ಸ್ಮೃತಿ ಮಂದಿರ — ಯೋಗದಾ ಸತ್ಸಂಗ ಶಾಖಾ ಮಠ, ರಾಂಚಿ

ಯೋಗಾನಂದಜಿಯವರು ವಿಶ್ವಾದ್ಯಂತ ಪ್ರಚಾರಕಾರ್ಯಕ್ಕಾಗಿ ಪಶ್ಚಿಮಕ್ಕೆ ತೆರಳುವುದಕ್ಕೆ ಕಾರಣವಾದ ಈ ದರ್ಶನದ ಸ್ಮರಣಾರ್ಥ ಅದೇ ಸ್ಥಳದಲ್ಲಿ 1950ರಲ್ಲಿ, ಒಂದು ಸಣ್ಣ ಧ್ಯಾನ ಮಂದಿರವನ್ನು ನಿರ್ಮಿಸಲಾಯಿತು. ಈ ಮಂದಿರವನ್ನು 1960ರ ದಶಕದಲ್ಲಿ ಒಮ್ಮೆ ಮತ್ತು 1980ರ ದಶಕದಲ್ಲಿ ಮತ್ತೊಮ್ಮೆ ಮಾರ್ಪಾಡು ಮಾಡಲಾಯಿತು.

ಶ್ರೀ ದಯಾ ಮಾತಾಜಿಯವರು ಯೋಗಾನಂದಜಿಯವರ 100 ನೇ ಜನ್ಮ ವಾರ್ಷಿಕೋತ್ಸವದಂದು ಅವರಿಗೆ ಸೂಕ್ತ ಕಾಣಿಕೆಯಾಗಿ ಈ ಪವಿತ್ರ ಸ್ಥಳದಲ್ಲಿ ಒಂದು ವಿಶೇಷ ಮಂದಿರವನ್ನು ನಿರ್ಮಿಸಲು ಬಯಸಿದ್ದರು.

1993 ರಲ್ಲಿ ಯೋಗಾನಂದಜಿಯವರ ಜನ್ಮದಿನದಂದು ವೈಎಸ್‌ಎಸ್‌ನ ಮಾಜಿ ಧರ್ಮಾಚಾರ್ಯರಾದ ಸ್ವಾಮಿ ಭಾವಾನಂದ ಗಿರಿಯವರು, ಸ್ಮೃತಿ ಮಂದಿರದ ಅಡಿಗಲ್ಲನ್ನು ಹಾಕಿದರು. ಈ ಸ್ಮಾರಕದ ಯೋಜನೆಗಾಗಿ ರಾಜಸ್ಥಾನದಿಂದ ಅನುಭವಿ ಕಾರ್ಮಿಕರ ತಂಡವನ್ನು ಕರೆಸಲಾಯಿತು; ಅಮೃತಶಿಲೆಯ ಕಲ್ಲುಗಳಿಂದ ಗುಮ್ಮಟ ಮತ್ತು ಕಂಬಗಳನ್ನು ಕೆತ್ತುವುದು ಅವರ ಕೆಲಸವಾಗಿತ್ತು. ಕೆತ್ತನೆಯ ಕೆಲಸದಲ್ಲಿ ಪರಿಣತಿ ಹೊಂದಿರುವ ಮತ್ತೊಂದು ತಂಡಕ್ಕೆ ಪೂಜಾಪೀಠ ಮತ್ತು ಕಮಲದ ಹೂವುಗಳನ್ನು ಕೆತ್ತುವ ಜವಾಬ್ದಾರಿಯನ್ನು ವಹಿಸಲಾಯಿತು.

ಮಾರ್ಚ್ 22, 1995 ರಂದು, ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ (ವೈಎಸ್‌ಎಸ್) ದ ಸ್ಥಾಪನೆಯ 78 ನೇ ವಾರ್ಷಿಕೋತ್ಸವದಂದು, ಮಹಾನ್ ಗುರುಗಳ ಸ್ಮರಣಾರ್ಥ ರಾಂಚಿಯ ಯೋಗದಾ ಸತ್ಸಂಗ ಶಾಖಾ ಮಠದಲ್ಲಿ ಬಿಳಿ ಅಮೃತಶಿಲೆಯ ಸುಂದರವಾದ ಸ್ಮೃತಿ ಮಂದಿರವನ್ನು ಸಮರ್ಪಿಸಲಾಯಿತು. ಗುರುದೇವರ ನೇರ ಶಿಷ್ಯರಲ್ಲಿ ಒಬ್ಬರಾದ ಸ್ವಾಮಿ ಆನಂದಮೊಯಿ ಗಿರಿಯವರು ಎಲ್ಲರ ವೈಯಕ್ತಿಕ ಧ್ಯಾನಕ್ಕಾಗಿ ಸ್ಮೃತಿ ಮಂದಿರವನ್ನು ಉದ್ಘಾಟಿಸುವುದನ್ನು 1,200 ಕ್ಕೂ ಹೆಚ್ಚು ಭಕ್ತರು ಮತ್ತು ಅತಿಥಿಗಳು ವೀಕ್ಷಿಸಿದರು. ಈ ವಿಶೇಷ ಘಟನೆಯ ಗುರುತಿಗಾಗಿ, ಸ್ಮೃತಿ ಮಂದಿರ ಸಮರ್ಪಣ ಸಂಗಮ ಎಂಬ ಒಂದು ವಾರದ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಯಿತು.

ಸ್ಮೃತಿ ಮಂದಿರವು 1995 ರಲ್ಲಿ ಸಮರ್ಪಿತವಾದಾಗಿನಿಂದ ರಾಂಚಿಯ ಯೋಗದಾ ಸತ್ಸಂಗ ಶಾಖಾ ಮಠಕ್ಕೆ ಭೇಟಿ ನೀಡುವ ಭಕ್ತರ ಗಮನವನ್ನು ತನ್ನ ಆಳವಾದ ಆಧ್ಯಾತ್ಮಿಕ ಮಹತ್ವ ಮತ್ತು ವಾಸ್ತುಶಿಲ್ಪದ ಸೌಂದರ್ಯಕ್ಕಾಗಿ ಆಕರ್ಷಿಸುತ್ತಿದೆ.

ಈ ಮಂದಿರವು ದಿನವಿಡೀ ತೆರೆದಿರುತ್ತದೆ ಹಾಗೂ ಭಕ್ತರು ಮತ್ತು ಸಂದರ್ಶಕರು ಇದನ್ನು ವೈಯಕ್ತಿಕ ಧ್ಯಾನಕ್ಕಾಗಿ ಬಳಸುತ್ತಾರೆ.