యోగాదా సత్సంగ శాఖా ఆశ్రమం — నోయిడా
MENU
జనవరి 3, 2010న ప్రారంభించబడిన యోగదా సత్సంగ శాఖా ఆశ్రమం, నోయిడా, భారతదేశంలోని ఐదు వై.ఎస్.ఎస్. ఆశ్రమాలలో ఒకటి. ఇది శ్రీ శ్రీ పరమహంస యోగానంద గారి ఆధ్యాత్మిక మరియు మానవ సేవా కార్యక్రమాలను కొనసాగించడానికి అంకితం చేయబడింది.
ఢిల్లీ-ఉత్తరప్రదేశ్ సరిహద్దు నుండి కేవలం నాలుగు కిలోమీటర్ల దూరంలో, ఐదు ఎకరాల ప్రాంగణంలో నిర్మించబడిన ఈ ఆశ్రమం, ఆధునిక నగర జీవితంలోని హడావుడి మధ్య జాతీయ రాజధాని ప్రాంతం (ఎన్.సి.ఆర్) లోని సాధకులకు ప్రశాంతత మరియు నూతనోత్తేజాల కోసం ఒక పవిత్రమైన స్థలాన్ని అందించే ఆధ్యాత్మిక ఒయాసిస్ (ఎడారిలో నీటిచెలమ) వలె నిలుస్తోంది.
ఈ ఆశ్రమం యొక్క పవిత్రమైన ప్రశాంత వాతావరణంలోకి వచ్చి, మీ మనస్సును మరియు ఆత్మను ఉత్తేజపరిచే ప్రశాంత స్పందనలను ఇక్కడ అనుభూతి చెందడానికి మిమ్మల్ని ఆహ్వానిస్తున్నాము. ఇక్కడ మీరు మన సన్యాసుల నుండి వై.ఎస్.ఎస్. బోధనల అధ్యయనానికి మరియు సాధన చేయడానికి సంబంధించిన ఆధ్యాత్మిక సలహాలు, మార్గదర్శకత్వం పొందవచ్చు.
ధ్యాన మందిరం
ఆశ్రమం మధ్యలో విశాలం మరియు ప్రశాంతమైన ధ్యానమందిరం ఉంటుంది. భక్తిపూర్వక సమావేశాలకు తోడ్పడటానికి మరియు గాఢమైన నిశ్చలతను పెంపొందించడానికి రూపొందించబడిన ఈ మందిరం, రోజువారీ ధ్యానాలు, సామూహిక ఏకాంత ధ్యానవాసాలు, సంగమాలు మరియు ప్రత్యేక ఆధ్యాత్మిక కార్యక్రమాలకు ప్రశాంతమైన మరియు ఆనందకరమైన వాతావరణాన్ని అందిస్తుంది. అంతర్ముఖులై దైవానుసంధానంలోని ఆనందాన్ని మరియు శాంతిని అనుభవించమని, ఈ ఆశ్రమంలోని ప్రశాంతమైన, చింతనాత్మక వాతావరణం భక్తులను ఆహ్వానిస్తుంది.
ఆశ్రమప్రాంగణం మరియు సౌకర్యాలు
ఆశ్రమంలో అందంగా తీర్చిదిద్దబడిన ధ్యానప్రాంగణం మధ్యలో గురుదేవులు పరమహంస యోగానంద గారి చిత్రపటంతో కూడిన వన వేదిక ఉంటుంది; ఇది సందర్శకులకు ధ్యానం, ప్రార్థన మరియు నిశ్శబ్ద చింతన కోసం ప్రశాంతమైన ప్రదేశాన్ని అందిస్తుంది. పుష్పించే వృక్షాలు, పచ్చని పచ్చిక బయళ్ళు మరియు నీడనిచ్చే దారులతో శోభిల్లుతూ, ఆధ్యాత్మిక సాధనకు అనుకూలమైన ప్రశాంత వాతావరణాన్ని ఆశ్రమ ప్రాంగణం సృష్టిస్తుంది.
