“இனம், நிறம் அல்லது மதத்தை காட்டிலும் ஓர் ஆழமான ஒருங்கிணைப்பைக் கண்டறிதல்” ஸ்வாமி சிதானந்த கிரி

ஸ்வாமி சிதானந்தாவின் செய்தியின் உரை கீழே கொடுக்கப்பட்டுள்ளது:

ஆன்மீகப் பாதையில் இருக்கும் தெய்வீக நண்பர்களே, வாழ்த்துக்களும் வணக்கங்களும்.

அமெரிக்காவிலும் உலகெங்கிலும் பல நகரங்களில் எழுந்துள்ள இன அடிப்படையிலான கொந்தளிப்பு புயல்கள் குறித்து என்னைப் போலவே நீங்களும் ஆழ்ந்த கவலை கொண்டுள்ளீர்கள் என்பதை நான் அறிவேன். இது தொடர்பாக சில கருத்துக்களை உங்களுடன் பகிர்ந்து கொள்ள விரும்புகிறேன்.

முதலில், பிரச்சனையைப் பற்றி தெளிவாக இருப்போம். இன வெறி மற்றும் அநீதி மனித இதயங்களிலும் மனதிலும் உள்ள ஒரு நோயாகும் – நமக்குள் இறைவனுக்கு இடம் அளிக்காத நம்மில் எவரின் இதயங்களிலும் மனதிலும் உள்ள நோய். சமீப நாட்களில், அமெரிக்கா முழுவதும், அந்த நோயின் புதிய எழுச்சியை நாம் கண்டிருக்கிறோம். அமெரிக்கா மட்டுமல்ல: உலகெங்கிலும் உள்ள பெரும்பாலான நாடுகள் இனம், நிறம் மற்றும் நிச்சயமாக பல இடங்கள் மதத்தின் அடிப்படையில் பாகுபாடு, வெறுப்பு ஆகியவற்றால் ஏதேனும் ஒரு அளவிற்கு பாதிக்கப்பட்டுள்ளன.

எந்தவொரு நாள்பட்ட நோயையும் போலவே, அறிகுறிகளுக்கும் நாம் சிகிச்சையளிக்க முடியும் – அது பயனுள்ளதாக இருக்கும், சந்தேகமில்லை – ஆனால் அதற்கான காரணத்தையும் நாம் கவனிக்க வேண்டும்.
இதுபோன்ற சமயங்களில், ஆன்மீக நாட்டமுள்ள அனைத்து இதயங்களும் மனங்களும் தான் உதவ என்ன செய்ய முடியும் என்று தங்களைத் தாங்களே கேட்டுக் கொள்கின்றன. இந்த உலகில் நாம் ஒவ்வொருவரும் வெவ்வேறு பாத்திரங்களை வகிக்கிறோம், வெவ்வேறு திறமைகள் மற்றும் திறன்களுடன்; இதன் பொருள் என்னவென்றால், எந்த நேரத்திலும் நமது மனித குலம் எதிர்கொள்ளும் குறிப்பிட்ட நெருக்கடி அல்லது பிரச்சனையைப் பொறுத்து மற்றவர்களுக்கு சேவை செய்ய நாம் வெவ்வேறு வழிகளில் தகுதி பெற்றுள்ளோம் என்பதாகும்.

நமது SRF மற்றும் YSS உறுப்பினர்களில் பலர் தங்கள் தொழில் மற்றும் தொழில்சார் திறமைகளைப் பயன்படுத்துகிறார்கள், அல்லது அவர்கள் அறநலப் பணி அல்லது உதவியை அளித்து, மற்றவர்களது வாழ்க்கையையும், நமது சமூகத்தையும் உலகத்தையும் மேம்படுத்த உதவுகிறார்கள் என்பதை நான் அறிவேன். இறைவன் அவர்கள் அனைவரையும் ஆசீர்வதிப்பானாக! வறுமை, இன அநீதி மற்றும் மனித அறியாமையின் பிற விளைவுகளை ஒழிக்க உலகம் முழுவதும் தீவிரமாக பங்களிக்கும் ஒவ்வொருவரையும் இறைவன் ஆசீர்வதிப்பானாக.

ஆனால் பரமஹம்ஸ யோகானந்தரின் அனைத்து சீடர்களும், தியானம் சார்ந்த ஆன்மீக போதனைகளை பின்பற்றுபவர்களும் சேவையாற்றக்கூடிய மற்றும் சேவையாற்ற வேண்டிய ஒரு வழி உள்ளது. அது அமைதி உருவாக்குபவராக இருப்பதே ஆகும். தியானத்தின் மூலம் நமக்குள் அமைதியை ஏற்படுத்தி, நாம் வெளிப்படுத்தும் அமைதி, நல்லிணக்கம், பிரார்த்தனை மற்றும் இறை அன்பு ஆகியவற்றின் அதிர்வுகளால் நம்மைச் சுற்றியுள்ள அனைவருக்கும் சேவை செய்வது.

