సుందరమైన హిమాలయ ప్రాంగణంలో వేసవి శిబిరాలు నిర్వహించిన వై.ఎస్.ఎస్.
(బాలలు మరియు కౌమారుల కోసం, మే 31 – జూన్ 6, 2026)

ఇంటికి చేరుకున్న తరువాత [మా అబ్బాయి] శిబిరంలో తాను నేర్చుకున్న, అనుభవించిన అద్భుతమైన విషయాలన్నింటి గురించి మాట్లాడుతూనే ఉన్నాడు. నేను హాంగ్-సా ప్రక్రియను క్రమం తప్పకుండా సాధన చేస్తున్నానా లేదా అని నన్ను అడిగాడు. అక్కడి వాలంటీర్లు అతడిపై ఎంత ప్రభావాన్ని చూపారంటే, అతడు తాను కూడా వాలంటీర్ అవ్వాలని కోరుకుంటున్నాడు.

నిన్న మా కుమార్తెలు ఇంటికి వచ్చిన తరువాత వారు చెప్పే కథలు వినడం, రోజంతా వారు కీర్తనలు పాడుకోవడం ఎంతో ఆనందానిచ్చాయి. వారు ఎంతో ఉత్సాహంగా కీర్తనలు పాడుతున్నారు – ఇది వారి జీవితంలోకి తెచ్చిన సకారాత్మకశక్తిని అప్పుడే చూడగలుగుతున్నాను. ఈ పవిత్రమైన అభ్యాసాలు కాలక్రమేణా వారి అంతరంగంలో లోతుగా నాటుకొనిపోతాయని నాకు తెలుసు. వారు తమ అనుభవాలను – స్వామీజీ ఏమీ చెప్పారో, వాళ్ళ బృందానాయకులు వారికి ఎలా మార్గనిర్దేశం చేశారో, అలాగే వారి హృదయాన్ని తాకిన ఎన్నో చిన్న క్షణాలు – పంచుకుంటుంటే వినడం నన్ను అపారమైన ఆనందంతో నింపింది.

మా అబ్బాయి శిబిరం నుంచి విశేషమైన సానుకూల దృక్పథంతోనూ, ఒక కొత్త ఆత్మవిశ్వాసం మరియు సంతోషాలతోనూ తిరిగివచ్చాడు. ఈ శిబిరం అతడిపై చూపిన సానుకూల ప్రభావం నిజంగా హృద్యంగా అనిపించింది. ఈ బృందం చూపించిన అంకితభావం, జాగ్రత్త, మార్గదర్శకత్వం మరియు నిర్వహణ అసాధారణమైనవి. పిల్లలకు ఇటువంటి అర్థవంతమైన మరియు అభివృద్ధికారకమైన అనుభవాన్ని కల్పించడానికి వారు వెచ్చించిన సమయాన్ని, కృషిని హృదయపూర్వకంగా అభినందిస్తున్నాము.

వెంటనే తృప్తీని ఆశించే ఈ వేగవంతమైన ప్రపంచంలో, పిల్లలు తమ చుట్టూరా మరియు తమ అంతరంగంలో ఏ ఆటంకం లేకుండా పరిశీలించుకోవడానికి ఈ శిబిరం ఒక అద్భుతమైన వాతావరణాన్ని కల్పించింది.

ఈ కార్యక్రమంలో నాకు నిజంగా నచ్చిన విషయం ఏమిటంటే, ఇంత చక్కటి శ్రద్ధ మరియు విలువలతో కూడిన వాతావరణంలో పిల్లలకు ఆధ్యాత్మికత, క్రమశిక్షణ, పరిజ్ఞానం, వినోదం, స్వతంత్రత, మరియు భావోద్వేగ వికాసాల మధ్య చక్కటి సమతుల్యతను అందించడం. పిల్లలు తమతో తాము, ఇతరులతోను మరియు గురూజీ బోధనలతోను ఎంతో సహజమైన, ఆనందభరితమైన రీతిలో అనుసంధానమయ్యేలా ఈ శిబిరంలోని ప్రతి అంశం ఎంతో ఆలోచనాత్మకంగా రూపొందించబడినట్లు అనిపించింది.

నేను వ్యక్తిగతంగా గత ఐదు సంవత్సరాలుగా పాఠశాల మరియు కళాశాల విద్యార్థులకు ఎన్.సి.సి. శిబిరాలను నిర్వహిస్తున్నాను. ప్రతి శిబిరం 500 మంది విద్యార్థులను కూడి, 10 రోజులపాటు కొనసాగుతుంది. ఇటువంటి శిబిరాలను మేము సంవత్సరానికి ఐదు సార్లు నిర్వహిస్తాం. కాని, మేము సదుద్దేశంతో ఎంత ప్రయత్నించినా, పిల్లలకు ఆధ్యాత్మికంగా ప్రేరణ ఇవ్వలేకపోయాము. మేము సాధించలేకపోయినది శూలినిలోని వై.ఎస్.ఎస్. శిబిరం సాధించింది. వారి ఆంతరంగిక ఆధ్యాత్మిక కోణాన్ని స్పృశించడం ద్వారా పిల్లలు ఎంతో ప్రయోజనం పొందారు... వై.ఎస్.ఎస్. మా అబ్బాయికి ఇచ్చిన ఈ ఆధ్యాత్మిక బహుమతి గురించి నా భావాలను నేను మాటలలో వ్యక్తం చేయలేను.