ಕ್ರಿಯಾ ಯೋಗವು ನಿಮ್ಮ ಮೆದುಳಿನ ಕೋಶಗಳನ್ನು ಬದಲಾಯಿಸುತ್ತದೆ

ಈ ತಂತ್ರದ ಪರಿಣಾಮಕಾರಿತ್ವವನ್ನು ವಿವರಿಸುವ ನಿಜವಾದ ಕಥೆಯನ್ನು ನಾನು ನಿಮಗೆ ಹೇಳುತ್ತೇನೆ. ಭಾರತದಲ್ಲಿ, ಕೆಟ್ಟ ಕೋಪವಿರುವ ಒಬ್ಬ ವ್ಯಕ್ತಿ ನನ್ನ ಬಳಿ ಬಂದ. ಅವನಿಗೆ ಕೋಪ ಬಂದಾಗ ತನ್ನ ಮೇಲಧಿಕಾರಿಗಳಿಗೆ ಕಪಾಳಮೋಕ್ಷ ಮಾಡುವುದರಲ್ಲಿ ಪರಿಣತನಾಗಿದ್ದನು; ಆದ್ದರಿಂದ ಅವನು ಒಂದರ ನಂತರ ಒಂದರಂತೆ ಕೆಲಸವನ್ನು ಕಳೆದುಕೊಳ್ಳುತ್ತಿದ್ದನು. ಅವನು ಅನಿಯಂತ್ರಿತವಾಗಿ ಎಷ್ಟು ಕುಪಿತನಾಗುತ್ತಿದ್ದನೆಂದರೆ, ತನಗೆ ತೊಂದರೆ ಕೊಟ್ಟವರೆಡೆಗೆ ಕೈಗೆ ಸಿಕ್ಕಿದ್ದನ್ನು ಎಸೆದುಬಿಡುತ್ತಿದ್ದ. ಅವನು ನನ್ನ ಸಹಾಯ ಕೇಳಿದ. ನಾನು ಅವನಿಗೆ, “ಮುಂದಿನ ಬಾರಿ ನೀನು ಕೋಪಗೊಂಡಾಗ, ಏನಾದರೂ ಮಾಡುವ ಮುನ್ನ ನೂರನ್ನು ಎಣಿಸು,” ಎಂದು ಹೇಳಿದೆ. ಅವನು ಪ್ರಯತ್ನಿಸಿದ, ಆದರೆ ನನ್ನ ಬಳಿಗೆ ಹಿಂದಿರುಗಿ ಬಂದು ಹೇಳಿದ, “ನಾನು ಅದನ್ನು ಮಾಡುವಾಗ ಇನ್ನಷ್ಟು ಕೋಪ ಬರುತ್ತದೆ. ನಾನು ಎಣಿಸುತ್ತಿರುವಾಗ, ಅಷ್ಟು ಹೊತ್ತು ಕಾಯಬೇಕಾದುದಕ್ಕಾಗಿ ನನ್ನ ಕೋಪ ತೀವ್ರವಾಗುತ್ತಿತ್ತು.” ಅವನ ಪರಿಸ್ಥಿತಿ ನಿರಾಶಾದಾಯಕವಾಗಿತ್ತು.

ನಂತರ ನಾನು ಅವನಿಗೆ ಕ್ರಿಯಾ ಯೋಗವನ್ನು ಅಭ್ಯಾಸ ಮಾಡಲು ಹೇಳಿದೆ, ಜೊತೆಗೆ ಈ ಸೂಚನೆಯನ್ನೂ ನೀಡಿದೆ: “ನೀನು ನಿನ್ನ ಕ್ರಿಯಾವನ್ನು ಅಭ್ಯಾಸ ಮಾಡಿದ ನಂತರ, ದೇವರ ದಿವ್ಯ ಬೆಳಕು ನಿನ್ನ ಮೆದುಳಿಗೆ ಹೋಗುತ್ತಿದೆ, ಅದು ಮೆದುಳನ್ನು ಶಮನಗೊಳಿಸುತ್ತಿದೆ, ನಿನ್ನ ನರಗಳನ್ನು ಶಾಂತಗೊಳಿಸುತ್ತಿದೆ, ನಿನ್ನ ಭಾವನೆಗಳನ್ನು ಶಾಂತಗೊಳಿಸುತ್ತಿದೆ, ಎಲ್ಲಾ ಕೋಪವನ್ನು ಅಳಿಸಿಹಾಕುತ್ತಿದೆ ಎಂದು ಭಾವಿಸು. ಮತ್ತು ಒಂದಲ್ಲ ಒಂದು ದಿನ ನಿನ್ನ ಕೂಗಾಟ-ಹಾರಾಟ ಹೊರಟುಹೋಗುತ್ತದೆ.” ಸ್ವಲ್ಪ ಸಮಯದ ನಂತರ ಅವನು ಮತ್ತೆ ನನ್ನ ಬಳಿ ಬಂದ, ಮತ್ತು ಈ ಬಾರಿ ಹೇಳಿದ, “ನಾನು ಕೋಪದ ಅಭ್ಯಾಸದಿಂದ ಮುಕ್ತನಾಗಿದ್ದೇನೆ. ನಾನು ತುಂಬಾ ಕೃತಜ್ಞನಾಗಿದ್ದೇನೆ.”

ನಾನು ಅವನನ್ನು ಪರೀಕ್ಷಿಸಲು ನಿರ್ಧರಿಸಿದೆ. ಕೆಲವು ಹುಡುಗರನ್ನು ಅವನೊಂದಿಗೆ ಜಗಳವಾಡಲು ವ್ಯವಸ್ಥೆ ಮಾಡಿದೆ. ನಾನು ಗಮನಿಸಲು ಸಾಧ್ಯವಾಗುವಂತೆ, ಅವನು ನಿಯತವಾಗಿ ಹಾದು ಹೋಗುವ ಮಾರ್ಗದಲ್ಲಿದ್ದ ಪಾರ್ಕ್‌ನಲ್ಲಿ ಬಚ್ಚಿಟ್ಟುಕೊಂಡೆ. ಹುಡುಗರು ಅವನೊಂದಿಗೆ ಜಗಳವಾಡುವ ಪ್ರಯತ್ನ ಮತ್ತೆ ಮತ್ತೆ ಮಾಡಿದರೂ ಅವನು ಪ್ರತಿಕ್ರಿಯಿಸಲಿಲ್ಲ. ಅವನು ತನ್ನ ಶಾಂತಿಯನ್ನು ಕಾಪಾಡಿಕೊಂಡಿದ್ದ.