ఆశ్రమానికి కేంద్రబిందువైన పరిపాలనా భవనంలో రిసెప్షన్ ప్రాంతం, పుస్తకాల గది మరియు గ్రంథాలయం, సమావేశం గదులు, వంటగది, భోజన సదుపాయాలు, కార్యాలయాలు మరియు సన్యాసులు నివసించే గదులు ఉన్నాయి. ఇందులోనే, ఎన్.సి.ఆర్. ద్వారా ప్రయాణించే భక్తుల స్వల్పకాలిక బస కోసం పరిమితమైన వసతి సదుపాయాలు కూడా ఉన్నాయి. ఇవి ముందుగా నమోదు చేసుకోవడాన్ని బట్టి లభ్యమవుతాయి.
ప్రత్యేక ఏకాంత ధ్యానవాసం అవకాశాలు
నోయిడా ఆశ్రమం యొక్క విలక్షణమైన లక్షణం – భక్తుల ఆధ్యాత్మిక ఏకాంతవాసాలకు తోడ్పడటానికి నిర్మించబడిన రెండు ఏకాంత ధ్యానవాస భవనాలు. పురుషులు మరియు మహిళలకు ప్రత్యేక సౌకర్యాలతో, ప్రతి భవనంలో ఒక్కొక్క వ్యక్తికి, ఆధ్యాత్మిక అధ్యయనం, ధ్యానం మరియు ఆత్మపరిశీలనలకు అనుకూలమైన ఏకాంతాన్ని అందించే సింగిల్ గదులు 30 ఉన్నాయి. తమ సాధనను మరింత గాఢంగా చేసుకోవడానికి మరియు నివాసులైన సన్యాసుల నుండి ఆధ్యాత్మిక సలహాలు, మార్గదర్శకత్వం పొందడానికి వ్యక్తిగత ఏకాంతవాసాలను చేపట్టడానికి భక్తులకు స్వాగతం.
అదనంగా, వై.ఎస్.ఎస్. సన్యాసుల నేతృత్వంలో సామూహిక ఏకాంత ధ్యానవాసాలను క్రమబద్ధంగా, చాలామటుకు వారాంతాల్లో, ఈ ఆశ్రమం నిర్వహిస్తుంది. ఈ ఏకాంత ధ్యానవాసాలు మన ప్రియమైన గురుదేవుల బోధనలలోని జీవించడం-ఎలా సూత్రాలు, అలాగే ఏకాగ్రత మరియు ధ్యాన ప్రక్రియల నుండి తీసుకోబడిన నిర్దిష్ట అంశాలపై రూపొందించబడి ఉంటాయి.
బాలల సత్సంగం
వై.ఎస్.ఎస్. నోయిడా ఆశ్రమం ప్రతి ఆదివారం బాలల సత్సంగాన్ని నిర్వహిస్తుంది. దీని ద్వారా, పరమహంస యోగానంద గారి జీవించడం-ఎలా సూత్రాలు మనస్సును ఆకట్టుకునే ప్రశాంతమైన వాతావరణంలో యువమనస్సులకు స్ఫూర్తిదాయకంగా పరిచయం చేయబడతాయి. వాలంటీర్ల మార్గదర్శకత్వంలో పిల్లలు శక్తిపూరణ వ్యాయామాలు, స్వల్పకాలిక ధ్యానం, భజన, కథలు చెప్పడం మరియు సృజనాత్మకత, ఏకాగ్రత, వ్యక్తిత్వం మరియు దేవునితో ప్రేమపూర్వక వ్యక్తిగత సంబంధాన్ని పెంపొందించడానికి రూపొందించిన ఇతర సామూహిక కార్యకలాపాలలో పాల్గొంటారు.
ధార్మిక మరియు మానవసేవా కార్యక్రమాలు
వై.ఎస్.ఎస్. నోయిడా ఆశ్రమం, నోయిడా మరియు దాని పరిసర ప్రాంతాల్లోని పేదల కోసం సహాయక చర్యలు, వైద్య సేవలు మరియు విద్యా సహాయ కార్యక్రమాలతో సహా వివిధ సేవా కార్యకలాపాలను కూడా నిర్వహిస్తుంది. ఆశ్రమప్రాంగణంలో పాఠశాల విద్యార్థుల కోసం ఉచిత కోచింగ్ సెంటర్, వైద్యశాల మరియు చికిత్సాలయాలు అర్హత మరియు అనుభవం కలిగిన వైద్యులు మరియు ఉపాధ్యాయుల సహాయంతో నిర్వహించబడతాయి — ఇందులో వాలంటీర్లుగా సేవలందించేవారిలో చాలామంది వై.ఎస్.ఎస్. భక్తులే.
