ಕ್ರಿಯಾ ಯೋಗ — ಆನಂದದೆಡೆಗೊಯ್ಯುವ ಜೀವನ ಶೈಲಿ, ಪರಮಹಂಸ ಯೋಗಾನಂದರಿಂದ

ಒಂದು ಪರಿಚಯ:

2014 ರಲ್ಲಿ ವಿಶ್ವಸಂಸ್ಥೆಯು ಪ್ರಾರಂಭಿಸಿದ ಅಂತರರಾಷ್ಟ್ರೀಯ ಯೋಗ ದಿನವನ್ನು ಪ್ರಪಂಚದಾದ್ಯಂತ ಜನರು ಪ್ರತಿ ವರ್ಷ ಜೂನ್ 21 ರಂದು ಆಚರಿಸುತ್ತಾರೆ, ಇದು ಆಧುನಿಕ ಜಗತ್ತಿಗೆ ಭಾರತದ ಪ್ರಾಚೀನ ವಿಜ್ಞಾನದ ಅನನ್ಯ ಕೊಡುಗೆಯನ್ನು ಅಂಗೀಕರಿಸುವ ಅವಕಾಶವಾಗಿದೆ.

ಅನೇಕ ಜನರು ಯೋಗವನ್ನು ಕೇವಲ ದೈಹಿಕ ವ್ಯಾಯಾಮಗಳೆಂದು ಭಾವಿಸಿದರೂ — ಹಠಯೋಗದ ಆಸನಗಳು ಅಥವಾ ಭಂಗಿಗಳು — ಯೋಗದ ನಿಜವಾದ ಮೌಲ್ಯ ಮತ್ತು ಉದ್ದೇಶವೆಂದರೆ ಮಾನವನ ಮನಸ್ಸು ಮತ್ತು ಆತ್ಮದ ಅನಂತ ಸಾಮರ್ಥ್ಯಗಳನ್ನು ಅನಾವರಣಗೊಳಿಸುವುದಾಗಿದೆ. ಯೋಗ ಎಂಬ ಪದದ ಅರ್ಥವೇ “ಸಂಯೋಗ”: ವಿಶ್ವಾತ್ಮಕ ಪ್ರಜ್ಞೆ ಅಥವಾ ಪರಮಾತ್ಮನೊಂದಿಗೆ ವೈಯಕ್ತಿಕ ಪ್ರಜ್ಞೆಯ ಅಥವಾ ಆತ್ಮದ ಸಂಯೋಗ.

“ಆತ್ಮವು ಭಗವತ್‌ ಚೇತನದೊಂದಿಗೆ ಸಂಯೋಗವಾಗುವುದೇ ಯೋಗ, ಪ್ರತಿಯೊಬ್ಬರೂ ಅರಸುತ್ತಿರುವ ಮಹದಾನಂದದೊಂದಿಗೆ ಪುನರ್ಮಿಲನ,” ಪರಮಹಂಸ ಯೋಗಾನಂದರು ಹೇಳಿದ್ದಾರೆ. “ಇದು ಎಷ್ಟು ಸುಂದರವಾದ ನಿರೂಪಣೆಯಲ್ಲವೆ? ಚೇತನದ ನಿತ್ಯ ನೂತನ ಆನಂದದಲ್ಲಿ ನೀವು ಕಾಣುವ ಆನಂದವು ಬೇರೆ ಯಾವುದೇ ಆನಂದಕ್ಕಿಂತ ಮಹತ್ತರವಾದದ್ದು ಮತ್ತು ಯಾವುದೂ ಕೂಡ ನಿಮ್ಮನ್ನು ನಿರುತ್ಸಾಹಗೊಳಿಸಲಾರದು ಎಂಬುದನ್ನು ನೀವು ಮನಗಾಣುತ್ತೀರಿ.”