நமது குரு மீண்டும் மீண்டும் வலியுறுத்தியது போல, மனித குலத்திற்கு இத்தகைய மன வேதனையைக் கொணரும் தொடர்ச்சியான சமூகப் பிரச்சினைகளுக்கு ஒரே நிரந்தர தீர்வு நம்மை மாற்றிக் கொள்வதே, நாம் மேலும் அமைதியான, அன்பான, இறைவனை மையமாகக் கொண்டு வாழும் நபர்களாக மாறுவதே ஆகும். அப்படி செய்வதுதான் மூல காரணத்தை களையும். மற்றவை அனைத்தும், சிறந்தவை என்றாலும், அறிகுறிகளை மட்டுமே சரி செய்கின்றன.

எனவே, நாம் கடந்து செல்லும் சிக்கலான காலங்களை குணப்படுத்துவதற்கான நமது பங்களிப்பாக அமைதியை உருவாகுவதற்கும், பரப்புவதற்கும் இப்போதே ஒன்றாக சிறிது நேரம் செலவிடுவோம்.

ஏனென்றால் வெறும் வார்த்தைகள் போதாது. இது போன்ற காலங்களில் – பெரும் தவறான புரிதல், பயம் மற்றும் கோபத்தின் காலங்களில் – நாம் ஒருவருக்கொருவர் பேசிக் கொள்ளும் வார்த்தைகளுக்கு சிறிதளவு பயனே உண்டாகிறது. பெரும்பாலும் அவை எதிர்மறை விளைவையே ஏற்படுத்துகின்றன, ஏனென்றால் மற்ற மனிதர்களுடன் நாம் பேசும் வார்த்தைகள் மிகவும் எளிதில் தவறாகப் புரிந்து கொள்ளப்படுகின்றன. ஆனால் நம் இருதயத்தின் ஆழ்ந்த ஏக்கங்களிலிருந்து இறைவனிடத்துப் பாயும் வார்த்தைகள் – பிரார்த்தனை, தியானம் மற்றும் இறைத் தொடர்பு போன்றவைகளில் – வெறும் மனித உரையின் அனைத்து வடிவங்களையும் தாண்டி ஒரு சக்தியைக் கொண்டுள்ளன.

எனவே எனது பிரார்த்தனை இரண்டு விதமாக உள்ளது: நம் யுகத்தின் நல்லெண்ணம் கொண்ட சீர்திருத்தவாதிகளின் — அனைத்து இன, மத, சமூக, அரசியல் ஒற்றுமையாளர்கள் – பேச்சை நாம் அனைவரும் மரியாதையுடனும், முன்னுரிமை கொடுத்தும் கேட்க வேண்டும் என்று பிரார்த்திக்கிறேன். ஒருவருக்கொருவர் செவிமடுக்கும் அந்த ஆழ்ந்த ஆன்மீக செயலினால், வார்த்தைகள் வெளிப்படுத்தும் உன்னத இலட்சியங்களை, குணமளித்தலை ஊக்குவிக்கும் உணர்வுபூர்வ செயலாக மாற்றக்கூடிய சிறந்த வழியைக் கண்டறிய முயல்வோம்.
ஆனால், அதைவிட முக்கியமாக, இந்த பிரிவினைவாத காலத்தில் நம்முடைய இதயப்பூர்வமான வார்த்தைகள், நம்முடைய இயல்பில் உள்ள அனைத்து சிறந்த உண்மையான, மற்றும் உன்னதமானவற்றின் ஆதாரம் மற்றும் ஊற்றான இறைவனை அடைய வேண்டும் என்று நான் பிரார்த்திக்கிறேன்:

தியானத்தின் உள்ளார்ந்த மௌனத்தில் காணப்படும் அமைதி மற்றும் புரிதலின் சக்தியை நாம் பேசும் மற்றும் கேட்கும் வார்த்தைகளில் வெளிக்கொணர, தேவையான நேரத்தை எடுத்து, நம் ஆன்மாக்களுக்குள் எவ்வளவு ஆழ்ந்து செல்ல வேண்டும் என்பதை உணர்ந்தறிவோம். நாம் ஒருவருக்கொருவர் பேசும் வார்த்தைகளுடன், இறைவனிடம் பேசும் நம் வார்த்தைகளும் செய்யும் பிரார்த்தனைகளும், ஒருவரையொருவர் தாக்கிக் கொள்ளுதலுக்கு இட்டுச் செல்லும் தற்போதைய மோதல்கள் மற்றும் இணக்கமின்மைகளுக்கான நமது எதிர்வினையை வரையறுத்து வடிவமைக்கட்டும்.