సమాజంలోని నిర్భాగ్యులైన వర్గాలకు సేవలందిస్తున్న ఎంపిక చేయబడిన పాఠశాలలకు కూడా ఆశ్రమం సహాయం అందిస్తుంది – ఒక భక్తుడు తన నివాసంలో పేదపిల్లల కోసం నిర్వహిస్తున్న ఒక అనధికారిక కోచింగ్ సెంటర్ అయిన పరమహంస యోగానంద స్వర్ణ బాల వాటిక ఒక ఉదాహరణ.
వై.ఎస్.ఎస్. కు కొత్తవారా?
గృహ-అధ్యయన పాఠ్యక్రమం అయిన వై.ఎస్.ఎస్. పాఠాలు, మీరు ఊహించని విధంగా మీ జీవితంలో పరివర్తన చేకూర్చి, సమతుల్యము మరియు విజయవంతమైన జీవితాన్ని గడపడానికి ఎలా సహాయపడతాయో మరింతగా తెలుసుకోండి.
ప్రతి వారం కార్యక్రమాలు
అందరూ పాల్గొనేలా ధ్యానం మరియు సత్సంగాలను ప్రతిదినం మేము అందిస్తున్నాం. ఈ సమావేశాలు నియమిత సమయంపాటు నిశ్శబ్ద ధ్యానం, భక్తి గీతాలాపన మరియు స్ఫూర్తిదాయక పఠనంతో కూడి ఉంటాయి.
ఈ సమావేశాలలో 6 నుండి 12 సంవత్సరాల పిల్లలు, ఆసక్తికరమైన కార్యక్రమాల ద్వారా వై.ఎస్.ఎస్. బోధనలు మరియు జీవన విధానం గురించి నేర్చుకునే అవకాశం ఉంది. ఈ కార్యక్రమాలలో కథ చెప్పడం, సంక్షిప్త నిర్దేశిత ధ్యానాలు మరియు ఇతర పారస్పరిక (interactive) బోధనా పద్ధతులు ఉంటాయి. మరింతగా తెలుసుకోండి.
తాజా సమాచారం మరియు కార్యక్రమ ప్రకటనలను పొందడానికి వై.ఎస్.ఎస్. ఈన్యూస్ కోసం సైన్ అప్ లో నమోదు చేసుకోండి
రాబోయే ప్రత్యేక కార్యక్రమాలు మరియు దీర్ఘ ధ్యానాలు
ధ్యానం (వై.ఎస్.ఎస్. సన్యాసులచే విర్వహణ): ఉదయం 7:00 - రాత్రి 7:00 - శనివారం మరియు ఆదివారం
మీ సందర్శనకు ఏర్పాట్లు చేసుకోండి
మీరు పగటిపూట ఆశ్రమాన్ని సందర్శించాలనుకుంటున్నారా?
వై.ఎస్.ఎస్. నోయిడా ఆశ్రమం అన్ని రోజులూ తెరిచి ఉంటుంది. సామూహిక ధ్యానంలో పాల్గొనడానికి, ఆదివారం సత్సంగానికి హాజరు కావడానికి లేదా ఆశ్రమ ప్రాంగణంలోని ప్రశాంతతను ఆస్వాదించడానికి మేము మిమ్మల్ని ఆహ్వానిస్తున్నాము. మీకు ఆశ్రమం యొక్క నిర్దేశిత యాత్రపై ఆసక్తి ఉంటే, దయచేసి అపాయింట్‌మెంట్ తీసుకోవడానికి మా రిసెప్షన్ విభాగాన్ని సంప్రదించండి.
సమయం:
- ఆశ్రమ ప్రాంగణాలు మరియు ధ్యాన మందిరం – ప్రతి రోజూ సందర్శకులందరికీ ఉదయం 7:00 నుండి రాత్రి 7:00 వరకు తెరిచి ఉంటాయి
- ఆహ్వాన కేంద్రం మరియు పుస్తకాల గది:
- సోమవారం నుండి శనివారం వరకు – ఉదయం 9:00 నుండి సాయంత్రం 5:00 వరకు
- ఆదివారం – ఉదయం 11:30 నుండి సాయంత్రం 5:00 వరకు
వ్యక్తిగత ఏకాంత ధ్యానవాసాన్ని ప్లాన్ చేసుకోండి లేదా ఆశ్రమంలో నిర్వహించబడే ఏకాంత ధ్యానవాసంలో పాల్గొనండి.
