರದ ಶಕ್ತಿಯು, ಅದು ಬಳಸಬಹುದಾದ ವಿದ್ಯುತ್ ಪ್ರವಾಹದ ಪ್ರಮಾಣದಿಂದ ಹೇಗೆ ನಿಯಂತ್ರಿಸಲ್ಪಡುತ್ತದೆಯೋ, ಹಾಗೆಯೇ ಮಾನವ ರೇಡಿಯೋದ ಪರಿಣಾಮಕಾರಿತ್ವವು ಪ್ರತಿಯೊಬ್ಬ ವ್ಯಕ್ತಿಯು ಹೊಂದಿರುವ ಇಚ್ಛಾಶಕ್ತಿಯ ಮಟ್ಟವನ್ನು ಅವಲಂಬಿಸಿರುತ್ತದೆ.”

ದೇವರ ಇಚ್ಛೆಯೊಂದಿಗೆ ತಮ್ಮ ಇಚ್ಛೆಯನ್ನು ಸಂಪೂರ್ಣವಾಗಿ ಸಮನ್ವಯಗೊಳಿಸಿದ ಪ್ರಬುದ್ಧ ಗುರುಗಳ ಮನಸ್ಸುಗಳು, ದೇಹ, ಮನಸ್ಸು ಮತ್ತು ಆತ್ಮದ ಉಪಶಮನಕಾರಿಯು ತಕ್ಷಣವೇ ಫಲಿಸುವಂತೆ ದೈವಿಕ ಶಕ್ತಿಯನ್ನು ಪ್ರಸಾರ ಮಾಡಬಲ್ಲವು. ಇಂತಹ ಗುಣಪಡಿಸುವಿಕೆಯ ಉದಾಹರಣೆಗಳನ್ನು ಪರಮಹಂಸ ಯೋಗಾನಂದರ ಬರಹಗಳು ಮತ್ತು ಉಪನ್ಯಾಸಗಳಲ್ಲಿ ಹೇರಳವಾಗಿ ಕಾಣಬಹುದು. ಅವು ಪವಾಡ ಸದೃಶವಾಗಿ ಕಂಡರೂ, ದೈವಿಕ ಗುಣಪಡಿಸುವಿಕೆಗಳು ಸೃಷ್ಟಿಯ ಸಾರ್ವತ್ರಿಕ ನಿಯಮಗಳನ್ನು ವೈಜ್ಞಾನಿಕವಾಗಿ ಪಾಲಿಸುವುದರ ನೈಸರ್ಗಿಕ ಫಲಿತಾಂಶವಾಗಿವೆ ಎಂದು ಅವರು ವಿವರಿಸಿದರು. ತಮ್ಮ ಪ್ರಬಲ ಇಚ್ಛಾಶಕ್ತಿ ಮತ್ತು ಚೈತನ್ಯವನ್ನು ಉಪಯೋಗಿಸಿ, ಇತರರ ದೇಹ ಮತ್ತು ಮನಸ್ಸುಗಳಲ್ಲಿ, ದೇವರ ಪರಿಪೂರ್ಣತೆಯ ಕಲ್ಪನೆಗಳನ್ನು ಉದಿಸುವಂತೆ ಮಾಡುವುದರ ಮೂಲಕ, ಜ್ಞಾನೋದಯ ಪಡೆದ ಜ್ಞಾನಿಗಳು ಬ್ರಹ್ಮಾಂಡದಲ್ಲಿ ಎಲ್ಲವೂ ಹೇಗೆ ರೂಪುಗೊಂಡಿದೆಯೋ ಅದೇ ಪ್ರಕ್ರಿಯೆಯನ್ನು ಅನುಸರಿಸುತ್ತಾರೆ.

ಈ ತತ್ವಗಳಿಗನುಗುಣವಾಗಿ ಪ್ರಾರ್ಥಿಸುವ ಯಾವುದೇ ವ್ಯಕ್ತಿಯು, ಅವರ ಪ್ರಾರ್ಥನೆಗಳು ಸಹಾ ಸ್ಪಷ್ಟವಾದ ಪ್ರಭಾವ ಬೀರುವುದನ್ನು ಕಂಡುಕೊಳ್ಳುತ್ತಾರೆ. ಒಬ್ಬ ಗುರುವು ಪ್ರದಾನ ಮಾಡಬಹುದಾದ ಶಕ್ತಿಗಿಂತ ನಮ್ಮ ವೈಯಕ್ತಿಕ ಶಕ್ತಿಯು ಸ್ಪಷ್ಟವಾಗಿ ಕಡಿಮೆಯಿದ್ದರೂ, ಸಾವಿರಾರು ಜನರ ಪ್ರಾರ್ಥನೆಗಳು ಒಂದಾದಾಗ ಉತ್ಪತ್ತಿಯಾಗುವ ಶಾಂತಿ ಮತ್ತು ದೈವಿಕ ಉಪಶಮನಕಾರಿಯ ಪ್ರಬಲ ಕಂಪನಗಳು ಅಪೇಕ್ಷಿತ ಫಲಿತಾಂಶಗಳನ್ನು ಪ್ರಕಟಗೊಳಿಸಲು ಸಹಾಯ ಮಾಡುವಲ್ಲಿ ಅಪರಿಮಿತ ಮೌಲ್ಯವನ್ನು ಹೊಂದಿರುತ್ತವೆ. ಈ ಉದ್ದೇಶಕ್ಕಾಗಿ, ಪರಮಹಂಸ ಯೋಗಾನಂದರು ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ/ಸೆಲ್ಫ್-ರಿಯಲೈಸೇಷನ್ ಫೆಲೋಶಿಪ್ ಪ್ರಾರ್ಥನಾ ಪರಿಷತ್ತು ಮತ್ತು ಜಾಗತಿಕ ಪ್ರಾರ್ಥನಾ ಸಮೂಹವನ್ನು ಸ್ಥಾಪಿಸಿದರು.