ಸಕಲ ದುಃಖಗಳಿಂದ ಮುಕ್ತರಾದ ಅನಂತ ಸತ್-ಸ್ವರೂಪವಾಗಿ ನಿಮ್ಮನ್ನು ಶೀಘ್ರವಾಗಿ ಅರಿತುಕೊಳ್ಳುವ ಸಲುವಾಗಿ, ಅವಿರತವಾಗಿ ಧ್ಯಾನಿಸಿ. ದೇಹದ ಸೆರೆಯಾಳಾಗಿರುವುದನ್ನು ನಿಲ್ಲಿಸಿ; ಕ್ರಿಯಾದ ಗುಪ್ತ ಕೀಲಿಕೈಯನ್ನು ಬಳಸಿ, ಚೈತನ್ಯದಲ್ಲಿ ಲೀನವಾಗಲು ಕಲಿಯಿರಿ.
— ಶ್ರೀ ಶ್ರೀ ಲಾಹಿರಿ ಮಹಾಶಯರು ಯೋಗಿಯ ಆತ್ಮಕಥೆ ಕೃತಿಯಲ್ಲಿ ಉಲ್ಲೇಖಿಸಿದಂತೆ
ಶ್ರೀ ಶ್ರೀ ಲಾಹಿರಿ ಮಹಾಶಯರು ಆಧುನಿಕ ಕಾಲದಲ್ಲಿ ಆಧ್ಯಾತ್ಮಿಕ ಸಾಧನೆಯ ಹಾದಿಯಲ್ಲಿರುವ ಆತ್ಮಗಳಿಗೆ ಕ್ರಿಯಾ ಯೋಗ ಪ್ರವರ್ತಕರಾಗಿದ್ದಾರೆ. ಪ್ರಪಂಚದಾದ್ಯಂತ ವೈಎಸ್ಎಸ್/ಎಸ್‌ಆರ್‌ಎಫ್‌ ಭಕ್ತರು ಅವರನ್ನು “ಯೋಗದ ಅವತಾರ” ಅರ್ಥಾತ್ ಯೋಗಾವತಾರ ಎಂದು ಗೌರವಿಸುತ್ತಾರೆ. ಗೃಹಸ್ಥರಾಗಿದ್ದರೂ, ಆಧ್ಯಾತ್ಮಿಕ ಸಾಕ್ಷಾತ್ಕಾರದ ಅತ್ಯುನ್ನತ ಮಟ್ಟವನ್ನು ತಲುಪಿದ ಲಾಹಿರಿ ಮಹಾಶಯರು, ಒಬ್ಬ ವ್ಯಕ್ತಿ ತನ್ನ ಲೌಕಿಕ ಜವಾಬ್ದಾರಿಗಳನ್ನು ಪೂರೈಸುತ್ತಲೇ ಆತ್ಮ ಸಾಕ್ಷಾತ್ಕಾರದ ಮಾರ್ಗವನ್ನು ಅನುಸರಿಸಬಹುದು ಎಂಬುದನ್ನು ನಿರೂಪಿಸಿದವರಾಗಿದ್ದಾರೆ.
ಲಾಹಿರಿ ಮಹಾಶಯರು ಸೆಪ್ಟೆಂಬರ್ 26, 1895 ರಂದು ತಮ್ಮ ನಶ್ವರ ದೇಹವನ್ನು ತ್ಯಜಿಸಿ ಮಹಾಸಮಾಧಿಯನ್ನು ಪ್ರವೇಶಿಸಿದರು. ಇದು ದೈವ-ಸಾಕ್ಷಾತ್ಕಾರಗೊಂಡ ಯೋಗಿಯೊಬ್ಬರು ದೇಹದಿಂದ ಪ್ರಜ್ಞಾಪೂರ್ವಕವಾಗಿ ನಿರ್ಗಮಿಸುವ ಅಂತಿಮ ಸ್ಥಿತಿಯಾಗಿದೆ. ಈ ದಿನವನ್ನು ಸ್ಮರಿಸಲು, ಶುಕ್ರವಾರ, ಸೆಪ್ಟೆಂಬರ್ 26 ರಂದು ವೈಎಸ್ಎಸ್ ಸಂನ್ಯಾಸಿಯೊಬ್ಬರು ಆನ್ಲೈನ್ ಧ್ಯಾನದ ನೇತೃತ್ವ ವಹಿಸಿದರು.
ಈ ಕಾರ್ಯಕ್ರಮವು ಪ್ರಾರ್ಥನೆ, ಪ್ರೇರಣಾದಾಯಕ ಪಠಣದ ನಂತರ ಭಜನೆ, ಮತ್ತು ಒಂದು ಅವಧಿಯ ಧ್ಯಾನವನ್ನು ಒಳಗೊಂಡಿತ್ತು. ಇದು ಪರಮಹಂಸ ಯೋಗಾನಂದರ ಉಪಶಮನಕಾರಿ ತಂತ್ರ ಮತ್ತು ಸಮಾಪ್ತಿ ಪ್ರಾರ್ಥನೆಯೊಂದಿಗೆ ಮುಕ್ತಾಯಗೊಂಡಿತು.
ಈ ವಿಶೇಷ ಸಂದರ್ಭದಲ್ಲಿ, ವಿವಿಧ ಆಶ್ರಮಗಳು, ಕೇಂದ್ರಗಳು ಮತ್ತು ಮಂಡಳಿಗಳು ಸಹ ಭಕ್ತರಿಗಾಗಿ ನೇರ ಕಾರ್ಯಕ್ರಮಗಳನ್ನು ನಡೆಸಿದವು.
ಈ ವಿಶೇಷ ದಿನದಂದು, ನೀವು ದೇಣಿಗೆ ನೀಡಲು ಇಚ್ಛಿಸಿದರೆ, ಕೆಳಗಿನ ಕೊಂಡಿಯನ್ನು ಒತ್ತುವ ಮೂಲಕ ಹಾಗೆ ಮಾಡಲು ಸ್ವಾಗತವಿದೆ. ನಿಮ್ಮ ಉದಾರ ಕೊಡುಗೆಗಳು ಕ್ರಿಯಾ ಯೋಗದ ಬೋಧನೆಗಳನ್ನು ಪ್ರಾಮಾಣಿಕ ಅನ್ವೇಷಕರಿಗೆ ಪ್ರಸಾರ ಮಾಡಲು ಸಹಾಯ ಮಾಡುತ್ತವೆ.