వై.ఎస్.ఎస్./ఎస్.ఆర్.ఎఫ్. పాఠాల విద్యార్థులు ఆశ్రమంలో ఏడు రోజుల వరకు బస చేయడానికి స్వాగతం. పునరుత్తేజం మరియు పునరుజ్జీవనం పొందేందుకు భక్తులు ఒక వ్యక్తిగత ఏకాంత ధ్యాన వాసం లేక నిర్వహించబడే ఏదో ఒక ఏకాంత ధ్యాన వాసంలో మాతో కలిసి పాల్గొనమని మేము ప్రోత్సహిస్తున్నాం. ఈ ఏకాంత ధ్యాన వాసాల సందర్భంగా, వై.ఎస్.ఎస్. సన్యాసులు ప్రతి రోజు రెండుసార్లు నిర్వహించే సామూహిక ధ్యానాలలో మీరు పాల్గొని, యోగదా సత్సంగ బోధనల అభ్యాసం మరియు అధ్యయనంలో ఆధ్యాత్మిక సలహా మరియు మార్గనిర్దేశం పొందవచ్చు.
ఆశ్రమంలో వసతిని అభ్యర్థించడానికి క్రింద ఉన్న బటన్ మీద దయచేసి క్లిక్ చేయండి.
మమ్మల్ని సంప్రదించండి
ఎలా చేరుకోవాలి
నోయిడా సెక్టార్ 62లో ఉన్న వై.ఎస్.ఎస్. నోయిడా ఆశ్రమం, విమాన, రైలు మరియు రోడ్డు రవాణా ద్వారా దేశవ్యాప్తంగా అద్భుతమైన అనుసంధానతను కలిగి ఉంది, అలాగే ఢిల్లీ-ఎన్.సి.ఆర్. లోపల నడుస్తున్న విస్కృతమైన మెట్రో నెట్‌వర్క్ కు కూడా అందుబాటులో ఉంది. మీ సందర్శనకు అత్యంత అనుకూలమైన ప్రయాణ విధానాన్ని తెలుసుకోవడానికి దయచేసి క్రింది వివరాలను చదవండి.
ఢిల్లీ-ఎన్.సి.ఆర్. మరియు చుట్టుపక్కల ప్రాంతాలకు సేవలందిస్తున్న మూడు విమానాశ్రయాల నుండి వై.ఎస్.ఎస్. నోయిడా ఆశ్రమానికి చేరుకోవచ్చు. మూడు విమానాశ్రయాల నుండి ప్రీ-పెయిడ్ టాక్సీలు మరియు ఓలా, ఊబర్ వంటి యాప్ ఆధారిత క్యాబ్ సేవలు అందుబాటులో ఉన్నాయి.
ఇందిరా గాంధీ అంతర్జాతీయ విమానాశ్రయం (DEL), న్యూ ఢిల్లీ:
సుమారు 32 కి.మీ. దూరంలో ఉన్న ఈ విమానాశ్రయం, ఆశ్రమానికి సమీపంలో ఉన్న ప్రధాన అంతర్జాతీయ మరియు దేశీయ విమానాశ్రయం. ఇది భారతదేశంలోని ప్రధాన నగరాలకు మరియు ప్రపంచవ్యాప్తంగా ఉన్న గమ్యస్థానాలకు విస్తృతమైన అనుసంధానతను కలిగి ఉంది. ఇక్కడి నుండి ఆశ్రమానికి రోడ్డు మార్గంలో ప్రయాణం సాధారణంగా సుమారు 1 గంట పడుతుంది.
