யோகதா சத்சங்க கிளை ஆசிரமம் — நொய்டா

YSS நொய்டா ஆசிரமத்தை, டெல்லி-NCR மற்றும் அதைச் சுற்றியுள்ள பகுதிகளுக்குச் சேவை வழங்கும் மூன்று விமான நிலையங்களிலிருந்தும் எளிதாகச் சென்றடையலாம். மூன்று விமான நிலையங்களிலும் முன்கூட்டியே கட்டணம் செலுத்தி பதிவு செய்யும் டாக்சிகள் மற்றும் Ola, Uber போன்ற செயலி அடிப்படையிலான வாடகைக் கார் சேவைகள் கிடைக்கின்றன.

இந்திரா காந்தி சர்வதேச விமான நிலையம் (DEL), புது டெல்லி:
சுமார் 32 கி.மீ. தொலைவில் அமைந்துள்ள இது, ஆசிரமத்திற்கு அருகிலுள்ள முக்கியமான சர்வதேச மற்றும் உள்நாட்டு விமான நிலையமாகும். இந்தியாவின் முக்கிய நகரங்களுக்கும், உலகெங்கிலும் உள்ள பல்வேறு இடங்களுக்கும் இங்கிருந்து விரிவான விமான இணைப்புகள் உள்ளன. இங்கிருந்து ஆசிரமத்தைச் சாலை வழியாகச் சென்றடைய பொதுவாக சுமார் 1 மணி நேரம் ஆகும்.

நொய்டா சர்வதேச விமான நிலையம் (DXN), ஜேவர், உத்தரப் பிரதேசம்:
ஆசிரமத்திலிருந்து சுமார் 70 கி.மீ. தொலைவில் அமைந்துள்ள ஓரளவு புதிய இந்த விமான நிலையம், தற்போது உள்நாட்டு விமானப் போக்குவரத்தை மட்டுமே வழங்குகிறது. இதன் விமானப் போக்குவரத்து இணைப்புகளில் பெங்களூரு, ஹைதராபாத், ஜெய்ப்பூர், லக்னோ, மும்பை, ஸ்ரீநகர் மற்றும் அமிர்தசரஸ் போன்ற நகரங்கள் அடங்கும். மேலும் பல புதிய வழித்தடங்கள் படிப்படியாக அறிமுகப்படுத்தப்பட்டு வருகின்றன. இந்த விமான நிலையத்திலிருந்து யமுனா எக்ஸ்பிரஸ்வே வழியாக நொய்டாவை நோக்கி நேரடி சாலை இணைப்பு உள்ளது. போக்குவரத்து நெரிசலைப் பொறுத்து, ஆசிரமத்திற்கான பயண நேரம் சுமார் 1½ முதல் 2 மணி நேரம் ஆகும்.

ஹிண்டன் விமான நிலையம் (HDO), காசியாபாத், உத்தரப் பிரதேசம்:
ஆசிரமத்திலிருந்து சுமார் 16 கி.மீ. தொலைவில் அமைந்துள்ள ஹிண்டன் விமான நிலையம், இந்தியாவின் குறிப்பிட்ட சில நகரங்களிலிருந்து வரும் பயணிகளுக்கு மேலே குறிப்பிடப்பட்டுள்ள விமான நிலையங்களுக்கு ஒரு வசதியான மாற்று வழியாக அமையும் உள்நாட்டு விமான நிலையமாகும். இதன் விமான இணைப்புகளில் அகமதாபாத், பெங்களூரு, சென்னை, கோவா, இந்தூர், கொல்கத்தா, மும்பை, பாட்னா மற்றும் வாரணாசி ஆகிய நகரங்களும், சிறிய பிராந்திய நகரங்களும் அடங்கும். இங்கிருந்து ஆசிரமத்தைச் சாலை வழியாகச் சென்றடைய சுமார் 30–35 நிமிடங்கள் ஆகும்.

