ಯೋಗದಾ ಸತ್ಸಂಗ ಸೊಸೈಟಿ ಆಫ್‌ ಇಂಡಿಯಾದ ಶಬ್ದಾರ್ಥ ಸಂಗ್ರಹ (ಬ, ಭ)

ಭಗವದ್ಗೀತೆ. “ಭಗವಂತನ ಗೀತೆ.” ಮಹಾಭಾರತ ಮಹಾಕಾವ್ಯದ ಆರನೇ ಪರ್ವ (ಭೀಷ್ಮ ಪರ್ವ)ದ ಹದಿನೆಂಟು ಅಧ್ಯಾಯಗಳನ್ನು ಒಳಗೊಂಡಿರುವ ಭಾರತದ ಒಂದು ಪ್ರಾಚೀನ ಗ್ರಂಥ. ಐತಿಹಾಸಿಕ ಕುರುಕ್ಷೇತ್ರದ ಯುದ್ಧದ ಮುನ್ನಾದಿನದಂದು ಅವತಾರ (ಶಬ್ದಾರ್ಥ ಸಂಗ್ರಹದಲ್ಲಿ ಇದನ್ನು ನೋಡಿ) ಪುರುಷ ಭಗವಾನ್ ಶ್ರೀಕೃಷ್ಣ ಮತ್ತು ಅವನ ಶಿಷ್ಯ ಅರ್ಜುನನ ನಡುವಿನ ಸಂವಾದದ ರೂಪದಲ್ಲಿ ಪ್ರಸ್ತುತಪಡಿಸಲಾದ ಗೀತೆಯು ಯೋಗ ವಿಜ್ಞಾನದ (ಭಗವಂತನೊಂದಿಗೆ ಸಂಯೋಗ) ಗಹನ ಗ್ರಂಥವಾಗಿದೆ ಹಾಗೂ ದೈನಂದಿನ ಜೀವನದಲ್ಲಿ ಸಂತೋಷ ಮತ್ತು ಯಶಸ್ಸನ್ನು ಕಂಡುಕೊಳ್ಳಲು ನೀಡಿರುವ ಕಾಲಾತೀತ ಅನುಶಾಸನವಾಗಿದೆ. ಸಾಂಕೇತಿಕವೂ, ಐತಿಹಾಸಿಕವೂ ಆಗಿರುವ ಗೀತೆಯು ಮನುಷ್ಯನ ಒಳ್ಳೆಯ ಮತ್ತು ಕೆಟ್ಟ ಪ್ರವೃತ್ತಿಗಳ ನಡುವಿನ ಆಂತರಿಕ ಯುದ್ಧದ ಆಧ್ಯಾತ್ಮಿಕ ಪ್ರಬಂಧವಾಗಿದೆ. ಸಂದರ್ಭಕ್ಕನುಗುಣವಾಗಿ ಕೃಷ್ಣನು ಗುರು, ಆತ್ಮ ಅಥವಾ ಭಗವಂತನನ್ನು ಸಂಕೇತಿಸುತ್ತಾನೆ; ಅರ್ಜುನನು ಆಕಾಂಕ್ಷಿ ಭಕ್ತನನ್ನು ಪ್ರತಿನಿಧಿಸುತ್ತಾನೆ. ಈ ಸಾರ್ವತ್ರಿಕ ಗ್ರಂಥದ ಬಗ್ಗೆ ಮಹಾತ್ಮ ಗಾಂಧಿಯವರು ಹೀಗೆ ಬರೆದಿದ್ದಾರೆ: “ಭಗವದ್ಗೀತೆಯನ್ನು ಕುರಿತು ಧ್ಯಾನಿಸುವವರು ಪ್ರತಿದಿನವೂ ತಾಜಾ ಸಂತೋಷ ಹಾಗೂ ಹೊಸ ಅರ್ಥಗಳನ್ನು ಕಂಡುಕೊಳ್ಳುತ್ತಾರೆ. ಗೀತೆಯಿಂದ ಬಿಡಿಸಲು ಸಾಧ್ಯವಾಗದ ಯಾವುದೇ ಆಧ್ಯಾತ್ಮಿಕ ಗೋಜಲು ಇಲ್ಲ.”