నోయిడా అంతర్జాతీయ విమానాశ్రయం (DXN), జేవర్, ఉత్తరప్రదేశ్:
ఆశ్రమం నుండి సుమారు 70 కి.మీ. దూరంలో ఉన్న ఈ కొత్త విమానాశ్రయం ప్రస్తుతం దేశీయ మార్గాలకు మాత్రమే సేవలు అందిస్తోంది. ఈ విమానాశ్రయం నుండి, యమునా ఎక్స్‌ప్రెస్‌వే మీదుగా వెళ్లే మార్గం తిన్నగా నోయిడా వైపు తీసుకుని వెళుతుంది; దీనిపై ట్రాఫిక్‌ను బట్టి ఆశ్రమానికి ప్రయాణం సుమారు 1.5–2 గంటలు పడుతుంది.
హిండన్ విమానాశ్రయం (HDO), ఘజియాబాద్, ఉత్తరప్రదేశ్:
ఆశ్రమం నుండి సుమారు 16 కి.మీ. దూరంలో ఉన్న హిండన్ విమానాశ్రయం, భారతదేశంలోని కొన్ని నగరాల నుండి వచ్చే సందర్శకులకు, పైన పేర్కొన్న విమానాశ్రయాలకు అనుకూలతతో ప్రత్యామ్నాయంగా పనిచేసే దేశీయ విమానాశ్రయం. అక్కడి నుండి ఆశ్రమానికి రోడ్డు ప్రయాణం సుమారు 30–35 నిమిషాలు పడుతుంది.
మీ ప్రయాణ ఏర్పాట్లు చేసుకునే ముందు దయచేసి తాజా విమాన షెడ్యూల్‌ను మరియు విమానాశ్రయ సమాచారాన్ని చూడండి.
నోయిడాలోని వై.ఎస్.ఎస్. ఆశ్రమం చేరుకోవడానికి, సందర్శకులు ఢిల్లీ-ఎన్.సి.ఆర్. లోని క్రింది రైల్వే స్టేషన్లలో ఒకదానికి రైలులో ప్రయాణించవచ్చు — దేశంలోని వివిధ ప్రాంతాల నుండి అనేక దూర ప్రయాణ ఎక్స్-ప్రెస్ మరియు సూపర్‌ఫాస్ట్ రైళ్లు ఇక్కడికి సేవలు అందిస్తాయి. ఈ స్టేషన్లలో దేని నుండైనా, సందర్శకులు టాక్సీ, యాప్ ఆధారిత క్యాబ్ లేదా ఆటో-రిక్షా ద్వారా ఆశ్రమానికి వెళ్లవచ్చు. ఢిల్లీ మెట్రో ద్వారా ప్రయాణించడానికి సమాచారం కోసం, దయచేసి దిగువన ఉన్న “మెట్రో ద్వారా” విభాగాన్ని చూడండి.
న్యూఢిల్లీ రైల్వే స్టేషన్ (NDLS):
న్యూఢిల్లీ – ఉత్తర, పశ్చిమ, మధ్య, తూర్పు మరియు దక్షిణ భారతదేశం అంతటా విస్తృతమైన అనుసంధానాలతో కూడిన ప్రధాన రైల్వే కేంద్రం. ఆశ్రమం ఈ స్టేషన్ నుండి సుమారు 20 కి.మీ. దూరంలో ఉంది, రోడ్డు మార్గంలో చేరుకోవడానికి 40–45 నిమిషాలు పడుతుంది.
ఓల్డ్ ఢిల్లీ రైల్వే స్టేషన్ (DLI):
ఢిల్లీ జంక్షన్ అని కూడా పిలువబడే ఈ రైల్వేస్టేషన్, భారతదేశంలోని ఉత్తర, పశ్చిమ మరియు తూర్పు ప్రాంతాలకు విస్తృతమైన అనుసంధానతను కలిగి ఉంది. ఈ స్టేషన్ నుండి ఆశ్రమం సుమారు 22 కి.మీ. దూరంలో ఉంది, రోడ్డు మార్గంలో ప్రయాణానికి సుమారు 40–45 నిమిషాలు పడుతుంది.
హజ్రత్ నిజాముద్దీన్ రైల్వే స్టేషన్ (NZM):
ఆశ్రమం నుండి సుమారు 18 కి.మీ. దూరంలో ఉన్న హజ్రత్ నిజాముద్దీన్, ఉత్తర, పశ్చిమ, మధ్య, దక్షిణ మరియు తూర్పు భారతదేశంలోని అనేక ప్రాంతాలకు ప్రత్యక్ష అనుసంధానతతో కూడిన ప్రధాన సుదూర రైలు కేంద్రం. ఆశ్రమానికి రోడ్డు ప్రయాణం సాధారణంగా 35–40 నిమిషాలు పడుతుంది.