விமான வழித்தடங்களும் நேரங்களும் மாறக்கூடும் என்பதால் உங்கள் பயணத்தைத் திட்டமிடுவதற்கு முன், சமீபத்திய விமான நேர அட்டவணைகள் மற்றும் விமான நிலையத் தகவல்களைச் சரிபார்க்கவும்.

நொய்டாவில் உள்ள YSS ஆசிரமத்தை சென்றடைய, நாட்டின் பல்வேறு பகுதிகளிலிருந்து வரும் ஏராளமான நீண்டதூர எக்ஸ்பிரஸ் மற்றும் சூப்பர்ஃபாஸ்ட் ரயில்கள் சேவையின் மூலம், டெல்லி-NCR பகுதியில் உள்ள கீழ்க்கண்ட ரயில் நிலையங்களில் ஏதேனும் ஒன்றில் வருகையாளர்கள் இறங்கலாம். இந்த ரயில் நிலையங்களில் ஏதேனும் ஒன்றிலிருந்து, வருகையாளர்கள் டாக்சி, செயலி மூலம் முன்பதிவு செய்யப்படும் வாடகைக் கார் அல்லது ஆட்டோ மூலம் ஆசிரமத்தைத் தொடர்ந்து சென்றடையலாம். டெல்லி மெட்ரோ மூலம் பயணம் செய்வது பற்றிய தகவல்களுக்கு, கீழே உள்ள “மெட்ரோ மூலம்” பகுதியைப் பார்க்கவும்.

புது டெல்லி ரயில் நிலையம் (NDLS):
புது டெல்லி ஒரு முக்கியமான ரயில் மையமாகும். வடக்கு, மேற்கு, மத்திய, கிழக்கு மற்றும் தென்னிந்தியாவின் பல்வேறு பகுதிகளுடன் இங்கிருந்து சிறப்பான ரயில் இணைப்புகள் உள்ளன. மும்பை, அகமதாபாத், கொல்கத்தா, ராஞ்சி, புவனேஸ்வர், திப்ருகர் மற்றும் ஜம்மு போன்ற நகரங்களிலிருந்து ராஜ்தானி மற்றும் துரந்தோ எக்ஸ்பிரஸ் ரயில்கள் இயக்கப்படுகின்றன. மேலும், ஜெய்ப்பூர், லக்னோ, கான்பூர், பாட்னா, போபால், சென்னை, ஹைதராபாத் மற்றும் பிற முக்கிய நகரங்களை இணைக்கும் பல்வேறு முக்கிய ரயில்களும் உள்ளன. ஆசிரமம் ரயில் நிலையத்திலிருந்து சுமார் 20 கி.மீ. தொலைவில் உள்ளது. சாலை வழியாக ஆசிரமத்தைச் சென்றடைய சுமார் 40–45 நிமிடங்கள் ஆகும்.

பழைய டெல்லி ரயில் நிலையம் (DLI):
டெல்லி சந்திப்பு (Delhi Junction) என்றும் அழைக்கப்படும் இந்த ரயில் நிலையம், இந்தியாவின் வடக்கு, மேற்கு மற்றும் கிழக்குப் பகுதிகளுடன் சிறப்பான ரயில் இணைப்புகளைக் கொண்டுள்ளது. அமிர்தசரஸ், ஜம்மு, ஜெய்ப்பூர், அஜ்மீர், ஹரித்வார், ரிஷிகேஷ், லக்னோ, கோரக்பூர் மற்றும் உத்தரப் பிரதேசம், ராஜஸ்தான், பஞ்சாப், உத்தரகாண்ட், பீகார் ஆகிய மாநிலங்களின் பிற நகரங்களுடன் இந்த நிலையத்தை இணைக்கும் முக்கிய ரயில் சேவைகள் உள்ளன. ஆசிரமம் இந்த ரயில் நிலையத்திலிருந்து சுமார் 22 கி.மீ. தொலைவில் உள்ளது. சாலை வழியாகச் செல்ல பொதுவாக 40–45 நிமிடங்கள் ஆகும்.

