ఆలోచనకూ మేధస్సుకూ అతీతమైనది: అపరిమిత అంతర్దృష్టి కలిగించే ఆత్మసహజావబోధం

“నేను శ్వాసను కాను; నేను శరీరాన్ని కాదు, ఎముకలు లేక కండ కాదు. నేను మనసును లేక అనుభూతిని కాదు. శ్వాసకు, శరీరానికి, మనసుకు, అనుభూతికి వెనుక ఏది ఉందో అది నేను.” మీరు శరీరము లేక మనసు కాదని ఎరిగి, ఈ ప్రపంచ చైతన్యానికి అతీతంగా వెళ్ళినపుడు, అయినా ఎప్పటికన్నాఇప్పుడే మీ ఉనికి మీకు ఎరుకలో ఉంటే — ఆ దివ్య చైతన్యమే మీరు. ఈ విశ్వంలోని ప్రతిదీ దేనిలో పాదుకొని ఉందో అదే మీరు.

పరిణతి చెందిన విద్యార్థి తన ఆలోచనలు కరిగి సహజావబోధంగా మారేవరకు గాఢంగా ధ్యానం చెయ్యాలి. ఆలోచనా తరంగాలు లేని సహజావబోధం అనే సరస్సులో, యోగి ఆత్మ అనే చంద్రుడి ప్రతిబింబాన్ని దర్శిస్తాడు.

సహజావబోధం అభివృద్ధి చెందకపోవడం వల్ల తప్పుడు నిర్ణయాలు సంభవిస్తాయి. . .

మన తప్పుడు తీర్మానాలకు కారణం సహజావబోధం అభివృవృద్ధి చెందకుండా ఉండడం. మీలో చాలామంది మీరు గొప్పగా ఉండి, గొప్ప పనులు చేయాల్సిన వారమని అనుకుంటూ ఉంటారు; కానీ మీలో సహజావబోధనా శక్తి లేకపోవడంవల్ల, ఆ సామర్ధ్యం చాలావరకు నిద్రాణంగా ఉండిపోయింది.

మీ మనసు చేసే నిర్ణయాలు ఇంద్రియాలు తమకందించిన సమాచారాన్ననుసరించి ఉండడం వల్ల, మీ ఇంద్రియాలు ఒకవేళ పొరపాటు పడితే, మీరు ఒక వ్యక్తి లోపల నిజంగా ఎలాంటి వాడో తెలుసుకోకుండా అతడు చాలా అద్భుతమైన వ్యక్తి అని భావించవచ్చు. మీ ఆత్మ బంధువు దొరికాడన్న భావనతో వివాహ బంధంలో చిక్కుకోవచ్చు; తరువాత విడాకుల కోర్టులో దానికి ముగింపు పాడవచ్చు. అయితే సహజావబోధం ఎన్నడూ అలాంటి తప్పులు చేయదు. అది ఆ కళ్లలోని ఆకర్షణ శక్తిని చూడదు. లేక ఆకర్షణీయమైన ముఖం లేదా వ్యక్తిత్వం వంక చూడదు. కానీ హృదయంలో ఆవ్యక్తి నిజంగా ఎలాంటివాడో అనుభూతి చెంది గుర్తిస్తుంది.

. . .అభివృద్ధి చెందిన సహజావబోధం జీవితంలో విజయాన్ని అందిస్తుండగా:

అభివృద్ధి చెందాలన్నా, పొరపాట్లు చేయడం అనే కష్టాన్ని తప్పించు కోవాలన్నా, ప్రతీ దానిలోనూ సత్యం ఏమిటో మీరు తెలుసుకోవాలి. మీరు మీ సహజావబోధాన్ని పెంపొందించుకోగలిగితేనే ఇది సాధ్యమవుతుంది. పదార్ధానికి సంబంధించిన ఆచరణాత్మక సత్యం ఇదే. అందుకే సహజావబోధనా శక్తిని పెంపొందించుకొని ఉపయోగించ మని నేను చెబుతుంటాను. ఇతరులతో మీ సంబంధాలలోనూ, మీ వ్యాపారంలోనూ, వైవాహిక జీవితంలోనూ, మీజీవితంలోని ప్రతీ భాగంలోనూ సహజావబోధం అతి ముఖ్యం. మీలో సహజావబోధనా సామర్ధ్యం లేకపోవడం వల్ల మీరు తప్పుడు నిర్ణయాలు తీసుకుంటారు, తప్పు వ్యాపార భాగ్యస్వాములను ఎంచుకుంటారు, ఇంకా తప్పుడు వ్యక్తి గత సంబంధాలలో చిక్కుకుంటారు.

విజయానికి భౌతిక మార్గాలమీదే ఆధారపడడం లో అనిశ్చతి ఉంది. కానీ విజయానికి సహజావబోధనా మార్గం వేరుగా ఉంటుంది. సహజావబోధనాధారిత గ్రహణశక్తి ఎప్పుడూ పొరపాటు కాదు. అది ఒక ఆంతరిక అనుభూతి వల్ల కలుగుతుంది, దానివల్ల మీరు మీ నిర్దేశిత మార్గంలో వెళ్ళడం వల్ల విజయులవుతారో లేదో ముందే తెలుసుకుంటారు.

చాలామంది వ్యక్తులు సహజావబోధం లేక ఏమాత్రం లాభకరంకాని ఆర్ధిక పెట్టుబడులు పెడతారు, ఫలితంగా సమస్తమూ కోల్పోతారు. నేను నా ప్రతీ నిర్ణయమూ సహజావబోధంతో తీసుకోవడం వల్ల నా నిర్ణయాలన్నిటిలో విజయాన్నే పొందాను. అదెప్పుడూ ఓడిపోదు.

వైజ్ఞానిక సంబంధ వ్యక్తి కానీ, వ్యాపారి కానీ లేక విజయాన్ని ఆశిస్తున్న ఏ వ్యక్తి అయినా పుస్తకాలమీద, కళాశాల అధ్యయనం మీద కాక, తన మెదడులోని కణాల గ్రహణ శక్తిని పెంపొందించుకోవడం మీద శ్రద్ధ పెడితే ఎక్కువ విజయం సాధించ గలుగుతాడు. ప్రపంచం, పుస్తకాలతో, బాహ్యమైన పద్ధతులతో మొదలుపెడుతుంది, కానీ మీరు మీ సహజావబోధం యొక్క గ్రహణశక్తిని పెంచుకోవాలి. మీలోనే సమస్త జ్ఞానానికి సంబంధించిన అనంత సమాచార కేంద్రం ఉంది.