యోగా యొక్క నిజమైన అర్థం

వై.ఎస్.ఎస్./ఎస్.ఆర్.ఎఫ్. అధ్యక్షులు మరియు ఆధ్యాత్మిక అధిపతి అయిన స్వామి చిదానంద గిరి గారు 2017లో భారతదేశంలో మాట్లాడుతూ ఇలా అన్నారు: “మానవాళికంతటికీ సహస్రాబ్దులుగా భారతదేశం అత్యున్నతమైన ఆధ్యాత్మిక సత్యానికి సారథిగా ఉంది. భారతదేశంలోని అత్యుత్తమమైన వాటిని మొదట పాశ్చాత్య దేశాలకు, తరువాత ప్రపంచానికి, మరియు తన ప్రియమైన భారతదేశానికి తిరిగి తీసుకురావడం పరమహంసగారి యొక్క ప్రత్యేక విధి. ఆయన భారతదేశ ఉన్నత నాగరికత యొక్క స్వర్ణయుగమైన ఉన్నత యుగాలకు చేరి భారతదేశ సార్వత్రిక ఆధ్యాత్మికత యొక్క సారాంశాన్ని, స్వచ్ఛమైన దాని రూపంలోనే తీసుకువచ్చారు. అదే యోగా. ఇది ఒక శాస్త్రం, మతం యొక్క తెగ లేదా శాఖ కాదు; మరియు అదే కారణంగా, ఈ విశిష్ట దైవ నిర్ణీత విధానం—యోగా యొక్క ప్రకాశం—నిజంగా మొత్తం మానవాళికి ప్రపంచవ్యాప్త ఆధ్యాత్మిక ఆశీర్వాదం కాగలదు.”

యోగాను అభ్యసించడానికి మరియు దాని అద్భుతమైన ప్రయోజనాలను పొందడానికి ఏ వ్యక్తి నిర్దిష్ట జాతి లేదా తెగ లేదా మతానికి చెందినవారు కానవసరం లేదని పరమహంస యోగానందగారు తరచుగా సూచించారు. ఒక శాస్త్రంగా దాని సార్వత్రికత అనేది, తూర్పు లేదా పశ్చిమ దేశాలలో ఏ దేశానికి చెందిన వారైనా నిజమైన ఫలితాలను పొందడంలోనే ఇమిడి ఉంది.

క్రమం తప్పకుండా యోగా ధ్యానాన్ని అభ్యసించడం ద్వారా, మనమందరం ఆనందం, ప్రేమ, కరుణ మరియు శాంతి యొక్క లోతైన భావాన్ని అనుభవించవచ్చు. మరియు ఈ మార్పులు మనలో కలిగినప్పుడు, అదృశ్యమైన ధర్మం ద్వారా వాటి ప్రభావం బాహ్యంగా కూడా వ్యాపిస్తుంది, మొదట మన కుటుంబంపై, సమాజంపై మరియు తరువాత ప్రపంచంపై విస్తృతంగా వ్యాపిస్తుంది. పరమహంసగారు చెప్పినట్లుగా, “మిమ్మల్ని మీరు సంస్కరించుకొంటే, వేలమందిని మీరు సంస్కరిస్తారు.”

యోగా యొక్క ఒక గొప్ప ప్రయోజనం ఏమిటంటే, మొత్తం మానవాళితో ఏకత్వ భావన ధ్యానులలో వృద్ధి చెందుతుంది. ఒకరి ఆధ్యాత్మిక విశ్వాసాలతో సంబంధం లేకుండా, లేక అటువంటి విశ్వాసాలు లేకున్నా, యోగ శాస్త్రాన్ని అభ్యసించే వారు చివరికి ప్రతిదానిలో మరియు ప్రతి ఒక్కరిలో దైవం ఉన్నారని గ్రహిస్తారు.

