నేపాల్ విషాద ఘటన గురించి యోగదా సత్సంగ సొసైటీ ఆఫ్ ఇండియా సందేశం

నేపాల్‌లో సంభవించిన విధ్వంసకర వరదల్లో ప్రాణాలు కోల్పోయిన వారికి, తీవ్రంగా ప్రభావితమైన వారందరికీ మా హృదయపూర్వక సానుభూతిని తెలియజేస్తున్నాము. ఈ విషాదంలో కొట్టుకుపోయిన తమ ప్రియమైనవారిని తలచుకుంటూ ఎన్నో కుటుంబాలు, సంఘాలు ఊహించలేని దుఃఖాన్ని ఎదుర్కొంటున్నాయి, అలాగే ఇంకా ఆచూకీ తెలియని వారి కోసం లెక్కలేనంత మంది ఎదురుచూస్తున్నారు. ఈ విపత్తు గురించిన వార్త తెలిసినప్పటి నుండి, మన అధ్యక్షులు శ్రీ శ్రీ స్వామి చిదానంద గిరితో సహా, వై.ఎస్.ఎస్. మరియు ఎస్.ఆర్.ఎఫ్. ఆశ్రమాలకు చెందిన గురుదేవుల సన్యాసులు, సన్యాసినుల యొక్క ప్రార్థనలు ప్రభావితమైన వారందరికీ, అలాగే నేపాల్ మరియు ఆ ప్రాంతమంతటా ఉన్న గురుదేవుల ప్రియమైన, అంకితభావంగల భక్తులందరికీ గాఢంగా ప్రవహిస్తున్నాయి.

ఒక పవిత్రక్షేత్రం వైపు విశ్వాసంతో ప్రయాణిస్తున్న యాత్రికులకు ఇటువంటి విషాదం ఎలా సంభవించిందని చాలా మంది భక్తులు సహజంగానే ప్రశ్నిస్తున్నారు. తీవ్రనష్టం కలిగిన ఇటువంటి సమయాలలో, సృష్టిని మరియు ప్రతి ఆత్మ భగవంతుని వైపు తిరిగి చేసే ప్రయాణాన్ని నియంత్రించే వ్యక్తిగత మరియు సామూహిక కర్మ యొక్క దివ్యనియమాల కార్యాచరణను పరిమితమైన మానవ బుద్ధి పూర్తిగా అర్థం చేసుకోవడానికి ప్రయాసపడుతుంది. కాని విశ్వాసంతో మనం తెలుసుకోగలిగేది ఏమిటంటే, ఈ పవిత్ర యాత్రను చేపట్టడం ద్వారా తమ హృదయాలు భక్తితో అనుసంధానమైన సమయంలో దివంగతులైన ప్రతి ఆత్మ ఇప్పుడు సురక్షితంగా, భద్రంగా ఉండి, ప్రకాశము, సౌందర్యం మరియు స్వేచ్ఛతో నిండిన ఉన్నత లోకానికి ఆరోహించిందని.

మర్త్య జీవితంలోని విపత్తులను, దుఃఖాలను దైవంపై ప్రేమపూర్వక విశ్వాసంతో, ఈ భూమి మన నిజమైన నివాసం కాదనే గ్రహింపుతో చూసినప్పుడు, జీవితంలోని చీకటి క్షణాలలో కూడా భగవంతుని అనంతమైన ప్రేమ, కృప మనలో ప్రతి ఒక్కరితో ఎల్లప్పుడూ ఉంటాయని, అలా ప్రతి ఆత్మ యొక్క జన్మజన్మల యాత్రను అంతిమ మోక్షానికి, పరమానందానికి అవి నడిపిస్తాయని మనం మరింత స్పష్టంగా తెలుసుకుంటాము.