ಶ್ರೀ ದಯಾ ಮಾತಾ ಅವರಿಂದ “ದೈವಿಕ ಸಂಸರ್ಗದ ಸ್ಥಳ”

ನಾನು ಗುರೂಜಿಯವರ ಪ್ರೀತಿಯ ಮೌಂಟ್ ವಾಷಿಂಗ್‌ಟನ್ ಕೇಂದ್ರದತ್ತ ಹಿಂತಿರುಗಿ ನೋಡಿದಾಗ, ನನ್ನ ಹೃದಯದಲ್ಲಿ ಎಷ್ಟೊಂದು ನೆನಪುಗಳು ತುಂಬಿಬರುತ್ತವೆ! ಈ ಕೇಂದ್ರವನ್ನು ಸ್ಥಾಪಿಸಲು ಅವರು ತಮ್ಮ ಜೀವನದ ಬಹುಪಾಲನ್ನು ಅರ್ಪಿಸಿದರು. ಪ್ರಪಂಚದಾದ್ಯಂತ ಇರುವ ಅವರ ಅಸಂಖ್ಯಾತ ಅನುಯಾಯಿಗಳಿಗೆ ಇದು ಒಂದು ಪವಿತ್ರ ಕ್ಷೇತ್ರವಾಗಿ — ಒಂದು ಆಧ್ಯಾತ್ಮಿಕ ನೆಲೆಯಾಗಿ — ನಾವು ಇದನ್ನು ಸಂರಕ್ಷಿಸುವುದು ನಮ್ಮ ಪವಿತ್ರ ಸೌಭಾಗ್ಯವಾಗಿದೆ.

ಈ ಆವರಣಗಳಲ್ಲೆಲ್ಲಾ ಗುರೂಜಿಯವರು ಪರಮಾನಂದದಲ್ಲಿ ಧ್ಯಾನ ಮಾಡುತ್ತಿದ್ದರು, ಆಗಾಗ ದೈವೀ ಮಾತೆ, ಅಥವಾ ನಮ್ಮ ಮಹಾನ್ ಗುರುಗಳು, ಅಥವಾ ಇತರ ಸಂತರು ಅವರಿಗೆ ದರ್ಶನ ನೀಡಿ ಆಶೀರ್ವದಿಸುತ್ತಿದ್ದರು. ಮೌಂಟ್ ವಾಷಿಂಗ್ಟನ್ ಚಾಪೆಲ್‌ನಲ್ಲಿ, ಅಸ್ಸಿಸಿಯ ಸಂತ ಫ್ರಾನ್ಸಿಸ್ ಅವರ ದರ್ಶನವು ಅವರಿಗೆ “ದೇವರೇ! ದೇವರೇ! ದೇವರೇ!” ಎಂಬ ಕವಿತೆಯನ್ನು ರಚಿಸಲು ಸ್ಫೂರ್ತಿ ನೀಡಿತು.

ಇದೇ ಸ್ಥಳದಲ್ಲಿ, ಪ್ರತಿ ವರ್ಷ ಕ್ರಿಸ್‌ಮಸ್ ಸಮಯದಲ್ಲಿ ಒಂದು ಪೂರ್ಣ ದಿನವನ್ನು ಕ್ರಿಸ್ತರೊಂದಿಗೆ ಆಳವಾದ ಮತ್ತು ದೀರ್ಘವಾದ ಸಂಸರ್ಗಕ್ಕಾಗಿ ಮೀಸಲಿಡುವ ಕಲ್ಪನೆಯನ್ನು ಸಹ ಅವರು ಪರಿಚಯಿಸಿದರು — ಇದು ಆಶ್ರಮದಲ್ಲಿ ನನ್ನ ಮೊದಲ ಕ್ರಿಸ್‌ಮಸ್ ಆದ 1931 ರಲ್ಲಿ ಪ್ರಾರಂಭವಾಯಿತು — ಈ ಆಚರಣೆಯು ಮೌಂಟ್ ವಾಷಿಂಗ್ಟನ್‌ನಿಂದ ಪ್ರಪಂಚದಾದ್ಯಂತ ಹರಡುತ್ತದೆ ಎಂದು ಅವರು ಭವಿಷ್ಯ ನುಡಿದಿದ್ದರು, ಮತ್ತು ವಾಸ್ತವವಾಗಿ ಹಾಗೆಯೇ ಆಗಿದೆ.

ಇತರ ಸಮಯದಲ್ಲಿ, ಅವರು ನಮ್ಮನ್ನು ದೀರ್ಘವಾದ ಆನಂದಮಯ ಭಕ್ತಿಗೀತೆಗಳ ಪಠಣದಲ್ಲಿ ಮುನ್ನಡೆಸುತ್ತಿದ್ದರು, ಈ ಸಮಯದಲ್ಲಿ ಅವರು ದೇವರಿಗಾಗಿ ರಚಿಸಿದ ಕೆಲವು ಹೊಸ ಹಾಡುಗಳನ್ನು ಮೊದಲು ಕೇಳುವ ಸೌಭಾಗ್ಯ ನಮಗೆ ಕೆಲವೊಮ್ಮೆ ಸಿಗುತ್ತಿತ್ತು.

ಪೂರ್ವ ಮತ್ತು ಪಶ್ಚಿಮದಲ್ಲಿ ನಾನು ಭೇಟಿ ನೀಡಿರುವ ಎಲ್ಲಾ ತೀರ್ಥಯಾತ್ರಾ ಸ್ಥಳಗಳಲ್ಲಿಯೂ, ಅವರು ಇಲ್ಲಿ ಬಿಟ್ಟುಹೋದ ದೈವೀ ಸ್ಪಂದನೆಗಳು ನಿಜವಾಗಿಯೂ ಅಪರೂಪದವು. ನಾನು ಈ ಆವರಣದೊಳಗೆ ಮೊದಲ ಬಾರಿಗೆ ಕಾಲಿಟ್ಟ ದಿನದಿಂದ ಇಂದಿನವರೆಗೆ, ಪ್ರತಿ ಸಲ ದ್ವಾರಗಳ ಮೂಲಕ ಪ್ರವೇಶಿಸುವಾಗಲೂ ಮಹತ್ತರವಾದ ಆನಂದದ ರೋಮಾಂಚನವನ್ನು ಅನುಭವಿಸದೆ ಇರುವುದಿಲ್ಲ.