“[அகமதாபாத் நிகழ்ச்சி] என் வாழ்வில் இதுவரை நான் பெற்ற அனுபவங்களிலேயே மிகவும் மனநிறைவையும் நிம்மதியையும் அளித்த அனுபவமாக இருந்தது. தியானப்பயிற்சி செய்யவும், இறைப்பாடல்களைப் பாடவும், ஸ்வாமி சிதானந்தஜி அவர்களுடன் ஆனந்தமான சத்சங்கத்தில் பங்கேற்கவும் கிடைத்த வாய்ப்பை எனது பாக்கியமாக, நன்றியுடன் உணர்கிறேன்… அது என் இதயத்தை அன்பும் ஆனந்தமும் நிறைந்த பெருங்கடலால் நிரப்பியது… ஸ்வாமி சிதானந்தஜி அவர்களே, உங்கள் தெய்வீக இருப்பிற்காக நன்றி. அது எனது ஆன்மீகப் பயணத்தை இன்னும் ஆழமான நிலைக்கு உள் எடுத்துச் சென்றது.”

“நொய்டாவில் ஸ்வாமி சிதானந்தஜி அவர்கள் ‘ஆன்மிக ஒளிச்சேர்க்கை’ என்ற தலைப்பில் உரையாற்றிய தியான மண்டபத்தில் நிலவிய வலுவான ஆன்மீக அதிர்வுகளைத் தெளிவாக உணர முடிந்தது. அந்த உரை முடிவடையவே கூடாது என்று நாங்கள் விரும்பினோம்! அன்று அவர் கூறிய வார்த்தைகளின் ஆழத்தை முழுமையாக உள்வாங்க நம் அனைவருக்கும் பல ஆண்டுகள் தேவைப்படுமோ என்று நான் வியக்கிறேன்! அங்கே இருக்க முடிந்ததற்கு நாங்கள் நன்றியுடையவர்களாக இருக்கிறோம்.”

“மதிப்பிற்குரிய ஸ்வாமி சிதானந்தஜி அவர்கள், சன்னியாசிகள் மற்றும் பக்தர்களுடன் சேர்ந்து சென்னையில் நடத்திய ஒருநாள் ஆன்மீக நிகழ்ச்சி, மகிழ்ச்சி நிறைந்த அனுபவமாக இருந்தது…. மேலும், வேகமாக இயங்கும் நவீன உலகில் வாழ்க்கையின் ஏற்றத் தாழ்வுகளை எதிர்கொள்ளும் ஓர் இளைஞருக்கு, குருதேவரின் கிரியா யோகப் போதனைகள் எவ்வாறு நிரந்தர ஆதரவு என்பது குறித்த ஸ்வாமி சிதானந்தஜியின் ஆழ்ந்த கருத்துகள், விலைமதிப்பற்ற நம்பிக்கையை அளித்தன. இந்த நிகழ்ச்சி குருதேவரிடமிருந்து கிடைத்த விலைமதிப்பற்ற அருளாசியாக என் மனதில் என்றும் நிலைத்திருக்கும்.”

“ஸ்வாமி சிதானந்தஜியின் ஒருநாள் நிகழ்ச்சி, என் வாழ்வில் மாற்றத்தை ஏற்படுத்திய ஓர் அனுபவமாக இருந்தது… மூன்று மணி நேர தியானத்தை நம்பமுடியாதவகையில் ஆழமாக அமைதியாக உணர்ந்தேன்…. என் சந்தேகங்கள் அனைத்தும் படிப்படியாகக் கரைந்து போவதைப் போல, அளவற்ற நிம்மதியும் நம்பிக்கையும் என் உள்ளத்தில் ஏற்பட்டதை உணர்ந்தேன். ஸ்வாமிஜி அவர்களின் வருகை ஒரு நிகழ்ச்சியைவிட மேலானதாக இருந்தது; அவருடைய வார்த்தைகள், அவருடைய இருப்பு, மற்றும் அக்கூட்டத்தின் ஒருமித்த சக்தி ஆகியவை என்றும் நிலைத்திருக்கும் ஓர் அனுபவம்.”

“குருதேவரும் YSS-ம் வலியுறுத்தும் அனைத்து கொள்கைகளும் இந்த நிகழ்ச்சியின் மூலம் வெளிப்பட்டன — கருணை, ஒழுங்குமுறை, கனிவு, அமைதி போன்ற சிலவற்றைக் குறிப்பிடலாம். ஸ்வாமி சிதானந்தஜி அவர்களை நேரில் காணும் வாய்ப்பைத் தவிர, வேறு எந்த எதிர்பார்ப்பும் இல்லாமல்தான் நான் இந்த நிகழ்ச்சிக்கு வந்தேன். ஒருபோதும் கற்பனை கூட செய்திராத சிறந்த பல நல்ல விஷயங்களுடன் நான் திரும்பிச் சென்றேன்.”

“என் குடும்பத்தினருடன் [பெங்களூரு] சத்சங்கத்தில் கலந்துகொண்டது, எங்களுடைய தனிப்பட்ட ஆன்ம அனுபூதிப் பாதைகளை வலுப்படுத்தியதோடு மட்டுமல்லாமல், நம்மிடையே உள்ள பொதுவான பிணைப்பையும் கூட ஆழப்படுத்தியது. ஆத்மார்த்தமான வார்த்தைகள், பகிர்ந்துகொண்ட மௌனமான தருணங்கள், மற்றும் சக பக்தர்களின் தளராத அர்ப்பணிப்பு ஆகியவை புதுப்பிக்கப்பட்ட வாழ்வின் நோக்கம் மற்றும் அக அமைதியால் எங்களை நிரப்பின. இந்த மாற்றத்தை ஏற்படுத்திய அனுபவம் எங்கள் ஆன்மாக்களைப் புதுப்பித்து, எங்கள் இதயங்களில் அழியாத தடத்தைப் பதித்துச் சென்றது — ஆன்மீகப் பயிற்சியின் நிலையான ஆற்றலுக்கும், அது நம் வாழ்வின் ஒவ்வொரு பகுதியிலும் கொண்டு வரும் ஒளி மற்றும் மகிழ்ச்சிக்கான ஓர் அழியாத நினைவாகும்.”

“ஸ்வாமிஜியின் எளிமையும், குருதேவரின் தெய்வீக அன்பைப் பிரதிபலித்த அவரது இருப்பும்தான் அனைவராலும் மிகத் தெளிவாகக் காணக்கூடியதாக இருந்தது. அவரது இருப்பு எனும் அருளாசிகளைப் பாக்கியமாகப் பெற்ற நாம் அனைவருமே இந்த அனுபவத்தை நேபாளத்திற்கு அளித்த நமது குருவின் ஒரு சிறப்பு ஆன்மீகப் பரிசாக எப்போதும் நம் நெஞ்சில் போற்றி வளர்ப்போம். ஜெய் குரு”