ఘజియాబాద్ రైల్వే స్టేషన్ (GZB):
ఆశ్రమం నుండి సుమారు 10 కి.మీ. దూరంలో ఉన్న ఘజియాబాద్, ఢిల్లీ-ఎన్.సి.ఆర్.కు సేవలందిస్తున్న ఒక ముఖ్యమైన రైల్వే జంక్షన్; ప్రత్యేకంగా, ఇది ఉత్తరప్రదేశ్, ఉత్తరాఖండ్ మరియు సమీప ప్రాంతాల నుండి వచ్చే ప్రయాణికులకు సౌకర్యవంతంగా ఉంటుంది. ఆశ్రమానికి తదుపరి రోడ్డు ప్రయాణం సాధారణంగా 25–30 నిమిషాలు పడుతుంది.
ఆనంద్ విహార్ టెర్మినల్ (ANVT):
ఆనంద్ విహార్ ఢిల్లీలోని మరో ప్రధాన సుదూర రైల్వే టెర్మినల్. టెర్మినల్ నుండి ఆశ్రమం సుమారు 9 కి.మీ. దూరంలో ఉంది, రోడ్డు మార్గంలో చేరుకోవడానికి 25–30 నిమిషాలు పడుతుంది.
మీ ప్రయాణ ఏర్పాట్లు చేసుకునే ముందు దయచేసి భారతీయ రైల్వే వెబ్‌సైట్‌లో తాజా షెడ్యూల్ మరియు లభ్యతను జాగ్రత్తగా చూడండి.
ISBT ఆనంద్ విహార్ మరియు కాశ్మీరీ గేట్‌తో సహా, నోయిడా మరియు నోయిడా సమీపంలోని బస్ టెర్మినల్స్ వరకు ఇంటర్-సిటీ బస్సులు నడుస్తాయి. ఈ ప్రదేశాల నుండి, ఆశ్రమానికి తదుపరి ప్రయాణం కోసం టాక్సీలు మరియు ఆటో-రిక్షాలు అందుబాటులో ఉంటాయి.
కారు లేదా ట్యాక్సీలో ప్రయాణించే సందర్శకులు మా గూగుల్ మ్యాప్స్ లింక్‌ను అనుసరించడం ద్వారా నోయిడా ఆశ్రమానికి చేరుకోవచ్చు.
ఢిల్లీ నుండి రోడ్డు మార్గం, సంబంధిత వివరాలు:
- ఢిల్లీ నుండి, ఢిల్లీ-మీరట్ ఎక్స్‌ప్రెస్‌వే (NE-3) తీసుకోండి.
- మీకు ఎడమ వైపుగా అక్షరధామ్ ఆలయాన్ని దాటి, సుమారు 8.5 కి.మీ. నేరుగా కొనసాగండి.
- సెక్టార్ 62/నోయిడా వైపు నిష్క్రమణ (ఎగ్జిట్) తీసుకోండి.
- సెక్టార్ 62 పోలీస్ పోస్ట్ కూడలికి చేరుకుని కుడి వైపు తిరగండి.
- పరమహంస యోగానంద మార్గంలోకి 3వ ఎడమ మలుపు తీసుకోండి.
- పరమహంస యోగానంద మార్గంలో, 1వ కుడి మలుపు తీసుకోండి.
- మలుపు తిరిగిన తర్వాత, మీ ఎడమ వైపున ఉన్న మొదటి భవనమే వై.ఎస్.ఎస్. నోయిడా ఆశ్రమం.