అటువంటి సార్వత్రికతతో నిండిన హృదయాలు మరియు మనస్సులు నిజంగా మన కాలానికి ఎంతో అవసరం, సాంకేతిక పురోగతి ఫలితంగా మన ప్రపంచం విపరీతంగా కుంచించుకుపోయి, మనందరినీ అతి దగ్గరగా చేర్చుతోంది. 1951లో ఒక సమావేశం సందర్భంగా, ప్రపంచానికి క్లుప్తంగా తన సందేశాన్ని ఇవ్వవలసిందిగా పరమహంసగారిని అడగడం జరిగింది. మానవాళి తన ఆవశ్యక ఐక్యతను గుర్తించవలసిన ప్రాథమిక అవసరాన్ని గురించి ఆయన మాట్లాడారు—ఆ ప్రవచనాత్మక పదాలు ఈ రోజు ఎంతో ముఖ్యమైనవి, లేదా ఆయన వాటిని మొదట పలికినప్పటి కంటే, మరింత ఎక్కువగా ప్రాముఖ్యమైనవి:

“ప్రపంచంలోని నా సోదర సోదరీమణులారా: దేవుడే మన తండ్రి అని, ఆయన ఒక్కడే అని దయచేసి గుర్తుంచుకోండి. మనమందరం ఆయన సంతానం, కాబట్టి ప్రపంచవ్యాప్తంగా ఉన్న వసుదైక కుటుంబంలో ఆదర్శవంతమైన పౌరులుగా మారడానికి మనమందరం శారీరకంగా, మానసికంగా, ఆర్థికంగా మరియు ఆధ్యాత్మికంగా ఒకరికొకరు సహకరించుకుంటూ నిర్మాణాత్మక మార్గాలను అనుసరించాలి. వెయ్యి మంది వ్యక్తుల సమూహంలో ప్రతి వ్యక్తి ఇతరులను పణంగా పెట్టి అక్రమ సంపాదన, పోరాటం మరియు మోసం ద్వారా తనను తాను సంపన్నం చేసుకోవడానికి ప్రయత్నిస్తే, ప్రతి వ్యక్తికి తొమ్మిది వందల తొంభై తొమ్మిది మంది శత్రువులు ఉంటారు; అయితే, ప్రతి వ్యక్తి—శారీరకంగా, మానసికంగా, ఆర్థికంగా మరియు ఆధ్యాత్మికంగా ఇతరులతో సహకరిస్తే ప్రతి ఒక్కరికి తొమ్మిది వందల తొంభై తొమ్మిది మంది స్నేహితులు ఉంటారు. దేశాలన్నీ ప్రేమతో ఒకరికొకరు సహాయం చేసుకుంటే, భూమండలమంతా అందరి శ్రేయస్సును ప్రోత్సహించడానికి పుష్కలమైన అవకాశాలతో నిండి శాంతితో జీవిస్తుంది.

“రేడియో, టెలివిజన్ వంటి ప్రసార సాధనాలు మరియు విమాన ప్రయాణం మునుపెన్నడూలేని విధంగా మనల్ని దగ్గరకు చేర్చింది. ఇది ఇకపై ఆసియావాసులకు ఆసియా, యూరప్‌ వాసులకు యూరప్‌గా, అమెరికా వారికి అమెరికా మొదలైన వాటివలె కాకుండా, భగవంతుని ఆశ్రయం క్రింద ఉన్న విశ్వమంతా ఒక్కటే అని మనం నేర్చుకోవాలి. అప్పుడే ప్రతి మనిషి పరిపూర్ణమైన శరీరం, మనస్సు మరియు ఆత్మతో ప్రపంచంలోని ప్రతి ఒక్కరితో ఆదర్శవంతమైన పౌరుడిగా మెలగడానికి అవకాశం ఉంటుంది.

“ప్రపంచానికి అదే నా సందేశం, నా విన్నపం.”

శరీరం, మనస్సు మరియు ఆత్మలో ఒకరికొకరు సహకరించుకుంటూ ఆదర్శవంతమైన ప్రపంచ పౌరులుగా ఎదగడానికి అత్యంత గాఢంగా ప్రభావితం చేసే “నిర్మాణాత్మక మార్గం” సార్వత్రిక శాస్త్రమైన యోగాలోనే కనుగొనవచ్చు.