ಯೋಗದಾ ಸತ್ಸಂಗ ಮಠ — ದಕ್ಷಿಣೇಶ್ವರ

ವೈಎಸ್ಎಸ್ ದಕ್ಷಿಣೇಶ್ವರ ಆಶ್ರಮದಿಂದ ಸುಮಾರು ಒಂದು ಕಿಲೋಮೀಟರ್ ದೂರದಲ್ಲಿ ವಿಶ್ವವಿಖ್ಯಾತ ಕಾಳಿ ದೇವಸ್ಥಾನವಿದೆ. ಮಲಗಿರುವ ಶಿವನ ಎದೆಯ ಮೇಲೆ ನಿಂತು, ತನ್ನ ಭಕ್ತರನ್ನು ಭವಸಾಗರದ ಆಚೆಗೆ ಕರೆದೊಯ್ಯುವ ಭವತಾರಿಣಿಯಾಗಿ ಕಾಳಿ ಮಾತೆಯನ್ನು ಪ್ರತಿಷ್ಠಾಪಿಸಿರುವ ಒಂಬತ್ತು ಗುಮ್ಮಟಗಳ ದೇವಾಲಯಕ್ಕಾಗಿ ದಕ್ಷಿಣೇಶ್ವರವು ಪ್ರಸಿದ್ಧವಾಗಿದೆ. ಈ ದೇವಾಲಯದಲ್ಲಿ, ಶ್ರಮಪೂರ್ವಕವಾಗಿ ಕೆತ್ತಲಾದ ಸಾವಿರ ದಳಗಳ ಬೆಳ್ಳಿಯ ತಾವರೆಯ ಮೇಲೆ ಜಗನ್ಮಾತೆ ಮತ್ತು ಶಿವನ ಸುಂದರವಾದ ವಿಗ್ರಹಗಳಿವೆ.

ತಮ್ಮ ಆತ್ಮಕಥೆಯಲ್ಲಿ, ಯೋಗಾನಂದಜಿಯವರು ಈ ದೇವಸ್ಥಾನಕ್ಕೆ ತಾವು ಮಾಡಿದ ಅನೇಕ ತೀರ್ಥಯಾತ್ರೆಗಳನ್ನು ವಿವರಿಸುತ್ತಾರೆ. ತಮ್ಮ ತಂಗಿ ರೋಮಾ ಮತ್ತು ಅವರ ಪತಿ ಸತೀಶ್ ಅವರೊಂದಿಗೆ ಭೇಟಿ ನೀಡಿದ್ದಾಗ, ಈ ದೇವಸ್ಥಾನದ ಆವರಣದಲ್ಲೇ ಅವರಿಗೆ ಒಂದು ದಿವ್ಯ ದರ್ಶನವಾಗಿತ್ತು. ನಾಸ್ತಿಕರಾಗಿದ್ದ ಸತೀಶ್ ಅವರು, ಜಗನ್ಮಾತೆಗೆ ಯೋಗಾನಂದಜಿಯವರು ಸಲ್ಲಿಸಿದ ಭಕ್ತಿಪೂರ್ವಕ ಪ್ರಾರ್ಥನೆಗಳ ಮೂಲಕ ಮೌನ ಸಂತರಾಗಿ ಪರಿವರ್ತಿತರಾದರು. ಕರುಣಾಮಯಿ ಮಾತೆಯ ರೂಪದಲ್ಲಿ ದೇವರ ಮೇಲಿದ್ದ ಪರಮಹಂಸ ಯೋಗಾನಂದಜಿಯವರ ಪ್ರೀತಿಯು ಅವರನ್ನು ಈ ದೇವಸ್ಥಾನಕ್ಕೆ ಆಗಾಗ್ಗೆ ಆಕರ್ಷಿಸುತ್ತಿತ್ತು. ಅಲ್ಲಿ ಅವರು ಮುಖಮಂಟಪದಲ್ಲಿ, ಶ್ರೀ ರಾಮಕೃಷ್ಣ ಪರಮಹಂಸರ ಕೋಣೆಯಲ್ಲಿ, ಹಾಗೂ ಶ್ರೀ ರಾಮಕೃಷ್ಣ ಪರಮಹಂಸರಿಗೆ ಜ್ಞಾನೋದಯವಾದ ಪಂಚವಟಿಯಲ್ಲಿರುವ ಆಲದ ಮರದ ಕೆಳಗೆ ಹಲವಾರು ಗಂಟೆಗಳ ಕಾಲ ಧ್ಯಾನ ಮಾಡುತ್ತಿದ್ದರು. ದೇವಸ್ಥಾನದ ಆವರಣದಲ್ಲಿರುವ, ಶ್ರೀ ರಾಮಕೃಷ್ಣರು ತಮ್ಮ ಜೀವನದ ಕೊನೆಯ 14 ವರ್ಷಗಳನ್ನು ಕಳೆದ ಪವಿತ್ರ ಕೋಣೆಯನ್ನು ಒಂದು ಪುಣ್ಯಸ್ಥಳವಾಗಿ ಸಂರಕ್ಷಿಸಲಾಗಿದೆ. ಅಲ್ಲಿ ಭಕ್ತರು ಧ್ಯಾನ ಮಾಡಬಹುದು ಮತ್ತು ಅವರು ಬಳಸಿದ ಹಲವಾರು ವಸ್ತುಗಳನ್ನು ಪ್ರದರ್ಶನದಲ್ಲಿ ನೋಡಬಹುದು.

ಗಂಗಾ ನದಿಯ ತೀರದಲ್ಲಿರುವ ಈ ಸ್ಥಳವು ರಸ್ತೆ, ರೈಲು, ಮೆಟ್ರೋ ಮತ್ತು ದೋಣಿ ಸೇವೆಗಳ ಮೂಲಕ ನಗರದೊಂದಿಗೆ ಉತ್ತಮವಾಗಿ ಸಂಪರ್ಕ ಹೊಂದಿದೆ. ದೇವಾಲಯದ ವಾತಾವರಣವು ಭಕ್ತರು ಮತ್ತು ಯಾತ್ರಿಕರಿಗೆ ಆಳವಾದ ಧ್ಯಾನದಲ್ಲಿ ತೊಡಗಲು ಮತ್ತು ಜಗನ್ಮಾತೆಯೊಂದಿಗೆ ಆಧ್ಯಾತ್ಮಿಕವಾಗಿ ಸಂಪರ್ಕ ಸಾಧಿಸಲು ಸಹಜವಾದ ವಾತಾವರಣವನ್ನು ಒದಗಿಸುತ್ತದೆ.