ಪ್ರತಿಯೊಬ್ಬರೂ ಆ ಶುದ್ಧ ಆನಂದದ ಸ್ಥಿತಿಯನ್ನು ತಲುಪಬಹುದು ಎಂದು ಅವರು ವಿವರಿಸಿದರು, ಆದರೆ ಹಾಗೆ ಮಾಡಲು ಒಂದು ನಿರ್ದಿಷ್ಟ ವಿಧಾನ ಮತ್ತು ಆ ಯೋಗ ವಿಧಾನವನ್ನು ಜೀವನದ ಎಲ್ಲ ಅಂಶಗಳಿಗೂ ಅನ್ವಯಿಸುವ ಬಯಕೆಯ ಅಗತ್ಯವಿರುತ್ತದೆ — ಕೇವಲ ಒಂದು ದಿನವಲ್ಲ, ಬದಲಿಗೆ ಅದರ ನಿಜವಾದ ಪ್ರಯೋಜನಗಳನ್ನು ಆಂತರ್ಯದಲ್ಲಿ ಅರಿತುಕೊಳ್ಳುವವರೆಗೆ ನಿರಂತರವಾಗಿ ಅನ್ವಯಿಸಬೇಕಾಗುತ್ತದೆ.

ಯೋಗದ ಪ್ರಬಲ ಧ್ಯಾನ ತಂತ್ರಗಳು ಮತ್ತು ತತ್ವಗಳನ್ನು — ಉದಾಹರಣೆಗೆ ಪರಮಹಂಸಜಿ ಮತ್ತು ಅವರ ಪ್ರಸಿದ್ಧ ಗುರು ಪರಂಪರೆಯು ಯೋಗದಾ ಸತ್ಸಂಗ ಸೊಸೈಟಿ ಆಫ್ ಇಂಡಿಯಾ/ಸ್ಸೆಲ್ಫ್-ರಿಯಲೈಝೇಷನ್‌ ಫೆಲೋಶಿಪ್‌ನ ಕ್ರಿಯಾ ಯೋಗ ಬೋಧನೆಗಳಲ್ಲಿ ಬೋಧಿಸಿದ್ದಂತಹವು-ಅವುಗಳನ್ನು ಬದುಕನ್ನು ಬದಲಿಸುವ ಫಲಿತಾಂಶಗಳಿಗಾಗಿ ಸಾರ್ವತ್ರಿಕವಾಗಿ ಅನ್ವಯಿಸಬಹುದಾದ ಕಾರಣ, ಯೋಗವನ್ನು ನಿಜವಾಗಿಯೂ ಜಾಗತಿಕವಾಗಿ ಆಚರಿಸಬಹುದು.

ಈ ಕೆಳಗೆ ಕೊಟ್ಟಿರುವ ಪರಮಹಂಸಜಿಯವರ ಸೂಕ್ಷ್ಮ ಪರಿಜ್ಞಾನವು, ಯೋಗವನ್ನು ಎಲ್ಲರಿಗಾಗಿ ಇರುವ ಅತ್ಯಂತ ಸಕಾರಾತ್ಮಕ ಶಕ್ತಿಯೆಂದು ಗೌರವಿಸುತ್ತದೆ, ಮತ್ತು ಕ್ರಿಯಾ ಯೋಗದ ಮಾರ್ಗವು ತನ್ನ ಅತ್ಯುತ್ತಮ ಪ್ರಾಯೋಗಿಕ ತಂತ್ರಗಳಿಂದಾಗಿ ಅನ್ವೇಷಕನನ್ನು ಅಂತಿಮ ಮುಕ್ತಿ ಮತ್ತು ಆನಂದಕ್ಕೆ ಹೇಗೆ ಕರೆದೊಯ್ಯುತ್ತದೆ ಎಂಬುದನ್ನು ತೋರಿಸುತ್ತದೆ. ಏನೇ ಆದರೂ, ಪರಮಹಂಸಜಿ ತಮ್ಮ ಯೋಗಿಯ ಆತ್ಮಕಥೆಯಲ್ಲಿ ಹೇಳಿದಂತೆ, “ಈ ವಿಶ್ವಕ್ಕೆ ಭಾರತದ ಕೊಡುಗೆ ಬೇರಾವುದೂ ಇಲ್ಲದಿದ್ದರೂ ಕ್ರಿಯಾ ಯೋಗವೊಂದೇ ರಾಜೋಚಿತ ಕೊಡುಗೆಯಾಗಲು ಸಾಕು.”