ஹஸ்ரத் நிஜாமுதீன் ரயில் நிலையம் (NZM):
ஆசிரமத்திலிருந்து சுமார் 18 கி.மீ. தொலைவில் அமைந்துள்ள ஹஸ்ரத் நிஜாமுதீன் ரயில் நிலையம், இந்தியாவின் வடக்கு, மேற்கு, மத்திய, தெற்கு மற்றும் கிழக்குப் பகுதிகளுடன் நேரடி ரயில் இணைப்புகளைக் கொண்ட முக்கியமான நீண்டதூர ரயில் நிலையமாகும். மும்பை மற்றும் ஆகஸ்ட் கிராந்தி ராஜ்தானி ரயில்கள், பெங்களூரு, சென்னை, செகந்தராபாத் மற்றும் திருவனந்தபுரம் ராஜ்தானி ரயில்கள் ஆகியவை இங்கிருந்து இயக்கப்படும் முக்கிய சேவைகளில் அடங்கும். மேலும், மும்பை, பெங்களூரு, ஹைதராபாத், அகமதாபாத், கோவா மற்றும் கொச்சி போன்ற நகரங்களை இணைக்கும் துரந்தோ மற்றும் சம்பர்க் கிராந்தி ரயில் சேவைகளும் உள்ளன. ஆசிரமத்தைச் சாலை வழியாகச் சென்றடைய பொதுவாக 35–40 நிமிடங்கள் ஆகும்.

காசியாபாத் ரயில் நிலையம் (GZB):
ஆசிரமத்திலிருந்து சுமார் 10 கி.மீ. தொலைவில் அமைந்துள்ள காசியாபாத், டெல்லி-NCR பகுதிக்கு சேவை வழங்கும் முக்கியமான ரயில் சந்திப்பாகும். உத்தரப் பிரதேசம், உத்தரகாண்ட் மற்றும் அருகிலுள்ள பகுதிகளிலிருந்து வரும் பயணிகளுக்கு இது குறிப்பாக வசதியானது. லக்னோ, கான்பூர், பிரயாக்ராஜ், வாரணாசி, கோரக்பூர், மொராதாபாத், பரேலி, அலிகர் மற்றும் வடக்கு மற்றும் கிழக்கு இந்தியாவின் பிற முக்கிய நகரங்களுடன் நேரடி மற்றும் இணைப்பு ரயில் சேவைகள் இங்கிருந்து உள்ளன. இங்கிருந்து சாலை வழியாக ஆசிரமத்தைச் சென்றடைய பொதுவாக 25–30 நிமிடங்கள் ஆகும்.

ஆனந்த் விஹார் டெர்மினல் (ANVT):
ஆனந்த் விஹார் டெல்லியில் உள்ள மற்றொரு முக்கியமான நீண்டதூர ரயில் முனையமாகும். பாட்னா, வாரணாசி, கோரக்பூர், லக்னோ, கான்பூர், தர்பங்கா மற்றும் கொல்கத்தா உள்ளிட்ட முக்கிய நகரங்களை இணைக்கும் எக்ஸ்பிரஸ் மற்றும் சூப்பர்ஃபாஸ்ட் ரயில்கள் இங்கிருந்து இயக்கப்படுகின்றன. ஆசிரமம் இந்த ரயில் முனையத்திலிருந்து சுமார் 9 கி.மீ. தொலைவில் உள்ளது. சாலை வழியாக ஆசிரமத்தைச் சென்றடைய சுமார் 25–30 நிமிடங்கள் ஆகும்.

ரயில் வழித்தடங்கள், நேரங்கள் மற்றும் ரயில் நிலையங்களில் நிறுத்தப்படும் விவரங்கள் மாறக்கூடும். உங்கள் பயணத்தைத் திட்டமிடுவதற்கு முன், இந்திய ரயில்வே இணையதளத்தில் சமீபத்திய ரயில்களின் நேர அட்டவணை மற்றும் இருக்கை கிடைக்கும் நிலை ஆகியவற்றைச் சரிபார்க்கவும்.