సమీపంలోని ముఖ్య ఆనవాళ్ళు:
- ఒకాయా బిల్డింగ్ పక్కన
- IIM లక్నో, నోయిడా క్యాంపస్ ఎదురుగా
- ఫోర్టిస్ హాస్పిటల్, నోయిడా నుండి సుమారు 2-3 కి.మీ. దూరంలో
ఆశ్రమానికి సమీప మెట్రో స్టేషన్ – ఢిల్లీ మెట్రో బ్లూ లైన్ పైన నోయిడా సెక్టార్ 62 మెట్రో స్టేషన్. స్టేషన్ నుండి ఆశ్రమం సుమారు 2 కి.మీ. దూరంలో ఉంది, క్యాబ్ లేదా ఆటో-రిక్షా ద్వారా చేరుకోవడానికి దాదాపు 10 నిమిషాలు పడుతుంది. విమానాశ్రయం, రైల్వే స్టేషన్, బస్ టెర్మినల్ లేదా ఢిల్లీ-NCR లోని ఇతర ప్రదేశాల నుండి ఆశ్రమానికి ప్రయాణించే సందర్శకులకు మెట్రో సాధారణంగా మరింత పొదుపైన ఎంపిక.
ఇందిరా గాంధీ అంతర్జాతీయ విమానాశ్రయం నుండి (70-80 నిమిషాలు):
మెట్రో సేవలు టెర్మినల్ 1 మరియు టెర్మినల్ 3 రెండింటి నుండీ అందుబాటులో ఉన్నాయి.
- టెర్మినల్ 1 – IGI విమానాశ్రయం నుండి, బొటానికల్ గార్డెన్ వరకు మెజెంతా లైన్ తీసుకోండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి, నోయిడా సెక్టార్ 62 మెట్రో స్టేషన్ వద్ద దిగండి.
- టెర్మినల్ 3 – IGI విమానాశ్రయం నుండి, న్యూ ఢిల్లీ స్టేషన్ వరకు ఆరెంజ్ లైన్ (ఎయిర్‌పోర్ట్ ఎక్స్‌ప్రెస్) తీసుకోండి. అక్కడ యెల్లో లైన్‌కి (మిలీనియం సిటీ సెంటర్ గురుగ్రామ్ వైపు) మారి రాజీవ్ చౌక్ వద్ద దిగండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి నోయిడా సెక్టార్ 62 స్టేషన్ వద్ద దిగండి.
న్యూఢిల్లీ రైల్వే స్టేషన్ నుండి (50-60 నిమిషాలు):
న్యూఢిల్లీ మెట్రో స్టేషన్ నుండి, యెల్లో లైన్ (మిలీనియం సిటీ సెంటర్ గురుగ్రామ్ వైపు) తీసుకుని రాజీవ్ చౌక్ వద్ద దిగండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి నోయిడా సెక్టార్ 62 స్టేషన్ వద్ద దిగండి.
ఓల్డ్ ఢిల్లీ రైల్వే స్టేషన్ నుండి (50-60 నిమిషాలు):
చాందినీ చౌక్ మెట్రో స్టేషన్ వద్ద యెల్లో లైన్ (మిలీనియం సిటీ సెంటర్ గురుగ్రామ్ వైపు) ఎక్కి రాజీవ్ చౌక్ వద్ద దిగండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి నోయిడా సెక్టార్ 62 స్టేషన్ వద్ద దిగండి.
ఆనంద్ విహార్ టెర్మినల్ నుండి (45-55 నిమిషాలు):
ఆనంద్ విహార్ ISBT మెట్రో స్టేషన్ నుండి, పింక్ లైన్ (ఐ.పి. ఎక్స్-టెన్షన్ వైపు) తీసుకుని మయూర్ విహార్ ఫేజ్-I వద్ద దిగండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి నోయిడా సెక్టార్ 62 స్టేషన్ వద్ద దిగండి.
ISBT కశ్మీరీ గేట్ నుండి (60-70 నిమిషాలు):
ISBT కశ్మీరీ గేట్ మెట్రో స్టేషన్ నుండి, వయొలెట్ లైన్ (రాజా నహర్ సింగ్ వైపు) తీసుకుని మండి హౌస్ వద్ద దిగండి. అక్కడ బ్లూ లైన్‌కి (నోయిడా ఎలక్ట్రానిక్ సిటీ వైపు) మారి నోయిడా సెక్టార్ 62 స్టేషన్ వద్ద దిగండి.
మెట్రో మార్గాలు, ఇంటర్‌ఛేంజ్ పాయింట్లు మరియు ప్రయాణ సమయాలు మారవచ్చు. ప్రయాణించే ముందు దయచేసి ఢిల్లీ మెట్రో యొక్క తాజా మార్గం మరియు సేవా సమాచారాన్ని జాగ్రత్తగా చూడండి.